Ov, Uyimen Akwen Mudi Muyimenay Yehova?
“Kukwikalap kwaurok mu mujimbu . . . yid ya mitapu yawonsu yikez kulamijan chimwing ni chikwau.”—1 KOR. 12:25, MM.
1. Mutapu ik wiyova paweza kapamp kakusambish mu paradis wa muspiritu?
PITWADIOKALA mu mangand mayimp ni twasambisha kwinung pamwing ni antu a Yehova, twasangara kamu pa kuman rukat rudimukina ni kulamijan kudinga pakach pau. Kushalijan mudi ik nich chisum, rukuny, ni kura kudia pakach pa antu atakedilau kudi Satan! Tweza kwandam mu paradis wa muspiritu, mwizwila chisambu ni uumwing.—Isa. 48:17, 18; 60:18; 65:25.
2. (a) Chom ik chikutwisha kukwat chitongijok chetu piur pa akwetu? (b) Chom ik tukuswiridina kusal?
2 Pakwez, pa kusut kwa chisu, mulong wa kuburen kwetu kuwanyin tukutwish pamwing ap kusambish kuyital akadivar netu nich yitongijok yakad kuwanyin. Kuburen kwetu kuwanyin kukutwish kutusal tusambish kujimbish nakash kurumbuk kwa akadivar netu pa ndond pa kukimb ngikadil yau yiwamp ya muspiritu yikwetau. Mu kulond kuswapela, tukuvuramen kuyiman mudi muyimenay Yehova. Anch chom chinech chatushiken, chawiy chisu chitufanyidina kushinshikin yitongijok yetu ni kusot kuyambatanish nich chitongijok cha nzwang cha Yehova.—Kub. 33:13.
Mutapu Uyimeningay Yehova Akadivar Netu
3. Bibil ufanikeshin chikumangen cha Ukristu nich ik?
3 Mudi muchifundilau mu 1 Korint 12:2-26, MM, kambuy Paul wafanikesha chikumangen cha in Kristu azizidilau many nich mujimbu ukweta “yid yivud.” Mudi yid ya mujimbu yishalijadin chimwing ni chikwau, yid ya chikumangen yishalijadin nakash pantaliken nich ngikadil ni ukaliweny wa chimwing ni chikwau. Pakwez, Yehova witiyijin kushalijan kwinoku. Uchikatin ni uchisangaredin chid ni chid. Chawiy kand, Paul utuyudil anch yid ya chikumangen yifanyidin “kulamijan chimwing ni chikwau.” Chom chinech chikutwish kwikal chikash mulong ngikadil ya antu akwau yikutwish kushalijan nich yetwetu.
4. Ov, mulong wak tuswiridin kutenchik yitongijok yetu piur pa akadivar netu?
4 Tukutwish pamwingap kutal ching kusu pa kurumbuk kwa akadivar. Anch twasal mwamu, chakin kamu, tusadidin chintadil chasidina ching pa ndond yimwing kusu. Pakwez, Yehova uyimen akadivar netu nich yitandil yijim, mukutwishay kumeken muntu pamwing ni yawonsu yimwombilamu. Tukutwish kwikal nich chaku cha kutadil ching kusu pa chisal chitukisina, pakwez Yehova ndiy umumen muntu mawonsu wa kabuj, pamwing ni ngikadil yawonsu yiwamp ya muntu. Anch twasal usu wa kumufanikan Yehova, chawiy kand tukutwisha kuvuvurish spiritu wa rukat ni uumwing mu chikumangen.—Efes 4:1-3; 5:1, 2.
