Ipuk Kulondul Nakash ‘Yom Yakad Usey’
1 Mulad umwing wijikena nakash wa kupan jinsangu nlel udi kusutin ku Mikand ya ku internet. Ap anch chidi mulong wa kuyilej antu akwau uman wetu ni yitongijok yetu mu dijuku ni kud arund kusutin mulad winou wa kwisamb ukutwish kwikal ufanyidina, ‘yom ik yakad usey’ yikutwishau kunungin ku kusadil kwakad mimbu kwa Mikand ya ku internet?—Jinsw. 12:11.
2 Babal Piur pa Kusadil Mikand ku Internet: Antu amwing akat kulondang patok anch akat kwisamb kamu nawamp ni dirijek dia Yehova chisu chikatau kutambul yikatau kuman mud jinsangu jimwing ja katat kusutin Mikand ya ku Internet. Jinsangu jinej jikutwish kwikal uman, milong kanang piur pa yom kanang yasadikina ku Betel, rapor piur pa mar ap kuzengol, ap kand yijikish ya ujindj yijikishinau ku Shikol ya Mudimu wa Want. Antu akwau asotining kamu nakash kutum jinsangu ja mutapu winou, nich ruchingej ra kwikal muntu wa kusambish kwijikish rusangu riner kud arund nau.
3 Yisu yimwing, jinsangu ap uman yishimuninau akutwish kuyikarumun ap kupandikesh chipim mutapu muyidia. Ap kand mulong wa usu wa kwikal mwin kutadish milong, antu amwing apana chitongijok cha makasu. Chisu chivud antu aswila ku kan chakwel kulejan jinsangu mud jinej kijingap kwau mutapu udia milong yin yawonsu. (Jinsw. 29:20) Yisu yimwing, ap anch rusangu ridi ra makasu, akat kurishimunin mu mutapu umwing uvuvurishina maku ma kusot kwijik. Jinsangu mud jinej ja makasu ap marapor minam ma kurumbul mashikijining ku ‘yishimu ya makasu,’ yakad kukasikeshin kwipan kwa winzamb.—1 Tim. 4:6, 7.
4 Anch wapalangesh rusangu kupwa rez rakarumuk kwikal ra makasu, ukwet chisend cha runeng ni kanvundangesh yikutwisha kubudikinaku. Chisu chatambulay David rusangu ripandikena chipim anch anend awonsu ayijipang kal, ndiy “wapola maswin mend” mu runeng rikash. Pakwez, ukinakin wadinga anch, ching mwanend umwing kusu ndiy wafa. Chinech chadinga bil cha runeng, pakwez kupandikesh kwinoku mu kulejan rusangu kwawejina nakash runeng ra David. (2 Sam. 13:30-33, NW) Chakin kamu kitusotinap kusal chom ap chimwing chikutwisha kumudimb ap kumuziyish umwing wa akadivar netu.
5 Njil ya Kupanin Jinsangu Yitondinay Nzamb: Vurik anch Tatukwetu wa mwiur ukwet njil yitondinay ya kupanin jinsangu, “kashalapol wakin ukweta manangu.” “Kashalapol” winou ukwet chisend cha kushinshikin rusangu ik rifanyidina kupan ku chikumbu cha ritiy, ni kushinshikin kand pa “chisu chiwanyidina” cha kupan rusangu riner. Yakudia yiney ya muspiritu yidiaku tayad ching kusu kusutin ku dirijek dia uteokras. Tufanyidin chisu chin chawonsu kuchingel njil yitondinay Nzamb mulong wa kutambul jinsangu jakin, pikil kusutin kud in kusadil a Internet.—Mat. 24:45.
6 Tupend twa Web: Tukwet kapend ka Web kijikena kwambatan nich mbil: www.watchtower.org. Kapend kinak kafanyidin chakwel kupan jinsangu jifanyidina kud antu. Kwikil kuswir kwa muntu ap umwing, ap komite, ap chikumangen chakwel kutenchik rusangu pa paj wa Web piur pa Atuman’a Yehova. Antu amwing atuma yidiamu ya mikand pamwing nich yipich yawonsu ni mareferans mapaninau ni apanin ap kand makopi ma yom ya chikunguril nich kwengamin pa kutambul milambu ya kwikatin. Kwikalap ukwash ap bwat, kusadil kwa kubudish ni kupalangesh mikand ya Watchtower kusutin mu mukand wa ku Internet kud kujip yijil ya uwinend wa mwin kufund. Ap anch antu amwing akutwish kuman anch chinech chidi kuyikwash akadivar, chifanyidinap bwat ni chifanyidin kupwa kapamp kamwing.
7 Kusadilang kujingunin kuwamp ni kushinshikin kuwamp kwa manangu chisu cha kupan jinsangu kusutin mikand ya ku Internet kukez kumekesh anch manangu metu mizwil nich “dipit diawonsu diwamp dia usey ukash.”—Jinsw. 24:4.