Lam
Yiyul ya Mazu ma Kusambish Nich Misamb mu Mudimu wa Chingand
Mutapu wa Kusadil Wenjil Winou
Mazu mavud minam ma kusambish nich misamb mabudikina kal kand mu manimero makwau ma Mudimu Wetu wa Want. Pakish kamu kumasadil nakash mud chitwishikina mu mujikit wey wa kupan uman, ni kutal yibudikin ukutwisha kuman. Lam wenjil winou, ni kumusadilang chisu wirijekina mulong wa mudimu.
Ukutwish kulangwish kusanger kwa muntu mu Dizu dia Nzamb anch wapan uruu wey mu wiswimp. Ipul chipul chovikena, kupwa tang chakul chiswimp chimanyidina pa Mufund. Ukutwish kupakish kusadil yiyul yiney:
“Piutongidina kamu mutapu machuku ma kurutu, ov ukwet ruchingej bil anch bwat? [Mulika muntu akula.] Baibel wabwaka yinship yiney yakamishina yitumena nlel ni yibudikin yau.”—2Tim. 3:1, 2, 5; Jinsw. 2: 21, 22
“Kudi yom yivud nakash ya kutongin mulong wa ukash wa mujimbu nlel. Ov wij anch Nzamb washilamu kal anch ukupwish rawonsu milong yawonsu yitadila ukash wa mujimbu?”—Isa. 33:24, NW; Kuj. 21:3, 4.
“Ov wij anch Baibel watakela kulond anch chakin kamu kukez kwikal winyikel umwing kusu ukuyikela mangand mawonsu?”—Dan. 2:44; Mat. 6:9, 10.
“Ov mikadil yelang kwikal nchik anch Yesu Kristu ndiy uyikedila divu?”—Kus. 72:7, 8.
“Antu avud amen mar ma kasolikany mulong wa mwikadil wau wa kwikal ikundj ap mband, mulong wa relijon wau, ap ulomb wa chikit chau. Ov mutapu ik umenay Nzamb kasolikany kinak?”—Midimu 10:34, 35.
“Twij kamu anch Yesu Kristu wasala yilay yivud pa chirung chend. Anch wading ni mutapu wa kumwit kusal kand chilay chikwau, ov chilay ik ukumwita kusal?”—Kus. 72:12-14, 16.
“Antu avud aziyil nakash mulong wa kuteshol milong. Asotin kutesh mutapu wa kuyipwish. Pakwez kwisu tukutwisha lel amboku kutan mutapu wa kashinsh wa kupwish milong tukweta?”—2Tim. 3:16, 17.
“Ov ukutwish kujingunin Want ukata kulembilang mu dilembil dia Tatukwetu?”—Kuj. 11:15.
Mutapu wa Kusambish Misamb
List wa yipul yidia kwishin oku, yidiokil mu mitu ya milong yidia mu buku Comment raisonner, ulejen nimero wa paj patwishikina kutan chakul:
Ov antu awonsu awamp ayiling mwiur? (61)
Ov muntu ufanyidin kuya mwiur chakwel ikala nich machuku ma kurutu ma musangar wa kashinsh? (62)
Ov tukwet yiyingish ya kwitiyij mudi Nzamb? (106)
Ov Nzamb ukat kubangin chakin kamu yikata kutushiken etu antu? (107)
Ov Nzamb udi chakin kamu muntu umwing wa kashinsh? (108)
Ov mulong wak chidia cha usey kwijik ni kusadil dijin dia Nzamb? (200)
Ov Yesu Kristu udi chakin kamu Nzamb? (205)
Ov chom ik chifanyidinau kusal ambay a uruu chakwel uruu wau wikala wa musangar nakash? (229)
Ov mulong wak kudia uyimp uvud nakash? (237)
Ov nany uyikedila mangand minam—Nzamb bil anch Satan? (250)
Ov mulong wak tukata kunanap ni kufa? (253)
Ov ngikadil ya afu yidi nchik? (255)
Ov marelijon mawonsu mitiyikin kud Nzamb? (310)
Ov mutapu ik ukutwishay muntu kwijik relijon udia wakin? (316)
Ov chom ik chikeza kuwanyish Want wa Nzamb? (336)
Ov mutapu ik usadidinay Satan usu ukash mu mangand m’ilel? (368)
Ov mulong wak ulikidilay Nzamb mar? (375)
Ov mwom wa antu ukwet rutong ik? (434)
Yiyul Mulong wa Kupan Broshir Nzamb Witin
“Chakin kamu anch ukutwish kwitiy anch antu avud itiyijin mudi Nzamb. Antu awonsu itiyijina mudi ndiy itiyijin anch Nzamb witin chom kanang kud etu. Ov mulong wak antu katwishinap kwijik chom chitwitinay Nzamb?” Kupwa lejan broshir Nzamb Witin, buril pa difundish dia 1, ni kwisambinap.
