Tulimishany Yikumangan Yetu Yitumbila
“Nikez kakutwalany ku Sion, ku mukandu wam utumbila. Nikez kukwinkishany musangar mu chikumbu cham cha kulembidil.”—ISAY 56:7.
1. Mayingish ik ma Bibil tukweta mitufanyidina kulimishin muchifanyidina yikumangan yetu?
YEHOVA wayikumangejin kal antu end, in Kristu azizidilau many ni ambay nau, mulong wa kumwifukwil ku ‘mukandu wend utumbila.’ Ukat kuyinkish musangar mu ‘chikumbu chend cha kulembidil,’ tempel wend wa mu spiritu, chawiy kamu “chikumbu cha kulembidil cha antu a michid yawonsu.” (Isay 56:7; Mako 11:17) Yasadilay kal Yehova mulong wa kuyikumangej antu end mulong wa kumwifukwil yimekeshin anch difukwil dia Yehova didi ditumbila, ditwishil ni didi piur nakash. Anch twalimish muchifanyidina yikumangan yitukata kusal mulong wa kwilej ni kwifukwil, tukumekesh anch tukwet chitongijok cha Yehova piur pa yom yitumbila.
Yikumangan mu Isarel wa Pasak
2. Yom ik yimekeshina anch Yehova wamananga ndond yatonday mulong wa difukwil diend kwikal yitumbila, ni mutapu ik mwachimekeshay kand Yesu ni yend?
2 Mu Isarel wa pasak, ndond yatonday Yehova mulong wa kumwifukwil adinga ni kuyiman kwikal yitumbila. Dizang ni yawonsu yadingamu ni malong mawonsu afanyina kuyizizil many ni kuyitumbish ‘chakwel yiney yawonsu yeza yikala yitumbila nakash.’ (Kubudik 30:26-29) Tupalakany twawonsu twaad twa mwinkand adinga ni kututazuk anch “Ndond Yitumbila” ni “Ndond Yitumbila Nakash.” (Hebreu 9:2, 3, MM) Dizang eza kudiswinkesh nich tempel mu Yerusalem. Chawiy lel, mulong Yerusalem yikala ndond ya difukwil dia Yehova, adinga ni kuutazuk anch “musumb utumbila.” (Nehemi 11:1; Mateu 27:53) Pa chisu cha mudimu wend panap pansh, Yesu amwinend wadinga ni kulimish nakash tempel. Ndiy wajimana nakash pa kuman antu akat kusadin dibur dia tempel mulong wa midimu yau ya kwisak ni mudi kajil ka rikatu mulong wa kuya mutambu ukwau wa Yerusalem.—Mako 11:15, 16.
3. Yom ik yimekeshina kutumb kwa yikumangan yadingau ni kusal in Isarel?
3 In Isarel adinga ni kukumangan chisu ni chisu mulong wa kumwifukwil Yehova ni mulong wa kutesh kutang kwa Dizu diend. Machuku makwau ma misambu yau adinga ni kumatazuk anch yitentam yitumbila ap yikumangan yijim, mulong wa kumekesh anch yikumangan yiney yidi yom yitumbila. (In Levi 23:2, 3, 36, 37) Ku chikumangan chimwing cha pibur chasalau pa chirung cha Ezra ni Nehemi, in Levi “ading ni kuyirumburil antu Yijil.” Mulong “antu awonsu adinga ni kudil pateshau mazu ma Mukand wa Yijil,” In Levi “ayinenetisha antu awonsu, alond anch: ‘Nenetany! amboku, dichuku dilel ditumbil.’ ” In Isarel asala Musambu wa Ankunku machuku sambwad nich “musangar ujim nakash.” Chikwau kand, ‘adinga ni kutang mu mukand wa yijil ya Nzamb pichuku pichuku, kudiokal pa dichuku dia kusambish djat ni pa dichuku dia nsudiel. Asala musambu machuku sambwad, chad dichuku dia chinan kwading kukumangan kujim, mudi mwading yijil.” (Nehemi 8:7-11, 17, 18) Yisu yiney yading chakin kamu yisu yitumbila yadinga ni kwit kalimish ku mutambu wa in kukumangan.
