‘Tulejanany Sens Dizu dia Nzamb’
1 Chisu ukata kumekesh kujikitish kwa kashinsh pa kutambul chom kanang chiwamp, ov ukatap kuchimekesh kusutil ku mwikadil wey ni yisalijok yey? Mwamu ukata kamu kusal! Shinshikin mutapu wakwilay mupostol Paul, piur pa kuwap kwa muchim ni rukat ridimukina rimekeshinay Yehova mulong wa antu. Ndiy walonda anch: ‘kujikitish kwikal kud Nzamb mulong wa kupan kwend kujim kwakad kutwish kurumburil’! Ov ‘chipan chiwamp’ chinech chidi chom ik? Ridi “ranaken rijim ra Nzamb” ramekeshay ku mutambu wetu, chimekesh chijim cha chipan chinech wadinga Mwanend wapanay mud difut mulong wa yitil yetu.—2 Kor. 9:14, 15; Yohan 3:16.
2 Ov mazu minam ma kujikitish kwa Paul mading mazu ma chamwamu? Bwat kwau! Ndiy wamekesha kujikitish kwend kujim mu mitapu yivud. Chadingay nich yivud nakash ya kubangin piur pa ukash wa muspiritu wa ambayend in Kristu, ndiy wasota kusal yawonsu yikutwishay chakwel kuyikwash kwisakin sens rukat ridimukina ra Nzamb. Piur pa antu a mutapu winou, Paul walonda anch: “Mulong twakukatanya nakash, twading tukwet musangar wa kukurumburilany rusangu ruwamp ridiokila kudi Nzamb. Twasangara kand kwipan ayinetu kudi en, mulong wadingany akarukat netu nakash.” (1 Tes. 2:8) Kuwejin pa kuyikwash antu adinga kal mu chikumangen chakwel alama dang dipandish diau kwau, Paul wadinga ni kulejan rusangu ruwamp wakad kuziy, waya maweny ma tunan twa akilometre pa divu ni mu karung chakwel kuyitan antu “adinga afanyidina mulong wa mwom wa chikupu.” (Midimu 13:48, NW) Kujikitish kujim kwa Paul mulong wa yawonsu yamusadinau kud Yehova kwamubachika ‘kuwanyish kulejan dizu dia Nzamb.’—Kol. 1:25.
3 Ov kujikitish kwetu mulong wa yawonsu yatusadilay Yehova kutubachikinap kupan ukwash wa muspiritu kud antu akweta nich kuswir mu chikumangen chetu? (Gal. 6:10) Ov tudiap abachikinau kusal sens pichitwishikina mu kulejan rusangu ruwamp ra Want mu teritwar wetu mwawonsu?—Mat. 24:14.
4 Chisu cha Kumekesh Kujikitish Kwetu: Muvu ni muvu Chivurikish cha rufu ra Kristu chikat kutwinkish chisu chimwing cha pakampwil cha kumekesh kujikitish kwetu mulong wa yom yatusadinau kud Yehova ni Yesu. Chinech chidiap kusu chikumangan chikwau ap chivurikish cha chinship kanang chamwamu. Yesu walonda anch: “Ukez kusalangany mwamu mulong wa kwinvurik am.” (Luka 22:19) Chivurikish cha rufu ra Kristu chidi chisu chimwing cha kuvurik mutapu wa muntu udiay Yesu. Chidi chisu cha kujingunin anch ndiy udi mwom ni ukat kusal nlel, nich uyaj ni want wamwinkishau mulong wa mwom wend ushinshamena ni yakupesh yend. Kuvurik kwinoku kudi kand chisu cha kumekesh kuziyil kwetu ku umutu wa Kristu patakedinay milong ni mijikit ya chikumangen cha Ukristu. (Kol. 1:17-20) Antu a Nzamb awonsu afanyidin kwikal ku Chivurikish cha rufu ra Kristu. Muvu unou chikusadik kupwa kwa muten kuzwek Diakanying, Rish 28, 2002.
5 Nich usu wa kashinsh twasadila kurutu kwa Chivurikish cha muvu wasutina ou, twashikedin uvud wa antu akumangena 592 292 mu Congo-Kinshasa ni 20 258 mu Congo-Brazzaville. Ov antu inch akukumangana muvu unou? Kuvul kwau kwengamidin pa ‘kusal kwetu mudimu ukash ni kwiyijidish ayinetu,’ chakwel kuyikwash antu avud mud chitwishikina kukumangan.—1Tim. 4:10.
