Ruchingej Rey Mudiay Nzamb Ridi Rikash mu Chilik Ik?

“Sambilany bil kusurib want wend.”—MATEU 6:33.

1, 2. Mupak ik wakwatay nsand ikundj umwing pantaliken nich mudimu, ni mulong wak?

NSAND umwing wasota kwikal usadidilau nakash mu chikumangen chau. Chad chikangesh chadinga mudimu wend wa ku mujimbu mulong wamukangeshanga kukumangan. Mutapu ik wapwishay mulong winou? Wapipesha mwom wend, walika mudimu wend, ni pa kusut kwa chisu wamana mudimu wadinga wakad kupwitijan nich mijikit yend ya Ukristu. Ilel, ukat kutan difut dikemp kwisikesh nich diadingay nikutambul, pakwez ukat kuwanyish maswir ma dijuku diend ni udi usadidilau nakash chakwel kukwash chikumangen.

² Ov, wovil mulong wak nsand ikundj winou wakwata mupak mud winou? Ov, wela kutwish niyey kukwat mupak wa chilik chimwing anch wadinga mu mikadil yend? Cha kujikitish, mwamu musadilau in Kristu avud, ni yisal yau yilejen ruchingej rau mu kushilamu kwa Yesu anch: “Sambilany bil kusurib want wend ni kutentam kwend, chawiy lel yom yawonsu akez kananzukeshilip.” (Mateu 6:33) Amuchingejidin Yehova mulong wa diking pa ndond pa kuchingejin mangand.—Jinswir 3:23, 26.

3. Ov, mulong wak ukutwishau antu amwing kutongin anch chidi cha manangu ilel kutek bil Want wa Nzamb pa ndond ya kusambish?

³ Mulong wa yisu yikash mutushicha, amwing akutwish atong anch nsand ikundj winou wakwata mupak wa manangu. Ilel, chisak chimwing cha antu chidi mu uzwendj wa pa mes bwi oku chikwau chikat kusanger ngikadil yimwing ya mwom uwamp upandikena mu rusangu ra muntu. Avud mu jingand ja uzwendj akwatin ba mutapu win ap wisu chakwel kuwapishaku mwom wau ap pakemp kusu. Ku mutambu ukwau, avud adia mu jingand ja mapit ovil chipwichik cha kulam ngikadil ya mwom chikalap nchik kuwa kwa ekonomi, kukarumok kwa midimu, ni ap anch in midimu ayit usu ni chisu chivud. Mulong wa chipwichik cha kulam mwom, amwing akutwish atong anch, ‘ov, chichidi ni katat cha manangu kusambel bil kusurab Want?’ Chakwel kukwash kwakul ku chipul chinech, shinshikin antu adinga alejinau kud Yesu.

“Kangal Wiyakamishany”

4, 5. Chifanikesh ik chaletay Yesu chakwel kwovikesh anch chadinga cha manangu kud antu a Nzamb kangal apandikesh kutong piur pa yisakin ya pichuku-pichuku?

⁴ Yesu wadinga mu Galilaya, wisamba ni chisak chijim cha antu adiokala ku jindond jivud. (Mateu 4:25) Akemp kusu a antu inay awonsu adinga ampich. Chimeken, avud adinga atuzweny. Pakwez Yesu wayikasikesha anch kangal kutek pa ndond ya kusambish kwak dipit dia ku mujimbu pakwez kwiruzukin chom chimwing cha usey nakash—dipit dia muspiritu. (Mateu 6:19-21, 24) Ndiy walonda anch: ‘Kangal wiyakamishany mulong wa mwom wen, yiukudianya ap yiukunanya, ap mulong wa mujimbu wen anch tukudjal ik. Ov kwikal mwom kichipandikenip yakudia? Ni mujimbu kiupandikenip yidjal?’—Mateu 6:25.