“Nich milong yivud yidia mu mwom wa dijuku nlel, ov wiyipulap kal anch chom ik chidia ujindj ukutwisha kulet musangar mu dijuku?” Kupwa kwa chakul, rumburil anch Nzamb, umekeshin patok mu Baibel ujindj wa kashinsh wa musangar wa dijuku. Tang Isay 48:17, NW. Kupwa buril pa shapitre wa 8 mu broshir Nzamb Witin, ni rumburil maverse mamwing majimbwilau mu Baibel maletina yiyul ya kashinsh mulong wa chid ni chid cha dijuku. Tang yipul yidia kwisambishil kwa difundish. Mwipula muntu anch usotil kutang yakul.
“Broshir winou ukwet mafundish ma dishin mengamidina pa Baibel. Pa paj ni paj, ukez kutan yakul ku yipul yikata kuyakamish antu mu yitot ya mivu. Chilikej, Ov rusot ra Nzamb ridi risu mulong wa divu?” Buril difundish dia 5, ni kutang yipul yidia kwinsambishil kwa difundish. Mwipula muntu wisambina nend chipul ik chimusangareshina nakash, ni kupwa tang (ma) paragraf wambatena nich, ni mifund yifanyidina. Murumburila anch ukutwish kamu niyend kutan mutapu uswapela yakul yikwau yisangareshina ku yipul yikwau. Mwita chakwel kuchirik kand kwambambin piur pa chipul chikwau.
“Ov utonginap nchik, ov chom ik chiletina chisum ku mashikol? Ov chidi chibudikin cha kukangany kufundish kwa anvaj bil anch udi usu wa Djabul? “ Mulika muntu akula. Anch walond anch chidi mulong wa usu wenday Djabul, tang Kujingunik 12:9, 12. Lejan patok mutapu usarumwinay Djabul kanvundangesh mu mangand. Kupwa buril broshir Nzamb Witin pa difundish dia 4, ni mwipula anch wiyipulap kal chipul kwisu kwadiokalay Djabul. Sambish kutang ni kwisambin maparagraf maad ma kusambish. Anch walond “kudi kukangany kufundish kwa anvaj” kwawiy kudiokila kwa chisum ku mashikol, tang 2Timote 3:1-3 ni kumekesh yilim yiwejidinaku chakin kwikalaku kwa mulong winou. Kupwa buril broshir Nzamb Witin pa difundish dia 8, tang paragraf 5, ni kudandamen nich misamb.
“Ov utongin anch chidi chovikena kuchingejin anch Sakatang atwinkisha ronganyin tukweta nich kuswir chakwel tutwisha kutung mwom wa dijuku upandikena kuwap?” Kupwa kwa kutesh chakul, sadil broshir Nzamb Witin. Buril pa difundish dia 8, ni rumburil anch dikwet yany yidiokila mu Baibel mulong wa chid ni chid cha dijuku. Mekesh mutapu wa kusadil broshir winou pamwing nich Baibel chakwel kutaninamu ukwash ujim.
“Mulong wa milong yawonsu turishina nich mu mwom wa katat, ov utongin anch dilembil dikutwish kwikal ni ukwash umwing wa kashinsh ku mutambu wetu? [Mulika muntu akula.] Antu avud alondining anch dilembil dikat kuyinkish usu wa mukach. [Tang Filip 4:6, 7.] Ap anch chidi mwamu, muntu ukutwish kwiyov mud malembil mend kakatap kumakul. [Buril broshir Nzamb Witin pa difundish dia 7.] Broshir winou urumburil mulad wa malembil makutwisha kwikal ma ukwash ujim kud etu.”