6 Chikwau kand ap anch tukukumangan ku Yakudia ya Urel ya Mwant, tukutwish kand kuwejinaku mijikit yetu mu mudimu wa chingand. Chakin kamu anch, tunan ni tunan twa akadivar nau anambaz akez kusadil mud ayibol ankwash ngond umwing ap angond avud. Muvu ni muvu mu mivu yitan ya kwinyim ey, twikadin ni mwayen wa ayibol ankwash 14 458 mu chirung cha Chivurikish, kudiosh mwi ngond wa kasatu djat kwi ngond wa katan. Ov ukutwish kurijek mijikit yey chakwel wikala ni chisu cha kusadil mud chibol nkwash muvu unou? Ukwikal mutapu umwing uwamp wa kumekesh kujikitish kwey kwa kashinsh mulong wa chipan cha rukat ra Nzamb cha yakupesh ya Kristu. Ukutwish kwikal nich kashinsh anch Yehova ukukuyukish, mud muchimekeshina uman ulondwilaku ou.
7 Nambaz umwing wading ni mudimu wa ku mujimbu wa chisu chin chawonsu wafunda piur pa uman wend wa kwikal chibol nkwash mwi ngond wa Rish wasutina ou anch: “Mudimu Wetu wa Want wa Kasan 2001 wamukasikesha muntu mwin mwawonsu ukweta mikadil yimutwishishina kusadil mud chibol nkwash mu chirung cha Chivurikish. Mulong Rish wadinga nich machuku ma Diampos matan, chinech chafanyina kamu nakash nich program wam. Chawiy lel nakwata mupak wa kwizwish fomu wam ni kumutum.” Chasambishay ngond winiwa, ndiy witekina rutong ra kupakish kusambish dilejan dia Baibel. Ov watwisha? Mwawiy, pawanyishay asaa 52 a kupan uman mwi ngond winiwa! Ov yom ik yalonday? “Kudi yiyukish yipandakena kuwap chisu tukata kusal usu wa pakampwil.”
8 Ov yiyukish ik yikutwisha kwikal ni dijuku dikata kusadil pamwing mudimu wa uchibol? Dijuku dimwing dia antu anying asala mudimu wa uchibol mwi Ndol wa muvu wadiap ou amana ngond winiwa mud ngond ufanyidinau chisu chin chawonsu kuvurikang. Maku walonda anch: “Dichuku ni dichuku twadinga ni yitongijok ya musangar, mulong twading mu uumwing mu mudimu wa kulejan! Kwisambin piur pa mijikit yetu ya dichuku ni dichuku mu mudimu winou kwikadisha chisu cha kudia chisu chimwing cha musangar nakash.” Mwan ikundj walonda anch: “Nasangara kusadil mu mudimu wa chingand pamwing ni Tatuku rubing rawonsu, chisu chikatay kusal mudimu wa ku mujimbu.” Tatuku wawejinaku anch: “Chinidia mutu wa dijuku, nova musangar nakash wa kwijik anch twadinga ni kusadil pamwing mu mujikit wa usey nakash pa chirung chetu.” Ov dijuku diey dikutwish kusal mudimu wa uchibol pamwing? Ov ukutwishanyap kwisambin pamwing mu dijuku ni kutal anch chitwishikin mulong wa chikumbu chen chawonsu kusadil mud ayibol ankwash mu chirung cha Chivurikish?
9 Ov Tukutwish Kusal Rish Ikala Ngond Wetu Upandakena Kuwap? Kwinsambishil kwa 2000, Mudimu Wetu wa Want wipula chipul anch: “Ov Ndol 2000 Ukwikal Ngond Wetu Upandakena Kuwap?” Ov chakul chadinga mutapu ik? Twashikedin uvud ukwau usu. Wading ngond umwing mu twashikena uvud wa ayibol ankwash 7 964. Chikwau kand, twashikedin kand uvud ukwau usu wa asaa, wa magazet twapanina ni wa kuchirikinamu kusu. Ov uvurikin kuzangurok kwadinga mu chikumangen chen pakasikeshinau mijikit ya muspiritu mu chirung cha ngond winiwa wa pakampwil? Ov tukutwish kusal chilik chimwing muvu unou ap kupandakan yitwasadina muvu winiwa? Anch twasal usu etu awonsu pamwing, Rish 2002 ukutwish kwikal “Ngond Wetu Upandakena Kuwap.” Ov mulong wak ching Rish?
