Want Wa Nzamb Chom ik?

WISU wadinga mutu wa mulong wa malejan ma Yesu? Kukwatijan ni Yesu amwinend, mutu mulong wadinga Want wa Nzamb. (Luka 4:43) Pamuteshau antu, chakin kamu amutesha chisambidinay tupamp tuvud Want winou. Ov, ayivundangesha manangu mu chilik cha kulik kutesh kurumburik kwa yilondilay? Ov, amwipula anch Want winou chom ik? Bwat. Mu Rusangu Ruwamp mwikil yipul mudi yiney. Ov, antu inay adinga ij kal ya Want wa Nzamb?

Uyakin udi anch, Mifund ya pasak yadingau in Yuda ni kulimish mudi yitumbila yaurumburila Want winou, yawisambina mu mutapu uwamp chiudia ni yiukeza kusal. Ilel, tukutwish kwilej yivud nakash piur pa Want mudi mwasalau in Yuda—kusutil ku kusadil Bibil. El tushinshikinany uyakin sambwad utulejinay Bibil piur pa Want. In Yuda a pasak a pa chirung cha Yesu adinga ij kal uyakin usatu. Uyakin ukwau usatu Kristu ndiy waulejana ap kusutil kudi atwimbuy end mu chitot cha kusambish. Wansudiel wezin kwijikan patok mu chirung chetu chinech.

1. Want wa Nzamb udi winyikel wakin, ukeza kushakam chikupu. Uprofet wa kusambish wa Bibil walejana anch Nzamb ukez kuyitumin antu ashinshamena mwin kuyipandish. Muntu winou amutazuka anch “mbut,” ukez kupwish yikokujol yasambisha nich wintombuj wa Adam, Eve, ni Satan. (Disambishil 3:15) Kupwa kurutu, Mwant David walonda chom chimwing chamushena piur pa “mbut” yiney, ap anch Mesia. Ukeza kuyikel mu Want winou. Winyikel winou ukez kikal ushalijadina ni mawinyikel makwau. Ukez kushakam chikupu.—2 Samwel 7:12-14.

2. Want wa Nzamb ukez kunongish winyikel wawonsu wa antu. Profet Daniel wamana chishimushimu mwamanay kuswinkanijan kwa mausu ma winyikel wa mangand, kudiosh pakur djat ni mu chirung chetu. Shinshikin chom chijim chamanay mu chishimushimu chinech: “Pa chisu cha in kutakel [ansudiel a chiuntu] inay, Nzamb wa mwiur ukez kukasikesh want ukwau wakad kwez kwikal nich disudiel chikupu. Kakez kuukwatap want winou pakwez ukez kushesh mant makwau mawonsu, chad wawiy ukez kushakam chikupu.” Chawiy mant mawonsu, ap mawinyikel mawonsu, ma mangand minam—pamwing ni jinjit jau, chisum chau, ni kwijond kwau—akez kuyinongish shitit rawonsu. Mudi muulejena uprofet wa Daniel, Want wa Nzamb ukuyikel piswimp ap kamu pa mangand mawonsu. (Daniel 2:44, 45) Uyakin wa kashinsh, ukez kushal winyikel umwing kusu usadila.a

3. Want wa Nzamb ukez kupwish jinjit, mayej, kamungun, ni rufu rin. Uprofet umwing wa Bibil usangareshina ulejena chiukeza Want wa Nzamb kusal panap pansh. Winyikel winou ukez kusal yom yakad kal yitenchik ya mangand kusal ap yakad kutwishik kusal mu machuku ma kurutu. Tongin bil—kumashesh chikupu mat mawonsu ma njit! “Ndiy ukat kukatwish njit ni kwisudiel ya mangand.” (Kuseng 46:9) Kukezap kand kwikal adokiter, marupital, ap mayej min mawonsu. “Kwikil muntu ap kusu umwing ushicha mwi ngand yetu ukeza kinan kand mulong wa kuyel.” (Isay 33:24) Kwikil tumungun, kuburen kwa yakudia, kudia kuyimp, ap chipupu cha nzal. “Kukwikal mbut jivud mwi ngand.” (Kuseng 72:16) Kwikil kand yidil, ntand, jinzay, yikumbu ya kulamin afu, ap mar madingaku pa yisu yiney. Rufu, mukankuny netu mukash, akez kumunongish shitit kwinsudiel. Nzamb “ukez kadiosh rufu chikupu. Nsalejetu [Yehova] ukez kakuswol mansoj ku mes ma antu awonsu.”—Isay 25:8.

