Dizu dia Yehova Didi Diom

Manans Majim ma Buku wa Kusambish wa Kuseng

OV, DIJIN ik diwapidila buku wa Bibil umushimena mu mutapu ujim Sakatang wetu, Yehova Nzamb? Kwikil dijin difanyidina ching kusu Kuseng. Buku winou mulemp nakash mu Bibil ukwet miminy yiwamp yisambidina ngikadil yiwamp ni yisal ya dikand dia Nzamb ni ushimunin kand uprofet kushalijan. Miminy yivud yilejen yovil yovau antu ayifunda pamanau mar. Nkumbu jinej jidi ja chirung cha mivu chitot—kudiosh pa machuku ma muprofet Moses djat pa chisu cha kudiokal mu uyong mu Babilon. Anfund-a-kuseng adinga Moses, Mwant David, ni akwau. Mwin kupesh Ezra ndiy wamutenchika buku winou mu mutapu udiay.

Kudiosh kamu pakur, buku wa Kuseng amwaurila mu mibombu yitan ya miminy, ap anch yikunku: (1) Kuseng 1-41; (2) Kuseng 42-72; (3) Kuseng 73-89; (4) Kuseng 90-106; ni (5) Kuseng 107-150. Mutu wa mulong winou ushinshikidin chikunku cha kusambish. Mu chikunku chinech mudi ching kusu miminy yisatu ya Mwant David wa Isarel wa pakur. Antu asala Kuseng wa 1, wa 10, ni wa 33 kijikenap.

“NZAMB WAM; UDI DIYAL DIAM”

(Kuseng 1:1–24:10)

Kupwa kwa kuseng wa kusambish kulond anch wayuk muntu ukata kusanger mu yijil ya Yehova, wa kaad wisambidin piur pa Want.a Mu chikunku chinech cha kuseng mudi malembil mavud mamulembilau Nzamb. Chilakej, Kuseng 3-5, 7, 12, 13, ni wa 17, madi malembil mulong wa kukolik kudiokal kud akankuny. Kuseng wa 8 ukasikeshidin kujimb kupandakena kwa Yehova mu kumwisikesh ni kukep kupandakena kwa muntu.

Pamurumburilay Yehova mud Mukol wa antwend, David wawang anch: “Nzamb wam; udi diyal diam, nikwikangil kudiay Ndiy.” (Kuseng 18:2) Mu Kuseng wa 19, amutumbishin Yehova mud Sakatang ni Mwin Kupan Chijil, mu Kuseng wa 20 mud Mukol, ni mud Mukol wa Mwant wend wazizidilay many mu Kuseng wa 21. Kuseng wa 23 umurumburil mud Kafung Mujim, oku Kuseng wa 24 umurumburil mud Mwant wa uyaj.

Yakul ku Yipul Yipwilau Piur pa Mifund:

Kuseng 2:1, 2—Yisu “Yitongijok yamwamu” yikwetau in mangand? “Yitongijok yamwamu” yiney kudi kwiyakamish kwa chisu chawonsu kwa maguvernema ma antu masotila kudandamen kulam winyikel wau. Yidi yamwamu mulong rutong rau rikukangany chakin. Ov, chakin kamu in mangand akutwish kuchingej kutwish anch iman mulong wa ‘kumupungan Yehova ni [mwant] wend uzizidilau many’?

Kuseng 2:7—“Chiyul” cha Yehova chom ik? Chiyul chinech madi manswik ma Want, maswikay Yehova ni Mwanend mukatish, Yesu Kristu.—Luka 22:28, 29.

Kuseng 2:12—Mutapu ik ukutwishau in mangand ‘kumusus mwan’? Pa chirung chafundau Bibil, kusus kwadinga chijingidij cha urund ni kushinshaman. Wadinga mutapu wa kuyak nawamp angendj. Ant a pa divu ayishindidil kumusus Mwan—chirumburikin anch chiyifanyidina amwitiyija mud Mwant Mesia.

Kuseng 3: Mazu ma kusambish nich—Madia kwisambishil kwa miminy yimwing ya Kuseng makwet usey ik? Yisu yimwing mazu minam malejen mwin kufund ni/ap malejen rusangu piur pa ngikadil yadingaku pa chisu chasalau kuseng winou, mud muchidia pa Kuseng wa 3. Mazu ma kusambish nich makutwish kand kurumburil rutong ap kusadil kwa muminy kanang (Kuseng wa 4 ni wa 5) ni kujimbul yisaj ya kuwang nich (Kuseng wa 6).

