Want wa Nzamb Ukez Kwez Chisu Ik?
“NSALEJETU, chisu chinech chawiy chiusotila kuyichirishin in Isarel want wau?” (Midimu 1:6, Manswik Masu) Atwimbuy adinga nich impu ya kusot kwijik chisu chikezay kutenchik Want wend. Ilel, pasutil kal mivu 2 000, antu achidi ni katat nich impu ya kwijik: Chisu ik chiukweza Want wa Nzamb?
Mulong Yesu wasala Want wikal mutu wa mulong wa malejan mend, ufanyidin kutong anch ndiy wisambina mulong winou. Ni chakin kamu mwamu mwasalay! Wisambina patok piur pa chirung cha chisu cha pakampwil chitazukinau anch “kwez” kwend. (Mateu 24:37) Kwez kwinoku kukwatijadin nakash nich kudishiwu kwa Want wa Mesia. Kwez kwinoku chom ik? El tushinshikinany uyakin unying ujingininay Bibil piur pa kwez kwa Kristu.
1. Kwez kwa Kristu kukez kusambish chisu chilemp kwinyim kwa rufu rend. Yesu waleta chilakej chimwing mwifanikeshay amwinend ni ikundj umwing “waya kwi ndond yilemp ni [kwitambwil] want.” (Luka 19:12) Chilakej chinech cha uprofet chawanyina nchik? Mwawiy, Yesu wafa ni amusangula; kupwa waya “kwi ngand yilemp,” yawiy, ya mwiur. Mudi mwalonday Yesu mu chilakej chimwing chifanikena nich, kuchirik kwend nich usu wa want kukez kwikal ching “kwinyim kwa chisu chilemp.”—Mateu 25:19.
Kwinyim kwa mivu kanang Yesu waya mwiur, kambuy Paul wafunda anch: “Kristu chapeshay yakupesh ya yitil, wapesha kamu chikupu, washakam ku chikas cha katatuku cha Nzamb; kwawiy kukat kuchingilay ni pakuyitekau akankuny nend kwikal chipwan cha kwazuk mend yend.” (Hebreu 10:12, 13) Chawiy, chamwita Yesu achingel chirung chilemp pashikay mwiur. Kupwa chirung cha kuchingel chapwa pa chisu Yehova Nzamb wamudisha Mwanend kwikal Mwant wa Want wa Umesia washilayimu kudiosh palemp. Wawiy mutapu wasambisha kwez kwa Kristu. Ov, antu adia pansh ela kuman chinship chinech chijim?
2. Kwez kumekenap ku mes ma antu. Vurikany, Yesu wisambina chijingidij cha kwez kwend. (Mateu 24:3) Anch kwez kwend kwela kumekan ku mes kwa antu, ov, chela kuswiriken kwikalaku kwa chijingidij? Chilakej: Tong bil anch uyil ukaman karung-a-mem. Ukutwish waman yijingidij ya njil yikulejina njil ya kuya, pakwez anch washik ku chikum, udi pashikedina mem nich kutand kujim kwa mem mayila kulemp mudi makwatijadin ni maur, ov, ukusot kand kuman yijingidin mudi nsey ya chiyel chikulejina njil mwa kuya, pafundilau anch “Karung-a-mem”? Bwat kwau! Ov, mulong wak ukeza kuswir chijingidin chikukuleja chom chiumena ni mes mey?
Yesu warumburila chijingidij cha kwez kwend, kichadingap mulong wa kulejan anch antu akutwish kuman ni mes mau, pakwez kuyikwash kujinginin chom chikusadika mwiur. Chawiy, Yesu walond anch: “Want wa Nzamb kiukwezangip aumen.” (Luka 17:20) Ov, mutapu ik lel, chijingidin chikutwish kuyilej in adia pa divu anch kwez kwa Kristu kwasambishin kal?
3. Kwez kwa Yesu kukez kwikal kwa chisu cha kanvundangesh kajim panap pansh. Yesu walonda anch kwez kwend mudi Mwant mwiur kukez kwikal nich chirung cha jinjit, tumungun, kuzal kwa divu, yipupu ya mayej, ni kujiril yijil. (Mateu 24:7-12; Luka 21:10, 11) Chom ik chikeza kusarumun mar minam mawonsu? Bibil urumburil anch Satan, “mwant wa mangand minam,” wizulijadin nich ujim mulong ndiy wij anch chisu chend chidi chiswimp nakash katat mulong kwez kwa Kristu mudi Mwant kwasambishin kal. (Yohan 12:31; Kuburik 12:9, 12) Yom yiney yimekeshina patok ujim wa Satan ni kwez kwa Kristu yikadil kal yivud mu chisu chetu chinech. Pakampwil kudiosh mu muvu wa 1914, muvu witiyijiningau in kwilej jinsangu ja pakur anch muvu wa kukarumuk, mulong uman winou wading kandikal umekanangap mu chilik chimwing chijim nakash mu mangand mawonsu.