“Tukat kwisamb nau amutej netu piur pa mulong wa kwikalaku kwa marelijon mavud kushalijan mu mangand. Pakwez oku tukwet Baibel umwing kusu. Ov mutapu ik ukutwisha kurumburil kuvulijan kwinoku kwa marelijon, mu kuman kwey? [Mulika muntu akula. Buril broshir Nzamb Witin pa difundish dia 13, ni kutang yipul ya kwinsambishil.] Ukez kutan yakul yisangareshina ku yipul yiney anch watang difundish dined.”
Kupwa kwa kupan magazet Tour de Garde ni Réveillez-vous! kud muntu, mwipula anch ukutwish kumutangin paragraf umwing mwiswimp. Anch witiyin kusal mwamu, buril broshir Nzamb Witin pa difundish dia 5. Muleja yipul yidia kwinsambishil kwa difundish, ni kumwit kuta matu chakwel akula ku chipul cha kusambish piutangina paragraf wa kusambish. Kupwa kwa kutang paragraf, ipul chipul ni tesh chakul chend. Pan broshir, ni anch chitwishikin, irijeka chakwel kuchirik kwez kutesh yakul yend ku yipul yikwau yaad yidia pa list.
Yiyul Mulong wa Kupan Buku Ronganyin
Nich Baibel ku chikas, sambish nich kulond anch: “Tukat kuyilej nlel antu awonsu mu mukombil wen verse winou wa mu Mifund. Ulondil anch . . . ” Tang Yohan 17:3, ni kupwa mwipula: “Ov watesh kal yom yitukaninau anch tukwet ronganyin ra kashinsh? [Mulika muntu akula.] Ov kwisu tukutwisha kutan ronganyin mud riner?” Kupwa kwa kutesh chakul, lejan buku Ronganyin, ni kulond anch: “Buku winou ulejen ronganyin ritwadila ku mwom wa chikupu. Ukat kusal mwamu nich kwakul ku yipul yivud yikatau kwipul antu chisu ni chisu piur pa Baibel.” Lejan yidiamu, ni mwipula muntu anch wiyipulap kal piur pa umwing wa mitu ya milong yiney.
“Ov wiyipulap kal anch Nzamb chakin kamu ukat kubangin piur pa mafef ni mar matwombilamu ap kand mitumena ayinetu? [Mulika muntu akula.] Baibel utulejin nich kashinsh anch Nzamb utukatin ni ndiy ukez kutukwash mu yisu ya mar.” Tang yikunku ya Kuseng 72:12-17. Buril buku Ronganyin pa shapitre 8, ni kulejan patok anch buku winou upanin chakul chimwing chikasikeshina ku chipul chikatau kwipul mamiliyon ma antu anch, Mulong wak Ulikidinay Nzamb Mar? Anch chitwishikin, isambinany yitongijok kanang ya Mifund yidia mu paragraf 3 kushik ku paragraf 5, ap ukutwish kusal mwamu chisu cha kuchirikinamu kusu.
“Antu avud pakach petu afishin kal akatish nau. Ov wiyipulap kal anch tukez kumanijan kand nau? [Mulika muntu akula.] Yesu wamekesha anch akatish netu akutwish kusanguk kudiokal ku rufu. [Tang Yohan 11:11, 25, 44.] Ap anch chinech chasadika kwasutin kal yitot ya mivu, chilejen yom yakanay Nzamb kusal mulong wetwetu.” Buril buku Ronganyin pa chipich chidia pa paj 85, ni tang mazu marumburila chipich. Kupwa lejan chipich chidia pa paj 86, ni kuchisambin. Shang dishin dia mambamb mulong wa kuchirikin kakwau nich kwipul anch: “Ov usotin kwijik mulong wak antu akat kunanap ni kufa?” Chirik chakwel kwisambin shapitre 6.