Kuseng 3:2—“Sela” chom ik? Dizu dined aditongidin chisu chawonsu anch dilejen kupim, kwikuchik zong mulong wa kutongijokin, chikalap mu kuwang ku kan ap mu kusadil chisaj cha kuwang nich. Kupim ading akusadidil mulong wa kukasikeshin nakash chitongijok ap chovil. Chidiap cha usey kutangang dizu dined pa chisu tutangina Kuseng kurutu kwa antu.

Kuseng 11:3—Manguj ik masheshikina? Minam madi manguj pimedina chisak cha muntu—chijil, nkand, ni kutentam. Anch yiney yidi mu kanvundangesh, kukat kulank ruvundu mu chisak ni kwikiling kutentam. Mu mikadil mud yiney, “antu atentamina” afanyidin kumuchingejin nakash Nzamb.—Kuseng 11:4-7.

Kuseng 21:3—Chirumburikin ik “chibangul cha utad usunz win kamu”? Kachilejenap anch chibangul chadinga chakin ap cha chifanikesh mulong wa kuwejin uyaj wa kuwin mwi njit kuvud kwa David. Pakwez, verse winou udi uprofet wisambidina chibangul cha want wamwinkishau Yesu kud Yehova mu 1914. Kulond anch chibangul chidi cha or kurumburikin anch winyikel wend udi wa piur nakash.

Kuseng 22:1, 2—Ov, mulong wak David wiyova anch Yehova wamulika kal? David wadinga mu mar makash mulong wa akankuny nend mu chilik cha kwel anch ‘muchim wend wikala mud nsil yikat kwengurik mukach mwend.’ (Kuseng 22:14) Chawiy chamekana kud ndiy mud Yehova wamulikin kal. Pamupampinau Yesu pa mutond, niyend wiyova chilik chimwing. (Mateu 27:46) Mazu ma David mamekeshin kwakul kwend kwa chiuntu ku mwikadil wend wa kuburen ruchingej. Pakwez, mu malembil mend mafundau mu Kuseng 22:16-21, chimeken anch David kashadishap ritiy rend mudiay Nzamb.

Malejan kud Etu:

Kuseng 1:1. Chifanyidin kwipuk kuta urund ni antu amukisina Yehova.—1 Korint 15:33.

Kuseng 1:2. Kangal twasutish dichuku ap dimwing pakad kushinshikin milong ya muspiritu.—Mateu 4:4.

Kuseng 4:4. Ap anch twajiman ap twov nkabu, chidi cha manangu tulama rudim retu chakwel anch kangal twalond chom chitukeza kwinan kwinyim.—Efes 4:26.

Kuseng 4:5. Yakupesh yetu ya muspiritu yidi “yakupesh ya kutentam” ching anch tukwet yibachikin ya muchim yiwamp ni anch mwikadil wetu wambaten nich yijil ya Yehova.

Kuseng 6:5. Diyingish ik dipandakena kuwap tukweta dia kwikadil aom?—Kuseng 115:17.

Kuseng 9:12. Yehova ukat kuyikimb in kumwang mash chakwel ayifundakeshina, pakwez ukat kuvurik “kudil kwau amena mar.”

Kuseng 15:2, 3; 24:3-5. In kwifukwil akin chiyifanyidin kulond uyakin ni kwipuk kuchip kwa makasu ni kulondang makasu.

Kuseng 15:4. Kudioshamu anch twajingunin anch twashidilamu kushilamu kwakad kwambatan nich yilondila Bibil, tufanyidin kusal usu wetu wawonsu chakwel kuwanyish mazu metu, ap anch chikasiken kusal mwamu.

Kuseng 15:5. Chitudia in kumwifukwil Yehova, tufanyidin kwilam ku kusadil kuyimp kwa nfalang.

Kuseng 17:14, 15. “Antu a ku chirung chinech” ipanin nakash mulong wa kwikal nich mwom uwamp, kulil dijuku, ni kusha uswan. Rutong ra kusambish ra David radinga ra kwisadil dijin diwamp kud Nzamb chakwel ‘amana chifu chend,’ ap anch Yehova amwitiyija. Anch ‘walank’ mulong wa kushilamu ni kashinsh ya Yehova, David wela kwov ‘musangar wa kuman chifu Chend,’ ap kusanger mudiay Yehova pamwing nend. Ov, tukutwishap mud David kutek muchim wetu pa mapit ma muspiritu?