5. Ov, mulong wak kichifanyidinap kuyirumburishang antu akwau?
5 Yesu wadinga wij nawamp anch chisu ni chisu antu akayitil akweting chibachikin cha kuyirumburish akwau. Ndiy wayiyula anch: “Kangal warumburishany, chakwel ni yen ez anirumburish.” (Mat. 7:1) Shinshikin anch mu rudim ra kusambish Yesu kalondap anch: “Kangal warumburishany”; pakwez ndiy walonda anch: ‘Likany kurumburishang.’ Yesu wadinga wij anch antu avud pakach pa in kumutesh adinga antu adinga nich chaku cha kuyinyinyit akwau. Ov, chitwishikin anch niyetu twakudisha kal chaku chinech? Anch tukwet chaku chinech, tufanyidin kusal usu nakash tuswimpa, chakwel niyetu kangal ez aturumburish. Chakin kamu, ov, tudi anany chakwel tumurumburish muntu usadidilay Yehova mu mudimu kanang ap kulond anch kafanyidinap kwikal chid cha chikumangen? Mukadivar ukutwish wikal nich ulim kanang, pakwez anch Yehova udandamedin kumwitiyij, ov, chikwikal chifanyidina ku mutambu wetu kumulik? (Yoh. 6:44) Ov, chakin kamu twitiyijin anch Yehova ndiy amwinend uyitakedila antwend ni anch chiswiridin kutenchik yom kanang, ndiy amwinend ukeza kuyisal pa muten wau?—Tang Rome 14:1-4.
6. Yehova umening nchik atushalapol end?
6 Chom chimwing piur pa Yehova chishimokishina chidi anch ndiy ukutwish kumuman mwin Kristu umwing ni umwing mudi ukweta ukaliweny wa kushiken ku kuwanyin mu mangand masu. Ndiy wij kand usu wasalau mulong wa kukul muspiritu. Chawiy lel, kakwetap diyingish dia kwimanyin ching kusu pa kuziy kwa mujimbu. Tutangin mu Kuseng 103:12 anch: “Mudi kwingangel chi kudia kulemp ni kurand, chawiy chashemuninau kal kubwambul kwetu.” Mu chilik ik tufanyidina kujikitish pa mulong winou!—Kus. 130:3.
7. Chom ik twilejidina pa mutapu wamumanau David kudiay Yehova?
7 Uman udia mu Bibil utulejin anch Yehova ukwet ukaliweny ujim wa kutadil pa uwamp wa muntu. Nzamb wamwela David mudi “kashalapol wam David, walama yijil yam ni wadinga ni kwend nam pamwing nich muchim wend wawonsu, nich kusal kusu yadinga yiwamp ku mes mam.” (1 Ant 14:8, NW) Inge, twij anch David wasala yom yimwing yadinga yiyimp nakash. Pakwez, Yehova watonda kutal ching pa uwamp mulong ndiy wadinga wij anch muchim wa David wading utentamin.—1 Jins. 29:17.
Yimana Akadivar Ney Mudi Muyimenay Yehova
8, 9. (a) Mwi njil ik tukutwisha kwikal mudi Yehova? (b) Mutapu ik tukutwisha kuchifanikesh, ni tukwilejinaku chom ik?
8 Yehova ukutwish kutang michim, pakwez etu tutwishiningap. Dined didi diyingish diwamp kudi etu dia kulik kurumburishang. Kitwijap yibachikin yawonsu ya muntu mukwau. Tufanyidin kusal usu wa kumwimburij Yehova mu kulik kwimenang ching pa kuburen kuwanyin kwa chiuntu, kukeza kwau kushadik. Ov, dikwikalap diloz diwamp dia kumwimburij Yehova pa mulong winou? Kusal kwetu mwamu kukez kuwejin nakash ku urund wa chisambu pamwing ni akadivar ni anambaz etu.—Efes 4:23, 24.
