Sar va așiavena-pe o războio hai le marimata

O DEL VA DURIARELA SEA LE GUVERNEA LE MANUȘENGHE

O Del va duriarela sea le guvernea le manușenghe prin o războio Armaghedon cadea sar phenel i Biblia.a (Revelația 16:16) Ande codol ghiesa, „le regi pa sea i phuv” va avena chidine „anda o războio le bare ghiesesco le Devlesco O Mai Zuralo”. (Revelația 16:14) O Armaghedono si o baro marimos le Devlesco cai va așiavela sea le războaie pa i phuv.

O Del va paruvela sea le guvernea le manușenghe pesche Regatosa. Lesco guverno va raila anda o cerii hai ci va avela distrugime niciechdata. (Daniel 2:44) O Del alosardea pesche Șiaves, le Isus Cristosos te avel o Rege. (Isaia 9:6, 7; Matei 28:18) Cado guverno si o Regatob anda savo o Isus sicadea pesche discipolen te manghen-pe. (Matei 6:9, 10) Sea le manușa va avena chidine tela iech corcoro guverno cai va avela pe sea i phuv, hai o Isus va raila opral savore.

O Isus ci va folosila pesco zuralimos caște rodel pesco miștimos cadea sar cheren le guvernea le manușenghe. Vo silo orta hai ci dichel ieches mai opre sar le coaveres, cadea că chonic ci va trebula te gândil-pe că va avela bâstărdo anda codoia că țârdel-pe anda aver neamo, them sau cultura. (Isaia 11:3, 4) Mai but, le manușa ci va mai trebuna te maren-pe anda pengo ortomos. Sostar? Anda codoia că o Isus va lela sama ca fiesavo manuș te îngărel-la mișto. „Că vo va hastravela le ciores cai del cingar pala ajutorii hai, sa cadea, vi codoles cai silo umilo hai codoles cai nai-les ajutorii. . . . Va hastravela lengo sufleto cathar o nasulimos hai cathar i violența.” (Psalmo 72:12-14)

O Regato le Devlesco va duriarela pa i phuv sea le arme cai mudaren. (Mica 4:3) Sa cadea, va chosela le manușen nasul cai ci camen te așiaven o marimos sau codolen cai cheren nasulimos. (Psalmo 37:9, 10) Fiesavo murș, jiuvli hai șiavorro va simțola-pe andi siguranța oricai va jiana pi phuv.(Ezechiel 34:28)

Le manușa va traina zurales mișto tela o Regato le Devlesco. Vo va chosela le pharimata cai cheren le manușen te maren-pe aghies. Ci va mai avela ciorâmos hai bochalimos. Savore manușen va avela-len so te han hai iech than șucar cai te beșen.(Psalmo 72:16; Isaia 65:21-23)

Tela o Regato le Devlesco, le bare ducha cai anel-len o războio va avena duriarde. Cadala na-i numai le ducha fizico, tha vi le ducha andai goghi hai anda o ilo le manușengo cai nachle prin o războio. Chiar vi codola cai mule va avena uștiade pale viațate pi phuv. (Isaia 25:8; 26:19; 35:5, 6) Le familii va avena pale chidine, hai le buchia nasul cai andea-len o războio va cherena partea andal ‘buchia cai sas mai anglal hai [save] nachle’.(Revelația 21:4)

O DEL VA DURIARELA O PĂCATO

Cana o Regato le Devlesco va raila sea le manușa va anena închinarea le corcore ciace Devlesche, o Iehovac, „o Del la iubireaco hai la paceaco”. (2 Corinteni 13:11) Le manușa va sichiona sar te train ande iech than andi pacea. (Isaia 2:3, 4; 11:9) Sea codola cai va așunena le Devlestar va avena eliberime cathar o păcato hai va arăsăna manușa perfecți.(Romani 8:20, 21)

O DEL VA DURIARELA LE SATANOS HAI LESCHE BENGHEN

O Regato le Devlesco va chosela cu sea codolen cai cheren le manușen te astaren o războio, le Satanos hai lesche benghen. (Revelația 20:1-3, 10) Cana i lumea va hastrala tela lengo zuralimos nasul, pi phuv „va avela butimos paceaco”.(Psalmo 72:7)

Daștis te pachias ciaces că le promisiuni le Devlesche cai phenen că va chosela cu sea o războio hai le bare marimata va pherena-pe. Vo daștil hai vi camel te duriarel o războio anda sea o timpo.

• Le Devles siles o goghiaverimos hai vi o zuralimos caște chosel cu sea o războio hai le marimata. (Iov 9:4) Chanci ci daștil te așiavel-les caște cherel so camel vo.(Iov 42:2)

• O Del urâl te dichel că le manușa nachen prin ducha. (Isaia 63:9) Sa cadea „vo urâl codoles cai iubil o marimos”. (Psalmo 11:5)

• O Del încărel peschi duma sea o timpo; vo ci daștil te hohavel.(Isaia 55:10, 11; Tit 1:2)