Kuseng 19:1-6. Anch yitang, yakad kutwish kulond ap kutong, yikat kumushiman Yehova, ov, mu chilik ik tufanyidina kusadil ukaliweny wetu wa kutong, wa kulond, ni wa kwifukwil mulong wa kumushiman Yehova?—Kujingunik 4:11.

Kuseng 19:7-11. Yisotilay Yehova—yidi yiwamp nakash kud etu!

Kuseng 19:12, 13. Yisal ya kurumbuk ni kusal yom pakad kutambul mbil, yidi yitil yitufanyidina kwipuk.

Kuseng 19:14. Kitufanyidinap kubangin ching kusu yom tusadila pakwez tufanyidin kand kubangin yom tulondila ni kutong.

“EY UKAT KWINKASIKESH MULONG WA KASHINSH KA MUCHIM WAM”

(Kuseng 25:1–41:13)

Rusot rakin ni mupak ukash mud ik wa kulam kashinsh kend umekeshinay David mu kuseng kwa kusambish ni kwa kaad kwa chikunku chinech! David wawanga anch: “Pakwez am nikat kwendil mu kashinsh [kam].” (Kuseng 26:11) Mu malembil mend ma kwit dilikishin dia yitil, David witiyina anch: “Pinalika kwitiyil yitil yam, mafup mam mauma, nading ni kukimuk muten wawonsu.” (Kuseng 32:3) David uyinkishin antu ashinshamena kud Yehova kashinsh anch: “Mes ma [ Yehova] madi padi in kutentam, ni matu mend manzurikidin ku kudil kwau.”—Kuseng 34:15.

Chiyul chidia mu Kuseng wa 37 chadinga cha usey nakash kud in Isarel ni kudi etu, mulong tushich mu “machuku ma kwisudiel” ya ditenchik dia yom! (2 Timote 3:1-5) Pisambidinay mu mazu ma uprofet piur pa Yesu Kristu, Kuseng 40:7, 8 ulondil anch: “Tal, am nez kal, afundil kal yamam mu mukand uvungilau. Nasangar kusadil rusot rey, A Nzamb wam, mwawiy, yijil yey yidi kal mu muchim wam.” Kuseng wa nsudiel wa mubombu winou wisambidin piur pa malembil ma David mulong wa kutambul ukwash wa Yehova mu mivu ya mar kwinyim kwa chitil chend chasalay ni Batisheba. David wawanga anch: “Ey ukat kwinkasikesh mulong wa kashinsh ka muchim wam.”—Kuseng 41:12.

Yakul ku Yipul Yipwilau Piur pa Mifund:

Kuseng 26:6—Ov mutapu ik tukutwisha niyetu kunyingumuk ku chintamb cha Yehova, mud mwasalay David? Chintamb chifanikeshin rusot ra Yehova ra kwitiyij difut dia yakupesh ya Yesu Kristu mulong wa kuyikol antu. (Hebereu 8:5; 10:5-10) Tukat kunyingumuk ku chintamb cha Yehova kusutil ku kwikal nich ritiy mu yakupesh yiney.

Kuseng 29:3-9—Mulong wak ufanikeshinau dizu dia Yehova nich kudjim kwa nzaj kukwatishena wom? Chidi kusu mulong wa kufanikesh: dikand dipandikena dia Yehova!

Kuseng 31:23—Ov, muntu ukata kwitumbish akat kumufut chipandikena mutapu ik? Difut disambidinau pinap chidi chibau. Muntu utentamina ukutambul difut diend mulong wa kurumbuk kwend kwakad kutongin mu mutapu wa dipup didiokila kud Yehova. Mulong muntu witumbishina kakulikap njil jend jiyimp, ndiy amufutin chipandikenamu nich chibau chijim nakash.—Jinswir 11:31; 1 Pita 4:18.

Kuseng 33:6—“Mwiku” wa mu kan mwa Yehova chom ik? Mwiku winou udi usu wa Nzamb, ap anch mwiku utumbila, wasadilay patangay maur mamekena ni mes. (Disambishil 1:1, 2) Autazukin anch mwiku wa mu kan mwend mulong, mud mwiku ukash, chitwishikin kuutum ukasala yom yidia kulemp.

Kuseng 35:19—Kulembil kwalembilay David anch kangal ayilika akankuny nend akapul dis diau kurumburikin yom ik? Kukapul dis kwela kumekesh anch akankuny a David asangaredin kuying kwa mipit yau yimutidinau David. Chawiy chalembilay David anch kangal chom chinech chisadik.