10 Kudi yiyingish yaad yikadishina Rish ngond umwing wa mujikit wa pakampwil. Chakusambish, Chivurikish chikusadik kwisudiel kwa Rish, chom chikutwinkisha chisu chivud cha kusambish kamu kuyitazuk antu mud kamu chitwishikina kwinsambishil kwa ngond chakwel eza ni kukumangan. Chakaad, muvu unou Rish ukwet machuku ma kwisudiel kwa rubing matan, chinech chikuyikwash antu akata kusal mudimu wa ku mujimbu ap akata kuya ku shikol kusal mudimu wa uchibol nkwash . Ov ukutwishap kushakam ni kutongin program umwing wa kusadil, nich kusadil kalandrie udia mu wenjil winou? Kusal mudimu wa uchibol nkwash kukutwish kwikal kuswapela kupandakanamu chiutongina. Chilikej, anch witekin program wa kusal asaa 8 mu mudimu wa chingand mu machuku mawonsu matan ma kwisudiel kwa rubing, ukutwish kand kwitekin program wa asaa akwau 10 akuwejinaku mu chisu chikwau chishadilaku mwi ngond chakwel kushiken asaa 50 itinau.
11 Ov chom ik chikutwishau kusal amakurump mu chikumangen chakwel kuyikwash awonsu “kulejan sens dizu dia Nzamb?” Kudishany kuzangurok kusutin ku yikunku ya yikumangan ni ku misamb yen. Antakel a Malejan ma Buku ni ankwash au akutwish kukwat chiyul cha kwisamb nend muntu ni muntu udia mu chirund chau cha dilejan dia buku ni kumukwash. Mazu makemp ma rukat makasikeshina ap yiyul kanang yifanyidina yikutwish kwikal yom yiswiridikina. (Jinsw. 25:11) Avud akuman anch ang akarumun pakemp program wau, akutwish kusanger chisend cha kusadil mud ayibol ankwash. Mu yikumangen yivud, a makurump ni ankwash’a mudimu pamwing ni akajau, ap anch kadiap awonsu, akat kupan chilikej chiwamp mu kusadil pamwing mud ayibol ankwash mu chirung cha Chivurikish. Chinech chikat kuyikasikesh in kulejan avud kwinung pamwing nau. Mulong wa mimbu ya ku mujimbu ap mulong wa mikadil yikwau, in kulejan amwing kakutwishap kwikal ayibol, pakwez akutwish kuyikasikesh kumekesh kujikitish kwau nich kusal kamu yikutwishau mu mudimu wa kulejan pamwing ni antu akwau ashadilaku mu chikumangen.
12 Kutwish kwimanyin pa mutapu ukutenchikau nawamp program kud amakurump. Chifanyidin kutek yikumangan ya mudimu wa chingand pa yisu yimwing yifanyidina mu chirung cha rubing rawonsu ra kabuj. Anch chitwishikin, kalam’a mudimu ukutond kurutu kwa chisu akadivar awanyishina mikadil yitinau mulong wa kutakel yikumangan ya mudimu. Chitin kwirijek nawamp chakwel anch yikumangan yiney kangal yasut aminit 10 kushik ku 15, kutekamu ni kurijek kwa yirund, kwangan materitwar ni dilembil. (Tal Yakul ku Yipul Yen mu Mudimu Wetu wa Want wa Mwinses 2001.) Chifanyidin kurumburil kamu nawamp program mwawonsu wa mudimu ukusalau ngond wa kabuj ku chikumangen chawonsu ni kukudik chijikish chinech kwi ndond kwa kukudikin yijikish.
13 Kufanyidin kwikal teritwar uwanyidina. Kalam’a mudimu ufanyidin kukumangan pamwing ni mukadivar ukata kutal materitwar chakwel kurijek mulong wa kusadil mu teritwar wakad kusadilang chisu ni chisu. Chiwapidil kusal usu wa kuyitan antu akad kwikal kwol kwau, kupan uman wa mu balibal ni ku makashiny ni makashiny, ni kupan uman wa chisu cha urel. Pichifanyidina, in kulejan amwing akutwish kuyikwash kupan uman wa ku telefon.
