Yikumangan yidi ya ukwash kud ansand ni ayangadim

¹ Changadim umwing wa dikum dia mivu walonda anch: “Yisu yimwing nikat kutongang anch ansand nau ayangadim akweting yisu yimwing yikash nakash mu mwom. Tudi mukach mwa antu akata kusotan, kuna damb, ni kunawol maar.” Ov mwamu ukata kutong? Anch mwawiy, ov yom ik utongina yikukukwasha kurish nich yibachikin yiyimp yiney? Ukwet kuswir kwa ritiy, ritiy rikash mu jinjil jitentamina ja Yehova, mulong pakad ritiy “muntu kakutwishap kumusangarish Nzamb.” (Heb. 11:⁠6) Kukumangan ku yikumangan ya chikumangen kukez kukukwash kukasikesh ruchingej rey ra Ukristu ni chiyul chey cha kwipuk yom yiyimp.

² Yikumangan yikwet yivud ya kukwinkish: Ov yom ik yikata kusal yakudia yiwamp ni arund akatish yikala yisangareshina? Ov chidap kubomb kwa yakudia yiwamp ni urund usangareshina mu mutapu umwing uswedishina? Chakin, yikumangan yetu yiletining musangar wa chilik chimwing, pakwez musangar wa muspiritu.

³ Yom yisambidinau ku yikumangan yikat kukudish, yidi milong yambatena nich milong ya mwom wa dichuku ni dichuku chakwel kwilej uprofet ushimokishina wa Baibel. Yany ya kusadil yipaninau yikufundishin mutapu wa kushakam upandakena kuwap ni mutapu wa kurish nich yoziu yiusankena. Arund utanina ku yikumangan adi arund awamp kupandakan, ni mwikadil wa muspiritu usangareshin ni ukwet diking. (Kus. 133:⁠1) Chishimokishinap anch changadim umwing walonda anch: “Nikakuyang ku shikol dichuku ni dichuku, ni chikat kwinziyish. Pakwez yikumangan yidi mud ndond yidia mem mwi mpay, munikata kwiswedishin chakwel kuyisadil dichuku dia shikol dikulondula.” Changadim mukwau walonda anch: “Namen anch urund wa piswimp nau antu amukatina Yehova winkwashin kushal piswimp nend ndiy.”

⁴ Anch wafundish dijin ku Shikol ya Mudimu ya Uteokras, ukat kwilej kukumangej pamwing jinsangu ja Baibel, kujisutish mu diskur, ni chad lel kujipan mud misamb kurutu kwa in kutesh ku Chot cha Want. Tonginap bil ukwash wa kwikal ufundishinau chakwel kwikal ni ukaliweny wa kufundish uyakin upandishina wa Dizu dia Nzamb! Ov kwisu kand kukutwishau kutambul ansand nau ayangadim mafundish ma usey mud minam?

⁵ Mutapu wa kwisakin sens yikumangan: Chakwel kwisakin sens yikumangan, kudi yom yisatu ya usey yiswiridikina. Kudi kwirijek, kwakul, ni kusadil.

⁶ Irijeka mulong wa yikumangan: Itekinaku chisu chifanyidina pakad kujing chakwel kwirijek mulong wa yikumangan. Kangal walikin midimu ya shikol, mudimu wa chisu chikemp ap mijikit ya kwipuwangesh yikusutishina chisu chiukweta nich kuswir mulong wa kuchirikin kurutu kwa muten yom yikwisambinau ku chikumangan ni chikumangan. Chidi cha ukwash kwikal ni chijidish chiwamp. Chakusambish ni cha usey, chifanyidin kudandamen nich program wa kutang Baibel rubing ni rubing wa Shikol ya Mudimu ya Uteokras. Chitining kusu kwitekinaku aminit akemp dichuku ni dichuku chakwel kutang ni kutongin mashapitre mapaninau. Itekina chisu cha kwirijek mulong wa Dilejan dia Buku dia Chikumangen ni Dilejan dia Tour de Garde. Amwing akat kusal chinech dichuku dimwing ap machuku maad kurutu kwa yikumangan. Pichitwishikina, sal chilik chimwing nich yikunku yitekinau ku program wa Chikumangan cha Mudimu cha rubing ni rubing.

⁷ Akul ku yikumangan: Baibel ulondin anch padingay ni mivu 12, Yesu amutana mu tempel, ukat kutesh, kwipul, ni kwakul. (Luka 2:​46, 47) Mu mutapu ukwau wa kulond, wading wipaninamu kamu nakash. Ukez kuman ukwash ujim udiokila ku yikumangan anch wasal usu wa kwakul ku yikumangan.​—⁠Nsw. 15:⁠23.

⁸ Chakusambish, uswiridin kwikuchik neeng pa yom yifundishinau ku yikumangan. Yisu yimwing, kutesh diskur kuding kukasikena kupandakanamu kudipan. Mulong wak? Yitongijok yey yikutwish kuwayiway palondinay muntu mukwau. Ov mutapu ik ukutwisha kurishish chinech? Fund milong yijim. Fund mu wiswimp milong ya usey ukukimba kutal kupwa. Kufund kukutwish kukukwash kutek yitongijok yey ku program. Chikwau kand, kimb mifund, ni kulondul payitanginau kud mwin kulond.

⁹ Chikwau kand, itekina rutong ra kwakul ku misamb yawonsu ya yipul ni yakul ku yikumangan. Ukez kutambul kand ukwash uvud anch ukat kutongin ku mazu ukimbina kulond. Mulong Jinswir 15:28 ulondin anch: “Muchim wa mwin kutentam ukat kutong nawamp mutapu wa kwakul.”

¹⁰ Sadil yiwilejina: Rizau ra nsudel ridi kushinshikin anch yom wilejina yikat ‘kusal mudimu mu ey.’ (1 Tes. 2:13) Anch wasadil mitu ya milong yiwamp yiwilejina ku chikumangan ni chikumangan, ukez kushal piswimp nend Yehova Nzamb. Ukez kwikal wakin kud ey, ni ukez kwikal ni musangar ujim anch ‘wadandamen mu uyakin,’ ni kuusal wikala iwey kamu.​—⁠3 Yohan 4.

¹¹ Akadivar ansand nau ayangadim, anch ukat kwirijekany pakad kujing mulong wa yikumangan, anch ukat kwakulany ku yikumangan, ni kusadil yom wilejinany, ukez kusangerany sens yikumangan. Pa chisu chawiy chimwing, ukez kutambulany ukwash wawonsu uswiridinany udiokila ku yikumangan. Ritiy ren rikukasikan, piukwatinany chiyul cha kushal antu akin kud Tatukwen wa Mwiur, Yehova.​—⁠Kus. 145:18.