⁵ Kud avud a in kumutesh inay, mazu ma Yesu mela kumekan ma chamwamu. Awiy adinga ij anch ang alik kusal mudimu ni usu nakash, majuku mau makez kuman mar. Pakwez, Yesu wayivurisha piur pa atujil. Ading aom pichuku-pichuku, mulong Yehova ukat kuyibangin atujil. Yesu wisambina kand mutapu ukatay Yehova kubangin yisalamb ya mwisuku, ufun umwing upandakenamu wadingay nich Salomon mu uyaj wend wawonsu. Anch Yehova uyibangidin atujil ni yisalamb mwamu, mu chilik chipandikena mud ik chikutubanginay? (Mateu 6:26-30) Mud mwalonday Yesu, mwom (mipim) wetu ni mijimbu yetu yidi ya usey ujim kupandakanamu yakudia yitulandina chakwel kulam mwom wetu ni maswin mitukutwisha kwak mulong wa kubwik mijimbu yetu. Anch twasadil usu wetu wawonsu mulong kwau kusu wa kwidish ni kwidjik, wakad kusha ap karusis mulong wa kumusadil Yehova, tukangeny kutesh rutong rin kamu ra mwom.—Mulej 12:13.

Kuman Kwisikena

6. (a) In Kristu akwet chisend ik? (b) Mu yom yawonsu, kwisu kutekinau in Kristu ruchingej rau?

⁶ Chakin, Yesu kayikasikeshap in kumutesh chakwel alika kusal mudimu ni amuchingela Nzamb chakwel awanyisha maswir ma majuku mau. Ap atuji chiyifanyidin kukimb yakudia yau ni ya anau. Chawiy komb, chiyifanyidin in Kristu kusal mudimu anch asotil kudia. Chiyifanyidin kubangin yisend ya dijuku. Atushalapol in Kristu ni atubindj ayisadilanga ansalejau mudimu ukash. (2 Tesalonik 3:10-12; 1 Timote 5:8; 1 Pita 2:18) Chisu ni chisu kambuy Paul wasala mudimu wa kuchim antent chakwel ikwasha amwinend. (Midimu 18:1-4; 1 Tesalonik 2:9) Pakwez, in Kristu inay kadingap ni kuchingejin mudimu wa ku mujimbu mulong wa diking. Amuchingejina Yehova. Mud chibudikin, asangera chisambu cha mu muchim chakad kwijikan kud antu akwau. Nfund-a-kusend walonda anch: “Awiy akat kumwitiy Mwant Nzamb adi mudi mukandu wa Zion wakad kunyikek ni ku kwisudiel.”—Kuseng 125:1.

7. Chisu chikutwisha kwikal Chitongijok cha muntu wakad kujamishin dang ruchingej mudiay Yehova?

⁷ Muntu win mwawonsu wakad kujam dang mu kumuchingejin Yehova ukutwish kutong mutapu windjing. Antu avud amen dipit dia ku mujimbu mud chom cha kusambish cha diking. Chawiy, anvaj akat kuyikasikesh anau kwipan nakash mu mivu ya winsand wau mu kwilej nakash, nich kuchingejin anch kukez kuyirijek kutan midimu ya kuzembul difut. Cha ushon, majuku mamwing ma in Kristu mamana anch kwipan kwinoku mu kwilej nakash kudi kushadish kujim nakash kwa chisu ni usu, mulong anau ashadisha kuman kwau kwa muspiritu ni akarumukina ku kulondul jintong ja ku mujimbu.

8. Kwisikan ik kulaminau in Kristu?

⁸ Chawiy, in Kristu ababela ij anch chiyul cha Yesu chisadil nakash ilel mud muchadinga mu mivu chitot ya kusambish, ni apakishin kulam kwisikan. Ap anch chiyifanyidin kusutish chisu chilemp mu mudimu wa ku mujimbu chakwel kubangin yisend ya Mifund, awiy kakatap kushil ndond maswir ma kutan nfalang madiosha yitongijok yau ku yom yijim ya muspiritu.—Mulej 7:12.

“Kangal Wiyakamishany”

9. Mutapu ik Yesu wayikasikeshay antu amuchingejidina Yehova?

⁹ Mu Mafundish mend ma pa Mukandu, Yesu wayikasikesha in kumutesh end anch: “Chawiy kangal wiyakamishany anch: ‘Ov, tukudia yom ik? Ov, tukuna yom ik? Ov, tukudjal yom ik?’ In mangand akat kukimb yom yiney yisu yawonsu. Pakwez en, Tatukwen udia mwiur wij kal anch, ukwetany kuswir kwa yom yiney yawonsu.” (Mateu 6:31, 32, Manswik Masu) Mazu makweta dikasikesh mud ik! Anch twamuchingejin kamu Yehova, ndiy ukez kwikalaku chisu chin chawonsu mulong wa kutukwash. Pakwez, mazu ma Yesu malangwishin kand yitongijok. Matuvurishin anch ang ‘twasurab’ nakash yom ya mujimbu, manangu metu madi mud ma “in mangand,” antu akad kwikal in Kristu akin.

