Ov, Ukutwish Kwitiyij mu Relijon Wey Piur pa Nfalang?

Estellea wading ni kuyang ku egliz chisu ni chisu nich an avud, ulejen anch: “Namuleja mwimpel anch nisotin kwilej Bibil.” Pakwez, ndiy kamufundishap dichuku ap dimwing. Kupwa, ndiy walika kuya ku egliz. Ulondin kand anch: “Amakurump a egliz anfundina ni kwinlej anch ap anch niyilap kwinikwa, nituma ap nfalang. Natonga anch, Awiy kadingap kwimbangin pinading nikuya kuyikumangan yau; asota kwau ching kusu nfalang jam.’”

Angelina, wadinga mu relijon umwing, walonda anch: “Mu egliz wam, ading akat kusutish chimpay tupamp tusatu chisu chawonsu cha kwifukwil, ni ading akat kwit chakwel tupana chisu chawonsu. Adandamena kwit nfalang. Natonga amwinam anch, ‘Antu inay kakwetap spiritu wa Nzamb.’”

Ov, relijon udia mwingand yey ukat kusadil mitapu kushalijan mulong wa kuyibachik antu apana nfalang? Ov, chinech chikwatijadin nich Bibil?

CHILEJENAY BIBIL

Yesu, wasambisha win Kristu, walonda anch: “En watambulanya ukash winou kudi am wakad difut, niyen panany kand wakad kufutishan.” (Mateu 10:8) Uruu wa Bibil udiap wa kulandish ni ufanyidin kwikal kudi antu awonsu ausotina.

Ov, mutapu ik in wadingau in Kristu a kusambish ni kufut yikal ya chikumangen?

Muntu ni muntu wapana “mudi mutonginay amwinend wakad kupan nich ushon ap kupan kwa kumubachik nich usu. Mulong Nzamb ukatil muntu ukata kupan nich musangar.” (2 Korint 9:7) Kambuy Paul walonda anch: “Twasala uchuku ni muten, mulong kitwasotap kukutwikany en chisend pitwakurumburilangany Rusangu Ruwamp.” (1 Tesalonik 2:9) Paul wasala mudimu wa kuchim antend chakwel asala nawamp mudimu wend wa kulejan.​—Midimu 18:2, 3.

YISADINAU ATUMAN A YEHOVA

Atuman a Yehova akat kukumangan mu yikumbu yiwamp yitazukinau anch Yot ya Want. Ov, mutapu ik afutinau yikal yau? Awiy kakatap kusutish chimpay mulong wa kuyishindil antu ateka nfalang bwat; ap kutum ma anvelope mulong wa kwit nfalang bwat. Pakwez, muntu mwawonsu usangaredina program wa muspiritu ukutwish kutek nfalang jikwetay mu mushet udia mu Chot cha Want pakad kumekesh kudi antu akwau.

Gazet winou witin nfalang jivud mulong wa kumuchap ni kumupalangesh. Pakwez, ukezap kuman dichuku ap dimwing anch kudi kwit nfalang mudi mukatau kusal antu alandishina yom. Akat kukasikesh piur pa kupalangesh uyakin wa Bibil.

Ov, chom ik utongina: Ov, chitongijok chidia kwinyim kwa yitenchik yiney chikwatijadin ni mazu ma Yesu, ap ni chilakej cha in Kristu a kusambish?