“Ov watonginap kal mulong wak antu asotin kwikal nich mwom wa mivu yivud nakash?” Kupwa kwa kutesh chakul, buril buku Ronganyin pa shapitre 6, ni tang paragraf 3. Tongijokin pa mifund yijimbwilau. Kwambatanish nich yipul yaad yidia kwisudiel kwa paragraf, mwipula muntu anch usotil amwinend kwijik yakul. Anch chakul chidi chiwamp, ambambin kand mapagraf malondwilaku.
“Tukat kuyipul antu anch itiyijin anch . . . ” Tang Disambishil 1:1, ni kuwejuku anch: “Ov witiyijin chakin mazu minam?” Anch muntu witiyijin lond kand anch: “Niyam mwamu munitiyijina. Pakwez, ov utongin anch, anch Nzamb ndiy watanga yom yawonsu, ov ndiy kand udia dishin dia yom yiyimp?” Kupwa kwa kutesh nawamp chakul chend, tang Mulej 7:29. Buril buku Ronganyin, mu shapitre 8, ni kutang paragraf 2. Anch kitiyijinap mazu ma Disambishil 1:1, mukasikesha chakwel kushinshikin uman umekeshina anch Sakatang udiaku.—Tal buku Comment raisonner paj 72-74.
“Ov utonginap anch tukwet kuswir kwa ntakel wa kashinsh mulong wa usey wa mikadil ya mwom yikarumokina nlel unou? [Mulika muntu akula.] Ap anch udi mukand ukur nakash mu kwisikesh nich mikand yikwau, Baibel upanin yiyul ya kusadil mulong wa mwom wa chirung cha katat ni mwom wa dijuku dikweta musangar.” Kupwa buril pa shapitre 2 mu buku Ronganyin, ni tang paragraf 11, pamwing ni 2 Timote 3: 16, 17.
“Ov usotin kwijik yitulamidina machuku ma kurutu mulong wetwetu ni mulong wa divu? [Mulika muntu akula.] Baibel ulondil mu wiswimp piur pa machuku ma kurutu mu dizu dimwing kusu—Paradis! Mwawiy mwayitekay Nzamb ambay a uruu a kusambish chisu chayitangay. Shinshikin kurumburil kwinoku kwa mutapu chadinga chifanyidina kwikal.” Buril buku Ronganyin pa paj 8, ni tang paragraf 9, mwishin mwa kamutu ka mulong “Mwom mu Paradis.” Kupwa isambina manans madia mu paragraf 10, ni kutang mufund ujimbwilau, Isay 55:10, 11, NW. Mwita kudandamen nich misamb piur pa mutapu ukeza kwikal mwom mu Paradis uchirishinau, yidia mu maparagraf 11-16.
Pitusadila kuchirikinamu kusu kud antu twashidila magazet Tour de Garde ni Réveillez-vous!, ukutwish kulond anch:
“Kapamp ka nsudiel nasutila, nasanger kukushil kopi wa gazet wa Tour de Garde. Pamwing ap wamen anch mutu wa mulong wa jurnal winou udi La Tour de Garde Annonce le Royaume de Jéhovah. Nlel nisotin kukurumburil chidia Want winou ni chiukutwisha kurumburik kud ey ni dijuku diey.” Kupwa buril broshir Nzamb Witin pa difundish dia 6, tang ni kwisambinap kwambatan nich chisu chikwetay muntu.
“Nezin kukutal machuku ma kwinyim oku chad nakushila manimero maad ma magazet Tour de Garde ni Réveillez-vous! Majurnal minam makat kukudish kalimish ka antu mulong wa Baibel ni yany yend ya ngikadil. Mulong nitongin anch chidi cha usey kud muntu ni muntu kutesh Dizu dia Nzamb, chawiy nachirika kal kand kukulej chom chimwing chikutwisha kukukwash anch wachisadil.” Sadil broshir Nzamb Witin ap buku Ronganyin, ni kumwit kusambish dilejan dia Baibel.