Yikumangan Yetu Yidi Yitumbila
4, 5. Yom ik ya usey tukata kusal mu yikumangan yetu yimekeshina anch yidi yikumangan yitumbila?
4 Chakin, ilel, Yehova kakwetap ul kanang pa divu, ukweta tempel wa pakampwil washikijau kal mulong wa kumwifukwil. Chikalap nchik mwamu, tufanyidinap kuvuramen anch yikumangan mulong wa kumwifukwil Yehova yidi yikumangan yitumbila. Tupamp tusatu pa rubing, tukat kukumanganang mulong wa kutang ni kwilej Bibil. ‘Atangining’ Dizu dia Yehova, ni mudi pa chirung cha Nehemi, ‘ovakeshining nawamp mazu matanginau.’ (Nehemi 8:8) Yikumangan yetu yawonsu yisambishining ni kupwa nich malembil, ni ku yikumangan yiney yivud, tuwangining miminy ya kumushiman Yehova. (Kuseng 26:12) Yikumangan yetu yiding chakin chikunku cha difukwil dietu ni yitining mwikadil wa kwipan kudi Nzamb ni wa kalimish ku yom yilondinau ku mutambu wetu.
5 Yehova ukat kuyiyukish antu end pakumangenau pamwing mulong wa kumwifukwil, mulong wa kwilej Dizu diend, ni kusanger urund wa Ukristu. Chisu cha kukumangan anch chawanyin, tukutwish kwikal nich kashinsh anch mwinimwa ‘Yehova ukat kutum chiyukish chend.’ (Kuseng 133:1, 3) Tukat kutambulang chiyukish chinech anch twakumangan ni kuta matu mulong wa kulondul program wa mu spiritu. Chikwau kand, Yesu walonda anch: “Kwawonsu kukukumangenau antu aad ap asatu mu dijin diam, kwawiy kunikwikala ni yam mukach mwau.” Kulondwish nich mutapu wa kutesh kwa mazu minam, misambidin amakurump in Kristu akumangena mulong wa kupwish milong yikash pakach pa antu, pakwez misambidin kand yikumangan yetu. (Mateu 18:20) Anch kusutil ku spiritu utumbila, Kristu udi pakach pa in Kristu akumangena pamwing mu dijin diend, ov, chifanyidinap kuman yikumangan mudi yiney anch yidi yitumbila?
6. Yom ik tukutwisha kulond, piur pa ndond yijim ni yikemp tukata kukumangen?
6 Chidi chakin anch Yehova kashichingap mu matempel matunginau kudi antu. Chikalap nchik mwamu, Yot yetu ya Want yidi ndond ya difukwil diakin. (Midimu 7:48; 17:24) Tukat kukumangenamu mulong wa kwilej Dizu dia Yehova, kumulembil, ni kuwang mulong wa kumushiman. Mwamu kand tusadininga ku Yot yetu ya Yitentam. Ndond jijim—mudi dibur, yot yijim-yijim yikatau kusadin antu avud, yiwandj ya ndundu yifutidinau mulong wa yitentam yetu—yikat kwikalang ndond ya kumwifukwil Nzamb pituyisadidina mulong wa yikumangan yetu yitumbila. Yisu mudi yiney ya difukwil, yikala yijim ap yikemp, yifanyidin kamu kalimish ketu, ni chinech chifanyidin kumeken mu mwikadil wetu ni mu mashakamin metu.
Mitapu ya Kumekesh Anch Tulimishin Yikumangan Yetu
7. Mutapu ik tukutwisha kumekesh anch tulimishin yikumangan yetu?
7 Kudi mitapu yimekena tukutwisha kumekesh anch tulimishin yikumangan yetu. Mutapu umwing wa kumekesh anch tulimishin yikumangan yetu udi wa kwikalaku pa chisu chiwanginau miminy ya Want. Miminy yiney yivud, ayifundin mudi malembil ni chifanyidin kamu kuyiwang nich kalimish. Chajimbulay Kuseng 22, kambuy Paul wafunda piur pa Yesu anch: “Nikez kwijikish dijin diey kudi akadivar, nikez kukushiman mukach mwa antu.” (Hebreu 2:12) Chawiy lel, tufanyidin kwikal ni chaku cha kwikal pa ndond yetu kurutu mwin kutakel asambisha kuwangish muminy ni patuwangina tufanyidin kushinshikin kurumburik kwa mazu. El mutapu wetu wa kuwang umekesha yitongijok ya nfund-a-kuseng wafunda anch: “Am nikumujikitish [ Yehova] ni muchim wam wawonsu mu chiyul cha atentamina ni mu kukumangan kujim.” (Kuseng 111:1) Chakin, kuwang miminy ya kumushiman nich Yehova diawiy kamu diyingish dijim dietwetu kushikin kurutu kwa chisu ku yikumangan yetu ni kushakam djat ni kwisudiel.
