Kudi In Kutang

TUKWET musangar wa kukwijikish anch kusambish nich nimero winou, kukwikal yikarumun kanang mu mutapu udinga Chinong cha Kalam. Kurutu tukurumburila kushalijan kukwikalaku, el tukuleja yom yikushala chilik chimwing.

Dijin dia gazet winou, Chinong cha Kalam Chilejen Want wa Yehova, dikuswimpap. Chawiy lel, Chinong cha Kalam chikudandamen kumushiman Yehova mudi Nzamb wakin ni kuyongoj in kuchitang nich rusangu ruwamp ra Want. Mitu yikwikala pa paj wa 5 djat ku wa 9 mu nimero winou yirumburil chiudia Want winou ni chisu chiukeza kwez. Chikwau, Chinong cha Kalam chikudandamen kukasikesh ritiy ra in kuchitang mudiay Yesu Kristu, kukasikeshin uyakin wa Bibil, ni kulejan chirumburikina yinship yisadikina mu mangand mu kukwatijan nich chitokish cha uprofet wa Bibil, mudi muchikata kusal mu makum ma mivu yawonsu ey.

Chad kushalijan kukwikal pisu? El turumburil yom yimwing yisu yisangareshina yikwikala mu dichap dia 1 dia ngond ni ngond.a

Mitu yilangwishina yitongijok yikusambish kubudikin ngond ni ngond. Mutu “Ov, Wij?” ukez kwisambin jinsangu ja pa mufulandal jisangareshina jiletina chitokish pa chirumburikina jinsangu ja Bibil jitondinau. Mutu “Mushejina Nzamb Piswimp” ukez kukasikeshin yitukutwisha kwilej piur pa Yehova kusutil ku jinsangu jijikena ja Bibil. Mutu “Yipul ya in Kutang” ukwisambin yakul ku yipul yipwilingau piur pa Bibil. Chilakej, antu akutwish iyipula anch “Ov, Want wa Nzamb udi mu muchim wey?” Ukutan chakul pa paj wa 13.

Kudi mitu yivud kushalijan yitenchikinau mulong wa kukwash majuku. Mutu “Musul wa Musangar wa Dijuku,” ukeza kubudikin tupamp tunying pa muvu, ukez kwisambin jinsangu jakin ja yikokujol ya dijuku ni kulejan mutapu ukutwisha yijil ya Bibil kukukwash kupwish yikokujol yiney. “Yileja Aney,” udi mutu ukutangau anvaj pamwing ni anau, ukez kubudikin ngond ni ngond. Pamwing ni mutu “Malejan Kudi Ansand Etu,” ukurumburil mutapu ukutwishay nsand kwilej Bibil.

Mitu yikwau yikemp yikusambish kubudikin tupamp tunying pa muvu. Mutu “Imburijany Ritiy Rau” ukez kutukasikesh kulondul chilakej cha muntu umwing wisambidinau mu Bibil. Chilakej, pa paj wa 18 djat ku wa 21 wa nimero winou, ukutang rusangu rimwing riwamp piur pa profet Eliya ni ukwilej mutapu tukutwisha kwimburij ritiy rend. Mutu “Mukand Udiokila Kudi . . .” ukwisambin rapor wa muntu wa kusambish mu amishoner ni akwau adia mu yikunku kushalijan ya mangand. Mutu “Yitwilejena . . . Kusutil Kudiay Yesu” ukwisambin malejan ma pa dishin ma Bibil mu mutapu uswapela.

Tuchingejin anch Chinong cha Kalam chikudandamen kuyisangaresh in kuchitang alimishina Bibil ni asotila kwijik yom yilejena chakin kamu buku winou. Ruchingej retu ridi anch gazet winou akukwasha kupwish impu yey ya uyakin wa Bibil.

IN KUPALANGESH

[Mazu madia kwishin kwa paj]