4. Want wa Nzamb ukwet nyikel watondau kudi Nzamb. Mesia kitondap amwinend, ap kamutondap kudi antu akad kuwanyin. Yehova Nzamb amwinend ndiy wamutonda. Majin min kwau Mesia ni Kristu malejen anch amutonda kudi Nzamb. Majin minam mawonsu maad marumburikin anch “Uzizidilau Many.” Komb Mwant winou amuzizidila many, ap anch amutonda mulong wa ndond yend ya pakampwil, kudi Yehova. Nzamb umwisambidin anch: “Mwinou ndiy kashalapol wam unikasikeshina. Ndiy umwing unatonda, unikata kusanger. Namwizwishil kal nich mwiku wam, ndiy ukez kalet dirumburish ditentamina ku michin yawonsu.” (Isaiah 42:1; Mateu 12:17, 18) Ov, nany wija nawamp kumupandakanamu Sakatang wetu mulad wa Nyikel utuswiridina?

5. Nyikel wa Want wa Nzamb wamekesha kufanyin kwend kurutu kwa antu awonsu. Yesu wa ku Nazaret wimekesha kwikal Mesia wasambelau kwisambin. Wavadikina mu dijuku diatonday Nzamb. (Disambishil 22:18; 1 Jinsangu 17:11; Mateu 1:1) Padingay pansh, wawanyisha mauprofet mavud madinga misambidina Mesia mafundau yitot ya mivu kurutu. Amujingunina kand mudi Mesia udiokila mwiur. Mutapu ik? Inge, Nzamb walondila mwiur, wamwijikisha mudi Mwanend Kapokal; angel amujingunisha Yesu mudi Mesia wasambela kwisambin; ni Yesu wasala yilay—chisu chivud chadinga kurutu kwa yitot ni ap tunan twa antu imena ni mes mau—yamekena patok anch chadinga kusutil ku usu wa Nzamb.b Yesu wamekesha chisu ni chisu anch ukez kwikal Nyikel wa mutapu ik. Kadingap kusu nich usu wa kuyikwash nich antu pakwez wadinga kand usotil kuyikwash. (Mateu 8:1-3) Kadingap ni choy, wading mwin riy, ukapukina, ni wikepishila. Rusangu ra mwom wend padingay pansh ridi mu Bibil chakwel antu awonsu aritanga.

6. Mu Want wa Nzamb mudi antu 144000 akuyikela pamwing ni Kristu. Yesu walonda anch antu akwau, pamwing ni atwimbuy end, akez kuyikel pamwing nend. Yesu wachitazuka chisak chinech anch “kachisak kakemp ka amikoku.” (Luka 12:32) Kwinyim, kambuy Yohan amuleja anch kachisak kinak kakemp kakez kikal ka antu 144000. Akez kwikal nich mudimu umwing usangareshina mwiur, akuyikel mudi ant ni akusadil mudi in kupesh pamwing ni Kristu.—Kuburik 5:9, 10; 14:1, 3.

7. Want wa Nzamb uyikedil katat, udi tayad kuyikel divu diawonsu. Uyakin winou wa nsudiel udi umwing wa yom yisangareshina yitukutwisha kwilej. Bibil utwinkishin uman wakin ulejena anch Yesu amwinkisha kal ulabu wend mudi Mwant mwiur. Kwawiy kuyikedilay katat, pa chisu chetu chinech, ni piswimpap kamu ukushikij winyikel wend pa divu diawonsu ni ukuwanyish mauprofet mawamp mitwajimbula kal kwiur oku. Pakwez mutapu ik lel tukutwisha kwikal nich kashinsh anch Want wa Nzamb uyikedil katat? Ni chisu ik ukusambisha kuyikel pa divu diawonsu?

[Mazu madia kwishin kwa paj]