9 Chilakej, tongin bil chikumbu chiyila mu kuumbwok—masakil masambish kuwawol, tupend twawawol lel, ni misong yidjil mem. Antu avud akutwish atal chikumbu chinech ni alond anch chifanyidin kuchiumbul; chisangareshinap kuchiman. Pakwez muntu umwing umena yom mu mutapu windjing wez. Watal kulemp nakash kupandakanamu pa milong yimekena ni wajingunin anch mufulandal ni jimbumb yidi yikash ni chikumbu chitwishikin kwau kuchitunguril. Wachiland ni warijek yom yimwing yiyipina ni wachikadish cha ufun. Kupwa, in kusut isambidin pa mutapu wikala kal chikumbu cha ufun. Ov, tukutwish kwikal mudi muntu winou wasala mudimu wa kurijek ap kutungiril chikumbu? Pa ndond pa kwasin pa kurumbuk kwa akadivar netu kumekena ni mes, ov, tukutwish kushinshikin pa ngikadil yiwamp ni kuya kwau kurutu muspiritu? Ang twasal mwamu, tukez kuyikat akadivar netu mulong wa ufun wau wa muspiritu, mudi muyikatinay Yehova.—Tang Hebreu 6:10.
10. Chiyul chidia mu Filipoi 2:3, 4 chikutukwash nchik?
10 Kambuy Paul waleta yiyul yimwing yikutwisha kutukwash mu urund wetu ni chikumangen chawonsu. Wayikasikesha in Kristu anch: “Kangal wasalany yom ya kwaurok ap ya kwitumbish nich, pakwez ikepishany, umwing amutonga mukwau kujimb chipandikena amwinend. Kangal umwing ni umwing asotijola ku yom yend amwinend, pakwez asota kand yom ya akwau.” (Filip. 2:3, 4) Kwikepish kukutukwash tuyimana antu akwau nawamp. Kuyimekeshin antu akwau anch tuyisangaredin ni kutalang ching uwamp wau kukez kand kutukwash kuyiman mudi muyimenay Yehova.
11. Karumuk ik kushikedina mu yikumangen yimwing?
11 Mu yisu ya katat, yishiken yisadikina mu mangand yaletin kal kushemunok kwa antu avud. Katat mu misumb yimwing mudi antu adiokila ku jingand kushalijan. Antu asu adia katat mu mwab wetu asangaredina uyakin wa Bibil, ni inungin kal pamwing netu mu kumwifukwil Yehova. Antu inay a “michid yawonsu ni majuku mawonsu, antu a mangand mawonsu ni jindim jawonsu.” (Kubur. 7:9) Mudi chibudikin, yikumangen yetu yikadil kal mu mutapu umwing ya antu a mangand mawonsu.
12. Chitongijok ik tufanyidina kwikal nich pa muntu ni mukwau, ni mulong wak chikutwish kwikal chikash pa yisu yimwing?
12 Mu chikumangen chetu, tuswiridin kuta nakash matu chakwel twikal nich mutapu uwamp wa kumuman muntu umwing ni mukwau. Chom chinech chituvurishin mu manangu chiyul cha kambuy Pita cha kumekesh “rukat kudi akadivar [pakad rubabek]” ni “katijanany muntu ni mukwau mu michim yen.” (1 Pita 1:22) Kukudish rukat rakin kukutwish kwikal kukash mu yikumangen yijim-yijim. Yishankur ya ambay netu in kwifukwil yikutwish kushalijan nakash ni yetwetu, mudi kwilej kwau, nfalang jau, ni yishakur ya kabil kau. Ov, chikukasikedin kutesh chitongijok ap yisal ya muntu kanang? Niyawiy akutwish iyov chilik chimwing padi ey. Chikalap nchik mwamu, etu awonsu atulejin anch: “Katany divar” diawonsu.—1 Pita 2:17.