10. Pezay nsangarum kud Yesu chakwel amuyula, mutapu ik wajinguninay Yesu yading yikatilay nakash nsangarum?

¹⁰ Dichuku dimwing, nsangarum umwing mpich wamwipula Yesu yading yifanyidinay kusal chakwel atambula mwom wa chikupu. Yesu wamuvurisha yitinau mu Chijil, chadinga chichisadil pa chisu chinicha. Nsangarum wamwakula Yesu anch: “Yom yiney yawonsu nayisadila kal kwam; ing chinshila chisu?” Chakul cha Yesu chikutwish kumekan kwikal chakad manangu kud antu avud. Yesu wamwela anch: “Anch wel anch wikala uwanyidina, yang ulandish yiukweta, upana kudi atuzweny, ey ukez kapitil chipau mwiur; weza winlondul am.” (Mateu 19:16-21) Nsangarum waya ni ushon, mulong katwishap kwitiyij chitong cha kushadish dipit diend. Chikalap nchik chilik chamukatay Yehova, ndiy wakata nakash mapit mend.

11, 12. (a) Mazu ik ma usey malonday Yesu piur pa dipit? (b) Mutapu ik mukutwisha mapit kwikal chikangesh cha kumusadil Yehova?

¹¹ Chishiken chinech chamubachika Yesu alonda chom chimwing chakad kuchingejin anch: “Chidi chikash kudi muntu mpich kwandam mu want wa mwiur. . . . Chidi chiswapela nakash kud kamel kusut mu dipan dia katumu pakwez chikangen nakash kud muntu mpich kwandam mu want wa Nzamb.” (Mateu 19:23, 24) Ov, Yesu walonda anch kwikil mpich ap umwing ukeza kuswan mu Want? Kimwawiyap, mulong wadandamena kulond anch: “Kudi Nzamb yom yawonsu yikasikenip.” (Mateu 19:25, 26) Chakin kamu, nich ukwash wa Yehova, antu amwing adia ampich a pakur ikala in Kristu azizidilau many. (1 Timote 6:17) Ap mwamu, Yesu walonda mazu minam mashimokishina nich diyingish diwamp. Ndiy wadinga uletin dibabesh.

¹² Anch muntu walamat dang ku mapit mend mud mwasalay nsangarum mpich winou, makutwish kwikal chikangesh ku kumusadil kwend Yehova nich muchim wawonsu. Chom chinech chikutwish kwikal chakin ku mutambu wa muntu udia kal mpich ni kud muntu usotila ching ‘kwikal mpich.’ (1 Timote 6:9, 10) Kuchingejin nakash mu yom ya ku mujimbu kukutwish kumushikij muntu ku kwikal wakad ‘kwijik maswir mend ma muspiritu.’ (Mateu 5:3) Mud chibudikin, kakutwishap kuswiriken kand ukwash wa Yehova. (Kuvurik Yijil 6:10-12) Ukutwish kuchingejin ching kusu kumukwat nich makas maad mu chikumangen. (Jakobu 2:1-4) Ni ndiy ukutwish kusutish chisu chend chivud mu kusanger dipit diend kupandakanamu kumusadil Yehova.

Kukudish Chitongijok Chiwamp

13. Chitongijok ik chiyimp chadingau nich in Laodisey?

¹³ Chisak chimwing chikweta chitongijok chiyimp piur pa mapit chadinga chikumangen cha pa mivu chitot ya kusambish cha Laodisey. Yesu wayela anch: “Mulong ukat kulondol anch, Am yam mpich, napitil kal mapit, kiniswiridinip kand chom; ey kiwijip anch udi mwin kufa mukan ni kwitanyish ni uzweny ni wimputames ni mudj.” Kimadingap mapit mau mayishikija in Laodisey mu mwikadil winou wa kufa muspiritu. Chading mulong anch awiy achingejina mu dipit pa ndond pa kumuchingejin Yehova. Mud chibudikin, adinga nich kalengidij muspiritu, piswimp ‘amurika’ mu kan ka Yesu.—Kujingunik 3:14-17.