14 Yikwashany Kusal Kand Mudimu: Ov kudi antu amwing mu teritwar wen akad kusal mudimu wa kulejan rusangu ruwamp kwasutin kal chisu chilemp? Antu inay achidi ni katat mu chikumangen ni akwet kuswir kwa kuyikwash. (Kus. 119:176) Mulong nsudiel ya mangand minam makur ya shej kal piswimp nakash ni mangand masu madi kurutu oku, tukwet diyingish diwamp dia kusal usu wetu wawonsu chakwel kuyikwash antu ikadila kal akad mujikit. (Ro. 13:11, 12) Mu mivu yitan ya kwinyim ey, antu 26 500 ni kusut itiyin muvu ni muvu kutambul ukwash ni kwikal kand akata kusal mijikit. Ov chom ik tukutwisha kusal chakwel kuyikwash antu avud kuvuvurish kand rukat ni ruchingej radingau nich kwinsambishil?—Heb. 3:12-14.
15 Chisak cha amakurump chikutongin yikutwishau kusal mulong wa kuyikwash antu ikadila kal akad kusal mudimu wa kulejan mu chirung cha mivu ya kwinyim ey. (Mat. 18:12-14) Kalam’a ujindj ufanyidin kusal list kupwa kwa kushinshikin mafish ma in Kulejan. Chiwapidil kusal usu wa pakampwil mu ditenchik dia misamb ya ukafung chakwel kupan ukwash. Mukurump umwing umwija nawamp mwin kulejan kanang ap wijikijadinay nend kamu kudiosh pakur ukutwish kuya ni kumwendil, ap kand akutwish kuyit in kulejan akwau kupan ukwash. Pamwing ap antu ileja ni muntu wikala kal wakad kulejanang akwikal kamu chakin ni musangar wa kumukwash paswiridinay ukwash. Nich ruchingej, antu avud ikadila kal akad kulejanang akez kwikal abachikinau kusambish kand kulejan dizu dia Nzamb. Anch awanyish yitinau, kwikil kand chisu chikwau chipandakena kuwap chikutwishau kusambish mud pa chirung cha Chivurikish!—Tal Yakul ku Yipul Yen yidia mu Mudimu Wetu wa Want wa Kalang 2000 mulong wa yirumburil yikwau.
16 Ov Antu Akwau Awanyishin Yitinau Chakwel Kulejan? Yehova uchidandamedin kamu kuyiyukish antwend nich kulet “yom ya usey ya akamichid awonsu.” (Hag. 2:7, NW) Muvu ni muvu tunan ni tunan twa antu akat kuwanyishang yitinau chakwel kwikal in kulejan akad kubatishiu. Ov inay adi anany? Adi an a Atuman’a Yehova ap kand in kwilej Baibel ayila kurutu. Ov mutapu ik twija anch awanyishin yitinau chakwel kwikal in kulejan a rusangu ruwamp?
17 An a Atuman’a Yehova: An avud akat kuyibachikijang anvajau mu mudimu wa ku chikumbu ni chikumbu kwasutin kal mivu, ap anch adi kand kal asambisha kusal mud in kulejan akad kubatishiu. Rish ukutwish kwikal chisu chimwing chifanyidina kud awiy kusambish. Ov mutapu ik wija anch mwaney uwanyishin yitinau? Paj 100 mu Organisés pour bien remplir notre ministère ulondil anch “chisu chipaninay mwan chilikej chiwamp mu mwikadil wend ni ukutwish kulejan patok ritiy rend kusutil kwisamb pamwing ni akwau piur pa rusangu ruwamp, kwikal ubachikinau kud muchim wend kusal mwamu.” Anch utongin anch mwaney uwanyish yitinau, isamba nend umwing wa amakurump adia mu Komite wa Midimu wa Chikumangen.
18 In Kwilej Baibel Awanyishina Yitinau: Kupwa kwa mwin kwilej Baibel kwikal nich ronganyin ni kukumangan ku yikumangan mu chirung cha chisu kanang chifanyidina, ndiy kusot kwikal mwin kulejan wa Want. Anch ukat kwilej ni mwin kwilej mud mwinou, shinshikin yipul yiney: Ov ndiy uyil kurutu, kwambatan nich chimbu chend cha mivu ni ukaliweny wend? Ov wasambishin kal kulejan ritiy rend kud antu akwau mu mulad wa kukashimwish? Ov ndiy wamudjadil kal “muntu musu?” (Kol. 3:10) Ov uwanyishin yitinau mulong wa kwikal mwin kulejan wakad kubatishiu, yidia mu buku Notre ministère paj 98-99? Anch mwawiy, ufanyidin kwisamb ni Komite wa Mudimu wa Chikumangen chakwel asala yitenchik mulong amakurump aad akutwish kwambamb ney pamwing ni mwin kwilej. Anch ndiy uwanyishin yitinau, amakurump inay aad akez kumwijikish anch ukutwish kusambish kuya mu mudimu wa kulejan.