13. Yom ik yitufanyidina kurijek mu manangu metu?
13 Chikutwish kwikal cha usey kutenchik yom kanang mu yitongijok yetu mulong wa kujimbish rukat padi akadivar netu awonsu. (Tang 2 Korint 6:12, 13.) Ov, kadikal twilondilap ayinetu dizu mudi anch: “Nikwetingap kasolikany, pakwez . . .” ni kupwa kusambish kuchind ngikadil yimwing yiyimp yitumena yipalangena nakash kudi antu a kabil kanang? Yovil yiney yikutwish kumekesh kuswir kwetu twibwita ayinetu kasolikany kachidia ni katat mu muchim wetu. Tukutwish twiyipul ayinetu anch, ‘Ov, nisadil chakin usu wa kusot kuyijik antu akweta yishankur yishalijadina ni yamam?’ Kwishinshikin kwinoku kwa muntu ipend kukutwish kutukwash tutenchik kuyitiyij ni kuyisanger akadivar netu a pa mangand mawonsu.
14, 15. (a) Pan chilikej cha antu arijika kuman kwau pantalikel ni akwau. (b) Mutapu ik tukutwisha kuyimburij?
14 Bibil utwinkishin yilakej yiwamp ya antu atenchika yitongijok yau, umwing wau wadinga kambuy Pita. Mudi mwin Yuda, Pita wadinga uchinin kwandam mu chikumbu cha muntu wa Michid. Tongin kamu mutapu wiyovay pamulejau aya ku chikumbu cha mwin Michid Konelius chidim! Pita watenchika yitongojok yend, wamana anch radinga rusot ra Nzamb anch antu a michid yawonsu ikal yid ya chikumangen cha Ukristu. (Mid. 10:9-35) Saul, weza kurutu kwikal kambuy Paul, niyend chamufanyidina akarumuk ni abwita yitongijok ya kasolikany kend. Witiyija anch wading uyikisin nakash in Kristu ni “[wachipompata] chikumbu cha Nzamb ni kupakish kuchishesh.” Pakwez, chisu chamupupau Paul kudi Nsalejetu Yesu, waswimpa nakash ni wasambisha kwitiyij umutakel wa antu apompatay pasak.—Gal. 1:13-20.
15 Kwikil kwidjidjek anch niyetu tukutwish twatenchik ngikadil yetu nich ukwash wa spiritu wa Yehova. Anch twajingunin anch kudi ngikadil yijingamena ya kasolikany mudi etu, el tusalany usu tuyibwita chakwel ‘twinunga mu chisambu.’ (Efes 4:3-6) Bibil utukasikeshidin etu “[tudjala] rukat, wawiy mwoj uwanyidina ukasila yawonsu pamwing mu kwovijan.”—Kol. 3:14.
Tumwimburijany Yehova mu Mujikit Wetu
16. Risu rusot ra Nzamb piur pa antu?
16 Kambuy Paul wafunda anch: “kwikil kasolikany ka antu kudi Nzamb.” (Rome 2:11) Rid rutong ra Yehova kuyandjik antu a michid yawonsu mu ditenchik diend mulong wa kumwifukwil. (Tang 1 Timote 2:3, 4.) Pa chinech, ndiy watenchika chakwel “rusangu ruwamp ra chikupu” arilejan ku “michid yawonsu, ni majuku, ni jindim, ni antu.” (Kubur. 14:6) Yesu walonda anch: “Chingand, mawiy mangand.” (Mat. 13:38) Chirumburikin ik kudi ey ni kudi dijuku diey?
17. Mutapu ik tukutwisha kuyikwash antu a mitapu yawonsu?
17 Kadiap antu awonsu akutwisha kuya kuyikunku ya kulemp ya mangand kulejan uruu wa Want kudi antu akwau. Chikalap nchik mwamu, tukutwish kwikal tayad kuyitwadil uruu antu a ku yikunku yawonsu ya divu adia mu teritwar wetu. Ov, tukat kujingunin swa mitapu ya kupan uman kudi antu a mitapu yin yawonsu, kangal ching kusu atwaleja kal mu mivu? Ov, mulong wak ulikinany kwitekin mupak wa kuya kudi antu indjing akad kal kutesh nawamp uman?—Rome 15:20, 21.
