Kwit Kwitinau mu MANGAND MAWONSU

TONGIN yitot ya mamiliyon, ap mamiliyar, ma antu, awonsu itin chom chimwing kusu. Awonsu itin winyikel wa piur mu mangand chakwel uwanyisha chom kanang chitinau. Pakwez, ching antu akemp kusu pakach pau awiy ija chom chin chitinau. Ov, chom chinech chikutwish chakina kamu kusadik? Chakin kamu, chikat kusadik dichuku ni dichuku. Chom ik chitinau antu inay awonsu? Anch Want wa Nzamb weza!

Kukwatijan nich kupampish kumwing, kudi piswimp marelijon 37 000 mitazukininga anch ma Ukristu, mafila mukan anch Yesu Kristu udi Nyikel wau. Kudi piswimp mabiliyon maad ma antu akweta yitiyij yiney. Avud au akat kulembil chitazukinau anch Malembil ma Tatukwetu ap anch ma Nsalejetu. Ov, umij malembil minam? Mudi kamu mwamelejanay Yesu kudi in kwilej end, masambishining anch: “Tatukwetu udia mwiur, Dijin diey aditumbish. Want wey weza. Rukat rey arusala pansh mudi mwiur.”—Mateu 6:9, 10.

Katat pa kusut kwa yitot ya mivu, in kwifukwil achirikidin mazu minam mu maegliz. Akat kumachirikin kand mu yisak ya majuku ni kudi muntu ni muntu ipend, mu yisu yiwamp ni yiyimp. Amalonda mazu minam nich michim yitok, nich yovil yikash. Antu akwau avud amileja kal amalam mu mutu ni akat kumalond pakad ap kutongijokin chimarumburikina chakin kamu. Yid yiney ya Kristendom kiyidiap ayinay yachingejina ni yilembidila chakwel Want wa Nzamb weza.

Kwit Kwitinau ni Marelijon Makad Kwikal ma Ukristu

Malembil mamwing mijikena nakash ma ritiy ra Ayuda madi malembil makatau kulembil pafilingay mukatish nau. Ap anch chakin kamu kimisambidinap nakash ya rufu ap runeng, akat kumalembilang chisu chivud pa chisu cha runeng ra rufu ra mukatish. Malembil malondil anch: “El, [Nzamb] atenchik Want wend mu mwom wey . . . ap mau-mau.”a Malembil makwau makur ma mu sinagog misambidin ruchingej ra Want wa Mesia wa mu dijuku dia David.

Marelijon makwau makad kwikal ma Ukristu mamen anch chitongijok cha Want wa Nzamb chisangareshin nakash. Kukwatijan nich The Times of India, ntakel umwing mujim wa relijon wadingaku mu chitot cha 19, wadinga usangaredina mu kusot kutan yom yimwing-yimwing mu ritiy ra Hindu, ra Mizilima, ni ra Ukristu, walonda anch: “Want wakin wa Nzamb kiukezap kwez pakad in kwingangel ni in kurang kwikal mu uumwing.” Ni ntakel mujim wa shikol ya amizilima yidia mu ul wa Strathfiel, mu Australie, wafundin katat kamu ak mu jurnal anch: “Mudi Amizilima awonsu, nitiyijin anch Yesu ukuchirik ni ukutenchik Want wa Nzamb.”

Pakad chinshilend, antu achingejina ilel ni itina Want wa Nzamb ikadil kal tutikit ni tutikit twa mamiliyon. Pakwez tushinshikinany chom chimwing chisangareshina.

Pamwing wij nawamp win kamu anch etu Atuman a Yehova, apalangeshina gazet winou, tukat kuyang ku chikumbu ni ku chikumbu mu teritwar mu ushichinga mulong wa kwisamb ni antu piur pa Bibil. Mudi mulejenau ap, tuusadil mudimu winou mu mangand mawonsu, mu jingand 236 ni mu jindim 400 ni kusut. Mutu ujim wa malejan metu udi Want wa Nzamb. Chakin kamu, shinshikin anch mutu wawonsu wa gazet winou udi Chinong cha Kalam Chilejen Want wa Yehova. Tuyipwiling chisu ni chisu antu anch akat kulembilang mulong wa Want winou. Antu avud itiyijining anch inge. Pakwez, pa kuyipul anch Want winou chom ik, chakin kamu, antu avud akwiling anch “Nijap kwamu,” ap yakul yau yovikeningap kurumburik ni kijingap cha kulond.

Ov, mulong wak antu avud mwamu itining chom chakadau kwijik? Ov, chidi mulong Want wa Nzamb udi ukash, chitongijok chakad kwovikan? Bwat. Want uwanyidin ni aurumburil nawamp mu Bibil. Chikwau kand, uruu wa Bibil piur pa Want ukutwish kukwinkish ruchingej rakin mu yisu yiney ya kanvundangesh. Mu mutu ulondwila ou, tukuman mutapu urumburilay Bibil ruchingej riner. Kupwa tukez kutal chisu chikeza kuwanyin malembil ma Yesu mulong wa kwez kwa Want.

[Mazu madia kwishin kwa paj]