14. Ov, mulong wak Paul wayijikitisha in Kristu in Hebereu?

¹⁴ Ku mutambu umwing, Paul wayijikitisha in Kristu in Hebereu mulong wa ngikadil yau pa chirung cha chisu cha kusambish kwa kuzengol. Ndiy walonda anch: “En wovanya riy kudi udinga mu rukan, ni kutambulany ni musangar kusheshik kwa yom ya uswan wen, mulong wijikany anch en ayinen ukwetany uswan upandikena kuwap ukushakam chikupu.” (Hebereu 10:34) In Kristu inay kinanap nakash mulong wa kushadik kwa mapit mau. Alama musangar wau mulong alama dang dipit dipandikena usey, ‘uswan wau upandikena kuwap ukushala chikupu.’ Mud mwin kwisak wa chilakej cha Yesu, wapana yom yawonsu mulong wa usang umwing, awiy akwata mupak wa kulik kushadish ruchingej rau ra Want, chikalap nchik mwamu. (Mateu 13:45, 46) Ngikadil yiwamp mud ik!

15. Mutapu ik watekay mband umwing mwin Kristu wa mu Liberia yisakin ya Want pa ndond ya kusambish?

¹⁵ Antu avud ilel akudishin kal ngikadil ya manangu ya chilik chimwing. Chilakej, mu Liberia, changadim umwing mwin Kristu amwinkisha mutapu wa kwilej ku iniversite. Mwi ngand yiney, chipan chinech chikutwish kumekan mud njil yitwadila ku dikez dia diking. Pakwez, ndiy wadinga chibol, mwin kulejan wa chisu chawonsu, ni watambula diladikij dia kusal mud chibol wa rawonsu chisu kanang. Watonda kukimb bil Want ni washala mu mudimu wa chisu chawonsu. Waya ku teritwar wend ni wasambisha malejan ma Bibil 21 mu angond asatu. Nambaz changadim winou ni tunan twa antu adia mud ndiy akimbin bil Want, ap anch mu chilik cha kuburen yisakin ya ku mujimbu. Mutapu ik ulaminau ngikadil yiney ya manangu mu mangand minam malondwila yom ya mujimbu? Akudishin kal uvud kanang wa ngikadil yiwamp. El twisambin ngikadil yimwing.

16, 17. (a) Ov, mulong wak kwishikumwish kudi kwa usey anch tusotil kumuchingejin Yehova? (b) Ov, mulong wak tufanyidina kukudish ruchingej mu yakushilamu ya Nzamb?

¹⁶ Kwishikumwish: Bibil ulondil anch: “[Muchingejina Yehova] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey. Kangal wikal ni manangu ma ku mes kwey amwiney.” (Jinswir 3:5-7) Yisu yimwing, njil yimwing yikutwish kumekan kwikal ya manangu mu kuman kwa mujimbu. (Jeremiy 17:9) Chikwau, mwin Kristu wa kashinsh ukat kumuchingejin Yehova chakwel amutakela. (Kuseng 48:14) ‘Mu jinjil jawonsu’—mu milong ya chikumangen, shikol ap mudimu wa ku mujimbu, kwipuwangesh, ap chom chin chawonsu—nich kwishikumwish, ndiy ukat kukimb chiyul cha Yehova.—Kuseng 73:24.

¹⁷ Ruchingej mu yakushilamu ya Yehova: Paul walonda anch: “Mwawonsu ukweza kudi Nzamb uwapidil kwitiy anch uding kwaku, ni ndiy ukez kuyifut . . . awiy akata kumusot.” (Hebereu 11:6) Anch twidjidjekin anch Yehova ukez kuwanyish yakushilamu yend, chikez kumekan kwikal chifanyidina ‘kusadil mangand minam muchifanyidina.’ (1 Korint 7:31) Ku mutambu ukwau, anch ritiy retu ridi rikash, tukez kukwat mupak wa kukimb bil Want. Ov, mutapu ik utwishikina kukudish ritiy rikash? Kusutil ku kumushejin Yehova piswimp chikupu, ku malembil madiokila ku muchim ni kusutil ku dilejan dia muntu ipend diakad kujing. (Kuseng 1:1-3; Filip 4:6, 7; Jakobu 4:8) Mud Mwant David, tukutwish kulembil: “[A Yehova], nichingejin mudi Ey. Nalonda am anch: ‘Ey udi Nzamb wam.’ A, kujimb mudi kwinoku kwa kuwap kwey!”—Kuseng 31:14, 19.