Malejan kud Etu:

Kuseng 26:4. Chikwikal cha manangu kulik kuta urund nau antu in kujindjik chidingau ku Internet, ku shikol ap kwi ndond yetu ya mudimu, adimbeshina kwikal arund netu mulong wa kutupumbul, in kupumbok amekena mud in yakin, ni antu in rubabek.

Kuseng 26:7, 12; 35:18; 40:9. Tufanyidin kumushiman Yehova mukach mwa antu avud ku yikumangan ya Ukristu.

Kuseng 26:8; 27:4. Ov, tukatining kukumangan ku yikumangan ya Ukristu?

Kuseng 26:11. Padingay ni kulond piur pa mupak wend wa kushinshaman, David walembila kand mulong wa kukolik. Chakin kamu, tukutwish kulam kushinshaman kwetu chikalap nchik kuburen kuwanyin kwetu.

Kuseng 29:10. Kushakam kwa Yehova piur pa “mpwej ya mem,” kurumburikin anch uyikedil kamu ni dikand diend.

Kuseng 30:5. Ngikadil yipandikena ya Yehova yidi rukat—kiudiap ujim

Kuseng 32:9. Yehova kasotilap anch twikala mud kabar, ap mud chimbur ukata kuziyil ching ku rubwambu ra ku kan. Pakwez, usotil anch tutonda kumuziyil mulong tuteshin kurumburik kwa rusot rend.

Kuseng 33:17-19. Kwikil dirijek dia muntu, dikalap nchik dia usu, dikutwisha kulet dipandish. Tufanyidin kumuchingejin Yehova ni ditenchik diend dia Want.

Kuseng 34:10. Antu atekina yisakin ya Want pa ndond ya kusambish mu mwom yau ayukin!

Kuseng 39:1, 2. Pakatay muntu muyimp kukimb jinsangu mulong wa kuyisal ambay netu akaritiy nayimp, tumekeshin manangu ‘kubwik kan ketu’ ni kunenet zong.

Kuseng 40:1, 2. Kumuchingel Yehova kukutwish kutukwash kurishish runeng ni kutuntuk mu “dibuku dia malau mayimp.”

Kuseng 40:5, 12. Chikalap nchik kuvul kwa yishiken ya mar ap kuburen kuwanyin kwetu, yikezap kutupandakan anch tuvuramedinap anch yiyukish yetu ‘yipandiken kwau kuvul nakash.’

“Kuyuk Kwikala Kudi Mwant Nzamb”

Kuseng wa 41 ukasikeshin ni kwongoj mud ik mu mubombu wa kusambish! Ap anch tukat kurish nich yoziu ap anch tumen mar ma kom kijondila, tukutwish kutan usu ni dikasikesh mu chikunku chinech cha Dizu dia Nzamb dia usu ukash. (Hebereu 4:12) Kuseng kwinoku kukwet jinsangu jipanina umutakel wa kuchingejin mu mwom. Chisu ni chisu atuvurishin anch chikalap nchik yikokujol yitukweta, Yehova kakezap kutuvuramen.

Mubombu wa kusambish wa kuseng upwil nich mazu manam anch: “Kuyuk kwikala kudi Mwant Nzamb wa Isarel ku mivu ni minang! Amen, Amen!” (Kuseng 41:13) Kupwa kwa kushinshikin chikunku cha kusambish cha kuseng, ov, katubachikinap kumuyukish, ap anch kumushiman, Yehova?

[Mazu madia kwishin kwa paj]

[Tablo wa jinsangu udia pa paj wa 30]

Anch yitang yakad mwom yikat kumushiman Yehova, ov, mu chilik ik tufanyidina kumushiman Yehova!

[Chipich chidia pa paj wa 31]

David wafunda miminy ya kusambish yivud mu miminy 41

[Chipich chidia pa paj wa 32]

Ov, wij kuseng kumufanikeshina Yehova mud Kafung Mujim?

[Chipich chidia pa paj wa 29]

Kangal wasutish dichuku ap dimwing pakad kushinshikin milong ya muspiritu

Dizu Dirumburila Chipich Chidia pa paj wa 31]

Atutumbu, adia pa paj wa 30, 31 ni wa 32: Courtesy United States Naval Observatory

Dizu Dirumburila Chipich Chidia pa paj wa 29]

Atutumbu: Courtesy United States Naval Observatory