Yom yiney yawonsu yikutwish kwovikan mudi uruu uyimp, pakwez kiudiap uyimp. Urumburikin anch Want wa Umesia uyikedil katat mwiur. Piswimp ap kamu, want wa Umesia winou ukez kuyikel panap pa divu. Mutapu ik lel, ukushikenau antu ku kwijik ya want winou chakwel itiyij winyikel wau ni ikal antu akwikal mwinshin mwa winyikel winou?
4. Kwez kwa Yesu kumekedin kusutil ku mudimu wa kulejan pa mangand mawonsu. Yesu walonda anch kwez kwend kukez kwikal mudi “muchadinga pa machuku ma Noa.”a (Mateu 24:37-39) Noa kadingap kusu ntung a wat; pakwez wadinga kand “mulej wa kutentam.” (2 Pita 2:5) Noa wayibabesha antu anch Nzamb wadinga piswimp ni kuyirumburish. Yesu walonda anch in kwilej end adia pa divu akez niyawiy kuyibabesh antu pa chirung cha kwez kwend. Wasambela kulond anch: “Ni katumb kawamp ka want akez kukalejan ku mangand mawonsu, kakez kikal uman kudi michid yawonsu; chawiy lel disudiel chidikweza.”—Mateu 24:14.
Mudi mutwamananga mu mutu wasambelang ou, Want wa Nzamb ukez kushesh mawinyikel minam mawonsu ma mangand minam. Mudimu wa kulejan uyibabeshin antu anch winyikel winou wa mwiur udi piswimp ni kusal, nich kuyinkish antu in awonsu mutapu wa kupand ku disheshik diezinaku chakwel ikal antu akuyikelau mu Want. Chipul chijin chidi chinech, Ukez kusal nchik?
Ov, Want wa Nzamb Ukwikal Rusangu Ruwamp Kudi Ey
Uruu walejanay Yesu wadinga uruu umwing ukweta ruchingej rakad cha kwilikan nich. Pasuta mivu yivud kwinyim kwa wintombuj mu Eden, Yehova Nzamb watenchika winyikel ukeza kwonan yom, kuyichirish antu ashinshamena ku mwikadil wadingay nich Nzamb mu manangu mulong wau kudiosh kwisambishil—mwom wa chikupu mu paradis panap pa divu. Chom ik chikutwisha kwikal chisangareshina nakash kupandakanamu kwijik anch winyikel winou washilaumu pasutil kal mivu yivud uyikedil katat mwiur? Kiudiap chitongijok cha chamwamu, chakad kwovikan pakwez uyakin win kamu!
Katat, Mwant watanday Nzamb uyikedil mukach mwa akankuny nend. (Kuseng 110:2) Mu mangand minam mijondila, mashadikina kudiokal kudi Nzamb, Mesia uwanyishin rusot ra Tatukwend ra kuyikimb antu in awonsu asotina kumwijik Nzamb chidiay chakin kamu ni amwifukwila ndiy ku “ukash wa [mwiku] wend, ni mu uyakin.” (Yohan 4:24, MM) Ruchingej ra kushakam chikupu mu winyikel wa Want wa Nzamb ridi kurutu kwa michid yawonsu, reng rawonsu, ni antu a mikadil yin yawonsu. (Midimu 10:34, 35) Tukukasikeshin kwitiy yisu yiwamp yimekena kurutu kwey. Ileja katat piur pa Want wa Nzamb, chakwel utwisha kusanger kushakam mwishin mwa winyikel utentamina chikupu!—1 Yohan 2:17.
[Mazu madia kwishin kwa paj]
a Mazu ma Yesu makwashin kutenchik yitongijok yiyimp yapanau mu mutapu wakarumunau nayimp muyikarumun yimwing ya Bibil dizu “kwez.” Yikarumun yimwing yakarumana “kwez,” “kushik,” ap “kuchirik,” mazu minam mawonsu maletin chitong cha chinship cha chisu kanang. Ap mwamu shinshikin anch, Yesu kafanikeshap kwez nich Mabeb pa dichuku dia Noa, chinship chasadika pa chisu kanang, pakwez “machuku ma Noa,” chirung chikash cha chisu. Mudi pa chisu chinicha cha pasak, kwez kwa Kristu kufanyidin kwikal chirung cha chisu mukwikalau antu akwatiken nakash nich milong ya pa dichuku ni dichuku ya mwom mu chilik cha kulik kutesh dibabesh diyibabeshinau.
[Picture on page 8]
Jinsangu jiyimp jituteshina dichuku ni dichuku jilejen anch yom yiwamp yidi piswimp
[Picture on page 8]
Antiaircraft gun: U.S. Army photo