18, 19. (a) Mutapu ik ukata mushiku kukasikesh ruchingej retu mudiay Yehova? (b) Ov, mulong wak ufanyidinay mwin Kristu kusot kupesh yakupesh?

¹⁸ Mushiku mu mudimu wa Yehova: Paul wakasikeshina ruchingej mu yakushilamu ya Yehova nich mushiku pafunday anch: ‘Etu tusotil chakwel mwawonsu wa pakach pen amekesha mushiku wa kudandamen kwinoku kwa kuwanyish kwa ruchingej ni kushik kwisudiel.’ (Hebereu 6:11) Anch tukwet yivud ya kusal mu mujikit wa Yehova, ndiy ukez kutukwash. Chisu ni chisu tukat kuman ukwash winou, kumuchingejin kwetu kukat kwikal kukash, tukat ‘kwiman dang wakad kushemunik.’ (1 Korint 15:58) Ritiy retu rikat kwiyikadish risu, ni ruchingej retu kujijaman.—Efes 3:16-19.

¹⁹ Rusot ra kwipan: Paul walika mudimu uwamp nakash mulong wa kumwambat Yesu. Watonda kutond kuwamp, ap anch mwom wend wadinga pa chisu ukash pantaliken nich yom ya ku mujimbu. (1 Korint 4:11-13) Yehova kakatap kushilamu mwom wa misangar mapit, ni pa yisu yimwing atushalapol end akat kujijaman ku mar. Kusot kwetu kupipesh mutapu wa mwom wetu ni kwipan yakupesh kumekeshin ukash wa mupak wetu wa kumusadil Yehova.—1 Timote 6:6-8.

20. Ov, mulong wak kushimpish muchim kudi kwa usey kud muntu utekina pa ndond ya kusambish yisakin ya Want?

²⁰ Kushimpish Muchim: Kambuy Jakobu wayikasikesha ambay nend in Kristu anch: “Akadivar, shimpishany michim ni pakwezilay Mwant.” (Jakobu 5:7) Mu mangand minam makarumukina swa-swa, chidi chikash kwikal mwin kushimpish muchim. Tusotil yom yisadika mau-mau. Pakwez Paul utukasikeshin kuyilakej awiy “in ritiy ashimpishina michim akata kutambul yom yashilayimu Nzamb.” (Hebereu 6:12) Ikal tayad kumuchingel Yehova. Mwom wa chikupu mu paradis pa divu—chakin kamu chifanyidin kuchingel!

21. (a) Chom ik tukata kumekesh pitukata kutek pa ndond ya kusambish yisakin ya Want? (b) Chom ik tukeza kwisambin mu mutu wa mulong wambakedinap?

²¹ Mwaning, chiyul cha Yesu cha kukimb bil Want chidi cha manangu. Pitusadila mwamu, tumekeshin anch chakin kamu tumuchingejidin Yehova, ni yawiy kusu yidia njil ya diking yifanyidinay kulondul mwin Kristu chakwel kwikal mwom. Pakwez, Yesu watuyula kand kudandamen “bil kusurib . . . kutentam [kwa Nzamb].” Mu mutu wa mulong wambakedinap ou, tukez kuman mulong wak dikasikesh dined didi diswiridikina ilel.

Ov, Ukutwish Kurumburil?

• Piur pa yom ya ku mujimbu, kwisikan ik kwatukasikeshay Yesu kwikal nich?

• Chom ik twilejidina ku chilakej cha Yesu cha kamel ni dipan dia katumu?

• Ngikadil ik ya Ukristu yitukwashina kukimb bil Want wa Nzamb?

[Chipich chidia pa paj wa 19]

Avud atesha mazu ma Yesu adinga atuzweny

[Chipich chidia pa paj wa 21]

Nsangarum mpich wakata nakash mapit mend kupandakanamu kumukat Nzamb

[Chipich chidia pa paj wa 21]

Mwin kwisak wa mu chilakej cha Yesu walandisha yom yend yawonsu mulong wa usang umwing wa usey

[Chipich chidia pa paj wa 22]

Anch twakwatikan nakash mu mujikit wa Yehova, ndiy ukez kutukwash