8. Chilakej ik chidia mu Bibil chimekeshina anch malembil masadiningau ku yikumangan yetu mafanyidin kamu kalimish ketu?
8 Chom chikwau chikata kuwejin usey wa mu spiritu wa yikumangan yetu yawonsu madi malembil ma muchim umwing makatau kusal mulong wa antu awonsu akumangena. Dichuku dimwing, in Kristu a mu mivu chitot ya kusambish mu Yerusalem akumangana pamwing ni “awiy chateshau mwamu azambwisha dizu kudi Nzamb” mu malembil ma muchim umwing. Mudi chibudikin, awiy adandamena—kwikalap nchik kuzengol—‘kulond dizu dia Nzamb wakad wom.’ (Midimu 4:24-31) Ov, tukutwish twatongin anch antu adinga pinipa akat kuzuwol manangu mau chisu chisadinau malembil? Bwat, ‘abombakana pamwing mu malembil.’ Malembil masadiningau ku yikumangan yetu mamekeshining yitongijok yikurukina ya antu awonsu akumangena. Tufanyidin kamu kutongin nich kalimish malembil minam.
9. Mutapu ik tukutwisha kumekesh anch tulimishin yikumangan yitumbila kusutil ku mutapu wetu wa kudjal ni ngikadil yetu?
9 Chikwau kand, tukutwish kumekesh mutapu tulimishina kamu nakash kutumb kwa yikumangan yetu kusutil ku mutapu wetu wa kudjal. Mwikadil wetu wa kalimish mu kudjal ni mutapu wetu wa kukil nswich ukutwish wawejin kamu nakash kalimish ka yikumangan yetu. Kambuy Paul wayulana anch: “Chawiy am nisotil amakundj alembila mu jindond jawonsu, azambulang makas matumbila wakad ujim ni kuchirilijan. Ni chawiy chimwing kand kudi amband, adjala maswin makad kuzut ku mes, kwakad kwimekesh ni kwibaz nich; kangal end akas jinswich ja kurumbidij; kangal adjal or ni usang ni maswin ma usey ukash; pakwez djalangany ni midimu yiwamp mudi muchifanyidina kudi amband itiya ku kuwap kwa Nzamb.” (1 Timoteu 2:8-10) Pitukumangena ku yitentam yijim yisadidinau mu yiwandj yidia kamu ya wash, tukutwish kudjal mu mutapu umwing wambatena nich chirung pakwez wa kalimish. Chikwau kand, kulimish kwetu chisu chinech kukez kutukwash kwipuk kudia ap kusakul bazoka chisu chisadikina yikumangan ni yitentam. Kudjal mutapu uwamp ni ngikadil yiwamp ku yikumangan yetu yikat kumulimishang Yehova Nzamb, difukwil diend, ni ambay netu in kwifukwil.
Ngikadil Yifanyidina mu Chikumbu cha Nzamb
10. Mutapu ik wamekeshay kambuy Paul anch chifanyidin kwikal nich ngikadil yiwamp ku yikumangan yetu ya Ukristu?
10 Mu 1 Korint, mwimbu wa 14, kambuy Paul wapana chiyul cha manangu piur pa mutapu ufanyidinau kusal yikumangan ya Ukristu. Ndiy wapwisha nich kulond anch: “Pakwez yom yawonsu ayisala mu kuwanyin ni mu kufanyin.” (1 Korint 14:40) Yikumangan yetu yidi chikunku cha usey cha mujikit wa chikumangen cha Ukristu, yitin komb mulad kanang wa ngikadil yifanyidina mu chikumbu cha Nzamb.
