Program musu wa chikumangan cha pakampwil cha dichuku dimwing
Program wa chikumangan cha pakampwil cha dichuku dimwing chikusambisha mu Mwinses 2000 ukwet mutu wa mulong “Ikalany Amakurump mu Manangu”. (1 Kor. 14:20, TMK) Mulong wak chikwikal cha usey kud etu kukumangan? Tushich mu mangand mizwila sens uyimp. Chakwel kurishish chinech, tufanyidin kukudish ukaliweny wetu wa muspiritu wa manangu chakwel tukutwish kupandakan uyimp nich uwamp. Chawiy chikutukwasha kusal program wa chikumangan cha pakampwil cha dichuku dimwing.
Mu chikunku cha kusambish, kalam wa sirkwi ukwambambin “Ukwash Chakwel Kwikal Amakurump mu Manangu.” Ukutulej mutapu wa kwikal ajikishina mu ritiy ra Ukristu. Mwin kulond ngendj ukukasikeshin mutapu kusadin kwa kashinsh, ap disadil, kwa yijidik ya Baibel kudi kwa usey mu kukudish nawamp mutapu wa kutong, pambambidinay mutu wa mulong “Tulamany Mwom wa Muspiritu Nich Kwilej Ukaliweny wa Kutong.”
Ansand afanyidin niyawiy kukudish ukaliweny wa manangu. Akwisambin chinech mu yikunku yikweta mutu wa mulong “Mulong wak Kwikal Anikanch mu Uyimp” ni “Ansand Atambwila Manangu Katat.” Tesh ansand alejena yisadinau ayinau chakwel kukasikesh mwom wa muspiritu chakwel atwisha kupandakan (kulik) kusot kwijik piur pa mijikit yiyimp ya mangand ni kwipuk kuvundangesh.
Ov mutapu ik tukutwisha kuman musangar ujim nakash mu mwom? Mwin kulond ngendj ukurumburil chinech mu diskur dia nsudel dikweta mutu wa mulong “Tambul Ukwash Udiokila ku Kusadil Yijidik ya Baibel Nich Manangu.” Ukutwinkish yilikej yimekeshina anch kusadil Dizu dia Nzamb kutukwashin kupwish milong, kukwat yiyul, ni kutambul chakin ukwash udiokila ku yom yitufundishinay Nzamb.
Awonsu asotina kumekesh kwipan kwau kud Nzamb nich dibatish mu mem ku chikumangan chinech afanyidin kwijikish kalam-ntakel kurutu kwa muten. Tek chijingidij pa kalandrie wey anch ijikish dichuku dia ngond dia chikumangan cha pakampwil, ni itenchika nawamp chakwel kutambul ukwash udiokila ku program winou wa usey. Pikil waburen chikunku ap chimwing cha chikumangan cha pakampwil cha dichuku dimwing! Chikukukasikesh kujijamen ditenchik diyimp dined ni kushal ushinshamena kud Yehova.