Ukutwish Kwikal ni Musangar Kusambish Nlel
DICHUKU dimwing kwikil muntu ukeza kuyel, kunanap ap kufa. Niyey ukutwish kwikal ni mashakamin ma mutapu winou! Pakwez, nlel mwom wizwil too nich milong ni yakamish. Yom ik yikutwisha kukukwash kwikal ni mashakamin ma musangar? Bibil utwinkishin umutakel ukutwisha kukukwash kwikal ni mashakamin ma musangar kusambish nlel. Shinshikin yakamish yimwing ya mwom ni mutapu ukutwishay Bibil kukukwash kuyipandikan.
KUSANGER YOM UKWETA
Chiyul cha Bibil: “Kangal ris ra nfalang rakuyikelany, pakwez sangarany nich yom yiukwetany.”—Hebereu 13:5.
Nlel antu alondin anch chifanyidin kwikal ni yom yivud nakash ya ku mujimbu. Pakwez Bibil ulondin anch tukutwish ‘kusanger yom yitukweta.’ Mutapu ik?
Ipuk “rukat ra nfalang.” Antu akat kwipan nakash kushik ni mu chilik cha kushesh mijimbu yau, majuku mau, urund wau, mikadil yau yishitwila, ap kand kalimish kau—mulong wa “rukat ra nfalang.” (1 Timote 6:10) Yom ya usey mudi ik yisheshilau! Kupwa, muntu ukatila mapit ‘kakumikutap.’—Mulej 5:10.
Antu adi a usey nakash kusutamu yom ya ku mujimbu. Yom ya ku mujimbu yidi ya ukwash. Pakwez yom yiney yikutwishap kutukat ap kutujikitish; ching kusu antu awiy akutwisha kusal mwamu. Kwikal ni “murund” wakin kukutwish kwakukwash kusanger yom ukweta mu mwom.—Jinswir 17:17.
TUKUTWISH KWIKAL NI MUSANGAR KUSAMBISH NLEL KUSUTIL KULONDUL UMUTAKEL WA BIBIL
MUTAPU WA KURISH NI MAYEJ
Chiyul cha Bibil: “Muchim wa musangar udi mwon uwamp.”—Jinswir 17:22.
Mudi “mwon uwamp,” musangar ukutwish kutukwash kurish ni mayej. Mutapu ik tukutwisha kutan musangar anch tuyedin?
Ikal mwin kujikitish. Anch tukat kushinshikin ching kusu pa yakamish yetu, “machuku mawonsu” makumekan kwau mudi madi mayimp. (Jinswir 15:15) Pakwez Bibil ulondin anch, ‘ikalany in kujikitish.’ (Kolosay 3:15) Ikal mwin kujikitish ap mu tuyom tumekena kwikal twa usweral. Mudi kusanger kuzwek kwa muten, kachipepil kawamp, masip ma muntu ukatina—yom mudi yiney yikutwish kwikal ya usey nakash mu mwom wetu.
Ikal mwin kuyisadin antu akwau. Ap anch tuyedin, ijik anch “chiyukish cha mwin kupan chipandakenamu cha mwin kutambul.” (Midimu 20:35) Pakatau antu akwau kutujikitish mulong wa yom tuyisadidina, tukat kwikal ni musangar ni tukat kuvuramen yakamish yetu. Tukutwish kwikal ni mashakamin ma musangar kusutil kuyikwash antu akwau chakwel niyau asangera mwom yau.
MUTAPU WA KUKASIKESH URUW
Chiyul cha Bibil: ‘Shinshikin yom yikweta usey nakash.’—Filip 1:10.
Ambay a uruw asutishina chisu chikemp pamwing akutwish kutek urund wau mu ubaj. Angatan nau angachik afanyidin kuman anch uruw wau—chidi chom cha usey nakash mu mwom wau.
Salany yom pamwing. Pa ndond pa kusal yom yey amwiney, ufanyidinany kutenchik yom pamwing. Bibil ulondin anch: “Antu aad asadila mudimu pamwing amupandakenamu muntu umwing.” (Mulej 4:9) Ukutwishany kwisuk yakudia pamwing, kusengan pamwing ap kwipuwangej pamwing.
Mekesh rukat kudi mbay ney. Bibil uyikasikeshin angatan ni angachik kukatijan ni kulimishijan umwing ni mukwau. (Efes 5:28, 33) Yom mudi kusip nich chirungul, kubwikatijan nich rukat, ap kachipan kakemp yikutwish kukasikesh nakash uruw. Chakin kamu, ambay a uruw afanyidin kusal yom yikata kulangwish maku ma uruw ching kudi ayinau aad.—Hebereu 13:4.