11, 12. (a) Yom ik yifanyidina kwandjik mu manangu ma an akumangena ku yikumangan yetu? (b) Wisu mutapu uwamp ukutwishau an kulond ya ritiy rau ku yikumangan yetu?
11 Pakampwil, an, chiwapidil kuyifundish mutapu wa kushakam ku yikumangan yetu. Anvaj in Kristu afanyidin kuyirumburil anau anch Chot cha Want ni ndond tukata kusadin Dilejan dia Buku yidiap ndond ya kusengen. Yidi ndond tukata kumwifukwil Yehova ni kwilej Dizu diend. Mwant mwin Manangu Salomon wafunda anch: ‘Babalany pa kwandam mu chikumbu cha Nzamb. Chifanyidin kutesh malejan.’ (Mulej 5:1) Moses wayileja in Isarel kukumangan pamwing, amakurump ni “an.” Ndiy walonda anch: “Yikumangejany antu . . . chakwel niyau atesha, ilej kumwov [ Yehova] Nzamb wen wom chakwel kand alama ni kusadin mazu mawonsu ma yijil yiney. Anau akad kal kuyijik akez kutesh, akwilej kand kumwov [Yehova] Nzamb wen wom.”—Kuvurik Yijil 31:12, 13.
12 Chilik chimwing ilel unou, anetu akat kukumanganang pamwing ni anvajau cha kusambish mulong wa kutesh ni kwilej. Anch kamu ashiken mu chimbu cha kutwish kulondul ni kutesh uyakin wa dishin wa Bibil, an akutwish niyawiy ‘kulond ku kan patok kudi antu’ ya ritiy rau kusutil ku kwakul. (Rome 10:10) Mwan ukutwish wasambish kulond kusu mazu makemp mulong wa kwakul ku chipul chiteshinay. Cha kusambish, ukutwish watang chakul, pakwez mu kusut kwa chisu, ukez kupakish kwakul mu kusadin mazu mend amwinend. Chinech chidi cha ukwash ni cha musangar kudi mwan, ni kulond kwinoku patok ya ritiy rend pakad kumushindil kukat kuyisangarishang amakurump akumangena. Anvaj apanining chilakej pakwilau ayinau. Chiwapin kand anch pichitwishikina anch mwan ni mwan ikala nich Bibil wend, buku wend wa miminy, mukand wilejinau. An afanyidin kwilej kulimish mikand yiney. Yawonsu yiney yikez kwandjik mu manangu ma an kwijik anch yikumangan yetu yidi yitumbila.
13. Yom ik tuchingejina piur pa antu akata kukumangan ku yikumangan yetu kapamp ka kusambish?
13 Chakin, tusotinap anch yikumangan yetu yikala yifanakena ni yifuk ya yikumbu ya nzamb ya Kristendom. Yikumangan yiney yikutwish yikal yakad musangar ni ya rubabek ap kand kwikal ya masok nakash mudi misambu ya antu a pol. Tusotin anch yikumangan yisadikina ku Yot yetu ya Want yikala ya musangar ni yipwitina antu, yifanyidinap kwikal ndond yifanikena ni ndond yikatau kwez antu mulong wa kwipwish usweral. Tukat kukumangan mulong wa kumwifukwil Yehova, chawiy lel yikumangan yetu yifanyidin chisu chawonsu kumekesh kalimish. Rusot retu ridi anch kupwa kwa kutesh malejan mafundishinau ni kupwa kwa kushinshikin ngikadil yetu ni ya anetu, antu akumangena kapamp kau ka kusambish akez kulond anch: “Chakin, Nzamb udi pakach pen.”—1 Korint 14:25.
Kudandamen kwa Difukwil Dietu
14, 15. (a) Ov, mutapu ik tukutwisha kwipuk ‘kudiwul chikumbu cha Nzamb wetu’? (b) Mutapu ik wawanyina Isay 66:23?