18. Yesu wamekesha nchik kuyibangin antu?
18 Yesu waswiridina nakash kuyikwash antu awonsu. Kalejanap mu mwab umwing kusu. Rusangu rimwing ra Bibil ritulejin anch ndiy “watambitamba mu misumb yawonsu ni mu mal.” Ni “chamanay yisak ya antu wayovil riy” chawiy wamekesha maswir ma kuyikwash.—Mat. 9:35-37.
19, 20. Mu jinjil ik jimwing mutukutisha kuyimekesh antu a mitapu yawonsu kuyibangin mudi Yehova ni Yesu?
19 Mu jinjil ik jimwing muukutwisha kumekeshin ngikadil ya chilik chimwing? Antu amwing itekina kal mupak wa kulejan mu yikunku ya teritwar wau mwakadiau kulejan chisu ni chisu. Chikutwish kwikal mu miab ya wingend-a-mushing, mu park, kukatau kuchingel motak, ap kurutu kwa yikumbu yijim yikash kwandamamu. Akwau asala usu wa kwilej rudim rindjing mulong wa kuyilej yisak ya antu a tubil tumwing ashicha katat mu mwab wau ap yisak yakadiau kwendil chisu ni chisu kuyilej uman pasutil kal chisu. Kwilej mutapu wa kuyilangwish antu inay mu rudim rau kukutwish kuya kulemp mu kuyimekeshin mutapu ukata kubanginany uwamp wau. Anch tukutwishap kwilej rudim rindjing, ov, tukutwish kuyikasikesh in asadila mwamu? Chakin kamu tusotilap twikal nich yitongijok yiyimp ap kwiyipul mulong wak antu akwau asadil usu mwamu wa kuyilej antu adiokila mwi ngand yindjing. Mwom yawonsu yidi ya usey ku mes kwa Nzamb, niyetu tusotil tuyiman chilik chimwing.—Kol. 3:10, 11.
20 Kuyiman antu mudi muyimenay Nzamb kurumburikin kand anch kuyilej awonsu, chikalap nchik mikadil yau. Amwing akutwish ikal akad yikumbu, akwet nswich jivuzangena, ap ameken kamu anch inay adi in masandj. Anch antu atusadil pakad kalimish, chom chinech kichifanyidinap kutusal tukudisha yitongijok yiyimp piur pa muchid wau wawonsu ap kabil kau kawonsu. Antu amwing amusadila Paul nayimp, pakwez kalikap chom chinech chimukangesha kuyilej antu a yishankur yiney. (Mid. 14:5-7, 19-22) Ndiy wachingejina anch antu amwing akutwish itiyij.
21. Ov, kwikal nich chitongijok cha Yehova piur pa antu akwau kukukwashin nchik?
21 Katat twachov kal zwang anch kwikal nich chitongijok chiwamp—chitongijok cha Yehova—mu kuyisadil akadivar netu, ukadivar wetu wa pa mangand mawonsu, ni antu itutanina mu chingand. Anch twamekesh nakash chitongijok cha Yehova, chawiy tukwikala kand musul wa chisambu ni uumwing. Ni tukwikal tayad kuyikwash antu akwau amusangera Yehova, Nzamb wakad “kasolikany” pakwez uyibangidina awonsu nich rukat, “mulong awonsu adi yitang ya makas mend.”—Yob 34:19.
Ov, Ukutwish Kwakul?
• Chitongijok ik chikwetau akadivar netu chitufanyidina kusal usu wa kwiyep?
• Mutapu ik tukutwisha kumwimburij Yehova mu mutapu umeningay akadivar netu?
• Malejan ik wileja kal piur pa chitongijok chetu piur pa akadivar netu a pa mangand mawonsu?
• Mutapu ik tukutwisha kwimburij chitongijok cha Yehova piur pa antu pitudia mu chingand?
[Chipich chidia pa paj wa 26]
Mutapu ik ukushikena ku kuyijik antu a yishankur yindjing?
[Chipich chidia pa paj wa 28]
Mu jinjil ik ukutwisha kuyishiken antu avud nich rusangu ruwamp?