Ov, Mwom Ukwet Kurumburik Kanang Kwakin?

ANTU avud iyipula chipul chinech anch: “Ov, mwom ukwet kurumburik kanang kwakin?” Cha ushon, chikalap nchik yichingejinau mu mwom, antu avud katwishinap kwipuk ku yitazukinay Viktor E. Frankl neurologue umwing wa mu Australie anch: “Kuburen kurumburik ni kuburen musangar” mu mwom wau.

Ov, mulong wak antu avud iyovil mwamu? Mulong wa chom chimwing, mamiliyon ma antu adia pa mangand mawonsu ashich mu mikadil ya mar nakash. Dichuku ni dichuku, kudi milong ya uzwendj, mayej, chisum chikash, ni kumeshan mar. Mwom wau “wizwil [chakin kamu] sens nich mar” mudi mwalonday Job, muntu wamana mar paask. (Job 14:1, Mukand wa Nzamb) Rutong rau ra kusambish ridi ra kupand dichuku dimwing ni dikwau.

Ma miliyon ma antu akwau makwet mapit mavud. Awiy ameken mudi akwet yom yawonsu ya usey chakwel ikala nich musangar wakin mu mwom wau. Pakwez antu avud kadiap mwamu. Mulong wak? Mulong chisu ni chisu, “mar ni ushon”—kuwa kwa nfalang pakad kuchingejin ap mar makash, mudi kufa kwa mwan—yikat kushadish ruchingej ni yitongijok yau.—Kuseng 90:10.

Kudi kand chom chikwau chikasikeshina chitongijok chinech chikash cha “kuburen kurumburik ni kuburen musangar.” Ov, chom ik? Kwiswip kukash kwa mwom. Kudi antu avud, chovikenap pa kuman antu asadina yom yijim-yijim kwikal nich mwom wiswimp. Awiy kateshinap kurumburik kwa yom yikash yikata kutushiken etwawonsu: katat ap kurutu, ap anch twiyep ku mar makash makata kuyishiken antu, pakwez rufu rukat kutupwit yom yawonsu.—Mulej 3:19, 20.

Ov, Mwom Ukudandamen Kwikal Wakad Kurumburik?

Mwant Salomon wa mu Isarel wa pasak walejana nawamp mwikadil winou mu wiswimp. Ndiy wamana mutapu ukatau antu a mu chirung chend kusal mudimu ukash mu kusadil manangu ni ukaliweny wau mu kudim, kutung, ni kulam majuku mau, mudi mu tusadina nlel unou. Ndiy wipula anch, ‘Ov, yom ik yawonsu yasalau djat ni kwinsudiel?’ Ndiy washikena ku kulond anch yawonsu yasalau antu yidi “yamwamu, yading mudi kumulondul rinkind.”—Mulej 2:17.

Ov, Mwant Salomon witiyija anch yom yawonsu yisadinau antu yikudandamen kwikal “yamwamu mudi kumulondul rinkind”? Bwat. Ndiy wading uletin chitongijok chakin piur pa mwom udia mu mangand minam makad kuwanyin. Pakwez, Dizu dia Nzamb diapepilau dikutwish kukwinkish ruchingej anch yom yawonsu yikezap kudandamen kwikal mwamu!

Ov, mutapu ik ukutwisha kuman ruchingej riner? Tang amboku mitu ya milong yaad yilondwilaku. Yikutwish kukukwash chakwel wijika mulong wak mwom umeken mudi wakad kurumburik, ov mutapu ik ukezau kupwish milong yiney, ni mutapu ik ukutwisha kusal anch mwom wey wikala nich kurumburik kwakin ap nlel unou.