Chisu upanina buku mwawonsu mukuru ukweta mapaj 192, ukutwish kupakish mazu ma kusambish nich misamb malondwila am:
“Nlel akat kukasikeshin nakash piur pa usey wa mafundish mawamp. Mu kutong kwey, ov mafundish ma mutapu ik mafanyidinay muntu kulondul chakwel ikala ni musangar ni kupandikan mu mwom? [Mulika muntu akula. Kupwa tang Jinswir 9:10, 11.] Mukand winou [jimbul mutu wa mulong wa buku upanina] wengamidin pa Baibel. Ujimbwil ching kusu musul umwing wa ronganyin ritwadila ku mwom wa chikupu.” Lejan chilikej chimwing chambatena nich chidia mu buku, ni mukasikesha muntu kumutang.
Mikand Yikwau
Mazu ma kupan nich mikand yikwau ni mabroshir ukutwish kumatan mu Index de Publications de la Société Watch Tower mwishin mwa:
Présentations
Liste par publication
Mazu ma Kusambish Kamu Nich
Chakwel kusambish dilejan dia Baibel, pakish kusadil chilikej chimwing cha mazu minam ma kusambish nich misamb:
“Ov wij anch mu aminit akemp kwau, ukutwish kutan chakul ku chipul chimwing cha Baibel chikweta usey? Chilikej . . . ” Kupwa, ipul chipul chidia kwisambishil kwa difundish dimwing mu mafundish madia mu broshir Nzamb Witin ni Chiutongina anch chikutwish kumusangaresh.
“Nisotin kukulej mutapu tukata kwilej Baibel. Chinech chitin kusu aminit piswimp atan chakwel kukulej. Ov ukutwish amboku kwinshilaku aminit atan nikuleja?” Anch chakul chidi mwawiy, sadil difundish 1 mu broshir Nzamb Witin chakwel kulejan mutapu wa kwilej, ni kutang ching kusu mufund umwing utondinau ap yaad. Kupwa kand, ipul anch: “Ov chisu ik ukutwisha kwikal nich aminit piswimp 15 chakwel tutwisha kwez kwisambin kand difundish dilondwila?”
“Antu avud akwet Baibel, pakwez kijap kwau anch ukat kwakul ku yipul ya usey tukata kwiyipul etu awonsu piur pa machuku ma kurutu. Nich kusadil mukand winou wa ukwash wa kwilej [broshir Nzamb Witin ap buku Ronganyin] mulong wa saa umwing kwau pa rubing, ukutwish kutambul nteshil wa dishin dia Baibel mu angond akemp kusu. Nikusangar kukulej mutapu ukatau kusal dilejan.”
“Nezin kukwendil mulong wa kukwit kwilej Baibel pakad kufut. Anch chitwishikin, nisotin kukulej mu aminit akemp kusu mutapu ukatau kwisambin antu Baibel mu jingand piswimp 200 ni kusut kol kwau pamwing ni majuku mau. Tukutwish kusadil umwing wa mitu ya milong yiney mud dishin dia misamb. [Lejan yidiamu ya buku Ronganyin.] Ov mutu wa mulong wisu ukusangareshina?” Chingel chakwel muntu atonda amwinend mutu wa mulong umwing. Chad buril buku pa mutu wa mulong watonday kal, ni sambish dilejan mu paragraf wa kusambish.
“Nikat kupan mafundish ma Baibel pakad kufut ni nikwet kand ndond yishadina mu kusadil kwa chisu cham mulong wa in kwilej akwiwejinaku. Tukat kusadil mukand winou wa ukwash mulong wa dilejan dia Baibel. [Lejan buku Ronganyin.] Dilejan dikutwish kusend angond akemp ni kupan yakul ku yipul mud: Mulong wak ulikidinay Nzamb mar? Mulong wak tukata kunanap ni kufa? Yom ik yikata kuyishiken akatish netu afila? Ni mutapu ik ukutwisha kumushejin Nzamb? Ov nikutwish amboku kukulej mutapu ukata kusadik difundish dined?
Anch watan mazu ma kusambish nich misamb maletina yibudikin yiwamp mu kukudish kusanger, dandamen kamu kumasadil! Mambatanisha kusu nich mukand wa kupan wa ngond winou.