14 Mudi mutapu twasambelang kwilej anch, Yehova ukat kuyikumangej antu end ni kuyinkish musangar mu ‘chikumbu chend cha kulembidil,’ tempel wend wa mu spiritu. (Isay 56:7) Ikundj ushinshamena Nehemi wayivurisha ambay nend in Yuda anch afanyidin kulimish muchifanyidina tempel wadinga umekena kusutil ku kupan ukwash wa ku mujimbu. Ndiy walonda anch: ‘Tufanyidinap kudiwul chikumbu cha Nzamb wetu.’ (Nehemi 10:39) Chawiy lel, tufanyidinap kudiwul diladikij dia Yehova dia kumwifukwil mu ‘chikumbu chend cha kulembidil.’
15 Chamekeshay kuswir kwa kukumanganang pamwing chisu ni chisu mulong wa kwifukwil, Isay wabwaka anch: “ ‘Pa misambu yawonsu ya Kwarik kwa Ngond ni Dichuku dia Kwiswedish, antu a michid yawonsu akez kez mu Yerusalem kwingifukwil.’ Mwamu mulondilay [ Yehova].” (Isay 66:23) Yawiy yisadikina ilel unou. Chisu ni chisu, rubing ni rubing ra ngond ni ngond, in Kristu ipanina akat kukumanganang mulong wa kumwifukwil Yehova. Asadining mwamu, pakatau kukumangan ni kusal mudimu wa kulejan. Ov, udi umwing wa antu ‘akata kwez chisu ni chisu mulong wa kumwifukwil Yehova’?
16. Mulong wak kukumangan pakad kujing kufanyidin kudandamen mu mwom wetu?
16 Isay 66:23 ukez kuwanyin kamu ku mwom wa mu mangand masu makaninay Yehova. Pa chisu chinicha, “antu a michid yawonsu,” mu mutapu win kamu wa kashinsh, rubing ni rubing, ngond ni ngond, ‘akez kwas manungin pansh,’ ap kumwifukwil Yehova chikupu. Mulong kukumangan pamwing chakwel kumwifukwil Yehova kukez kudandamen mu mwom wetu wa mu spiritu mu ditenchik disu dia yom, ov, tufanyidinap komb kusal anch kukumangan ku yikumangan yetu yitumbila pakad kujing kudandamena mu mwom wetu katat?
17. Mulong wak tuswiridina yikumangan ‘chipandakenamu mudi [etu] chitwija anch dichuku dikat kusej piswimp’?
17 Nsudiel chiyishejidina piswimp, tufanyidin kujijaman mu kukumangan ku yikumangan yetu ya Ukristu mulong wa kwifukwil. Mulong wa kulimish kutumb kwa yikumangan yetu, tukatap kushil mudimu wa ku mujimbu, midimu tukweta ku shikol, ap kwilej shikol urel chakwel yitukangesha kukumangan chisu chawonsu pamwing ni ambay netu akaritiy. Tuswiridin ukash ukata kudiokal ku kubombakan kwinoku. Yikumangan ya chikumangen chetu yitwinkining mutapu wa kwijikijan nau akadivar, mutapu wa kukasikeshijan ni kulangwishijan muntu ni muntu ku “rukat ni midimu yiwamp.” Tufanyidin kusal mwamu ‘chipandikenamu mudi etu chitwija anch dichuku dikat kusej piswimp.’ (Hebreu 10:24, 25) Chawiy lel, tumekeshany pichuku-pichuku kalimish kafanyidina mulong wa yikumangan yetu yitumbila kusutil ku kukumangan pakad kujing, kudjal nawamp, ni ngikadil yiwamp. Anch tukat kusal mwamu, tukat kumekesh anch tukwet yitongijok ya Yehova piur pa yom yitumbila.
Dichirikin
• Yom ik yimekeshina anch Yehova umening yikumangan ya antu end mulong wa kumwifukwil anch yidi yitumbila?
• Yom ik yikata kusadik ku yikumangan yetu yimekeshina anch yidi yitumbila?
• Mutapu ik ukutwishau an kumekesh anch alimishin kutumb kwa yikumangan yetu?
• Mulong wak tufanyidina kusal anch kukumangan pakad kujing kwikal chom chidandamedina mu mwom wetu?
[Chipich chidia pa paj wa 28]
Yikumangan mulong wa kumwifukwil Yehova yidi yikumangan yitumbila yikalap nchik ndond yiyisadidinau
[Chipich chidia pa paj wa 31]
Anetu akat kukumanganang mulong wa kutesh ni kwilej