19 Ov Chikwikal Nchik mwi Ndol ni Ndol-Mem? Angond inay akez kwikal ni yau a pakampwil mulong wa mujikit ujim mu mudimu wa chingand. Avud akusala mudimu wa uchibol nkwash mu Rish akutwish kwikal tayad kusal kand mwamu mwi Ndol ap kand ni mwi Ndol-Mem. Mwi Ndol ni Ndol-Mem, tukez kuta muchim cha kusambish ku kupan magazet Tour de Garde ni Réveillez-vous! mu mudimu wa kulejan. Makwet yibudikin ya ukwash mud ik piur pa mwom wa antu akata kumatang! Magazet minam masala mudimu ujim mu kuwanyish kwiwejinaku kushimokishina kumekena mu mangand mawonsu. Chifanyidin kusal usu wa pakampwil mwi Ndol ni Ndol-Mem chakwel kupan magazet kud antu avud nakash pichitwishikina. Itenchika katat chakwel kwipan kamu sens mu mudimu winou.
20 Chitutongidina pa kwiwejinaku kwa mujikit wa kulejan , ov tusotin kuwejinaku uvud wa magazet tukata kutambulang? Mu muvu wawonsu wa mudimu, twatondin Diampos kwikal Dichuku dietu dia kupan Magazet Tour de Garde ni Réveillez-vous! Pakwez, mulong kudi antu avud akusala mudimu wa uchibol nkwash ni avud pakach petu akupan magazet mu angond inay awonsu aad, chikwikal cha usey anch tuwejinaku komand wetu wa magazet. Anch mwamu chidia, mwijikisha amboku nkwash’a mudimu ulamining magazet mu chikumangen chen. Pa chisu chawiy chimwing, nkwash’a mudimu ulamining mikand ufanyidin kushinshikin nawamp anch uvud uwanyidina wa trakt Aimeriez-vous en savoir plus sur la Bible? Chakwel antu awonsu akutwish kumusadil.
21 Antu avud amekeshin kujikitish kwau mulong wa kwikalaku kwa mutu wa mulong “Yitukutwisha Kulond Piur pa Magazet” mu Mudimu Wetu wa Want. Ov watambwil kal ukwash wa yirijek yiney kusutin kwilej mazu ma kusambish nich ma mutapu wa kupan gazet? Ov ukutwishap kusadil yisu yimwing ya mu dilejan dien dia dijuku, mulong wa kwiyijidish nich misamb yiney?
22 Tusalany Usu Wetu Wawonsu pa Chirung Chinech cha Chivurikish: Mud mupostol Paul, tumekeshany kujikitish kwetu kud Yehova mulong wa “chipan chiwamp” nich kwinungin sens mu mijikit ya muspiritu yirijekinau mulong wa chirung chinech cha Chivurikish. Pa chinech, chitufanyidin (1) kukumangan ku chinship cha muvu chipandakena usey, kuvurik Yakudia ya Mwant ya Urel Diakanying, Rish 28, 2002; (2) kuyikwash antu ikadila kal akad kusal mudimu wa kulejan chakwel kuvuvurish ‘rukat [rau] radingau nich pa kusambish’ (Kuj. 2:4; Rom 12:11); (3) kuyikwash anetu ni in kwilej Baibel awonsu awanyishina yitinau chakwel kwikal in kulejan akad kubatishiu; ni (4) kwikal in kwipan sens mu mudimu wa kupalangesh rusangu ruwamp pichitwishikina, ap kand kusal mudimu wa uchibol nkwash mu Rish ni angond a kurutu.—2Tim. 4:5.
23 Tukat kumwit Yehova nich muchim wetu wawonsu chakwel tusala kamu nakash mudimu wa kulejan rusangu ruwamp ra Want mu chirung chinech cha Chivurikish, ni kumekesh mu mutapu winou kujikitish kwetu kujim mulong wa yawonsu yasalay Yehova mulong wetwetu.
[Caption on page 6]
[Picture on page 6]
For chart, see the printed material