“Endany Nend Nzamb” Chikumangan cha Distrik cha Atuman’a Yehova cha 2004
1 Chom ik chikata kusal yikumangan yetu ya distrik ya pa muvu kwikal ya pakampwil? Ov madiskur makasikeshina ni dram ukatau kuturijekin kud “Kashalapol wakin ukweta manangu”? (Mat. 24:45-47) Ov mikand yisu yikweta yakudia ya mu spiritu pa chisu chifanyidina? Akadivar nau anambaz alejena yamanau piur pa mutapu watwishay Baibel kukarumun mwom yau yikal yiwamp? Ov marapor malejena mutapu uyila mudimu wa kulejan kurutu mu jingand jikwau? Ov urund pamwing nau ambay akaritiy a reng ni reng? Mwaning, tuchingejin nich musangar kurutu oku yikumangan yetu ya distrik mulong wa yiyingish yiney ni yikwau kand yivud!
2 Kumangan Machuku Mawonsu Masatu: Kusutil kud Moses, Yehova wapana mbil anch: “Yikumangejany antu, . . . chakwel niyau atesha, ilej.” (Kuv. 31:12) Kusutil ku chisak cha kashalapol wakin ukweta manangu, Yehova ukat kurijek program wa pakampwil wa mafundish mulong wetwetu pichuku-pichuku ku chikumangan chetu. Mulong ndiy ukat kutufundish mulong wa ‘kuwap kwetu,’ tusotil kwikalaku mulong wa malejan mend mawonsu. (Is. 48:17, NW) Anch uswiridin kwit konje kud mukurump wey wa mudimu, lembil kud Yehova ni mwita mukurump wey wa mudimu, mud mwasalay Nehemi muntu ujijamena. (Neh. 1:11; 2:4, NW) Chikwau kand, anch tukwet anamakwetu akad kwikal akaritiy, chikez kwikal cha rukat kuyijikish program wa chikumangan chetu kurutu kwa chisu mud kamu chitwishikina.
3 Ndond ya Kulal: Arijekin kal chakwel anch antu ezina mu ul mukusadikina chikumangan cha distrik alala ku yikumbu yayen (ya akadivar nau anambaz), mu Yot ya Want ap ku yikumbu ya anamakwau. List wa jindond jawonsu jikusadikina yikumangan ya distrik akumulamik ku rubau ra jinsangu kupwa kwa kushinshikin wenjil winou ku Chikumangan cha Mudimu. Chiyul chidi anch antu awonsu ashinshikin mu malembil ku chikumangan ik cha distrik kukezau kukumangan mu 2004. Anch ukez kusot kushakam kwa yen (kwa mukadivar), ap mu Chot cha Want, tumwitin kalam’a ujindj asal list wa majin ma in kulejan awonsu aswiridina ndond ya kulal kurutu kwa chisu ni kumutum ku Departema wa Kuladik angendj ku ul kukusadikina chikumangan. Chimufanyidin kufund dijin, ni kulejan anch ikundj ap mband, reng, avariken nchik. Chinech chikez kuyinkish akadivar asadila ku Departema wa Kuladik angendj chisu chijim cha kukimb ndond ya kulal mulong wa awonsu. Ang atwinkish ndond ya kulal, chikwikalap chiwamp kwitondin kand ayinetu ndond yindjing ya kulal chakwel kushakam ni mukadivar mukwau ap murund. Chinech chikulet kanrumbangesh ka yom kud antu asadila mu Departema wa Kuladik angendj. Pakwez anch muntu usotil kushakam ni mwanamakwend wakad kwikal mukadivar mu spiritu pa chirung cha chikumangan, chimwitinap kufund ni kutum dijin diend pa fomu wa Kwitin Ndond ya kulal.
4 Kulal mu Chot cha Want: Tuletin panap yany kanang ya mutapu wa kusadil Chot cha Want mud ndond ya kulal. Komite wa Chikumangan cha Distrik ukez kutond mukurump umwing ukwimanyina ditenchik dined. Ukwikal ni muntu wa kumukwash, chisu chivud ukutwish kwikal mukurump mukwau ap nkwash’a mudimu chifuvu mu spiritu. Chifanyidin kwangan chot yikunku yaad. Chimwing cha anambaz ni anau, pamwing ni ayangadim. Chikwau cha akadivar ni anau amakundj. Chot cha Want chifanyidin kuchisadil mulong wa kulal kwapwa. Pa dichuku didiau awonsu kwi ndond kusadikidina chikumangan, akez kutenchik chakwel kwikala atulam akuswinkanijana chakwel kwipuk kwiy yom ya antu. Atulam akusadilau afanyidin kwikal akadivar a muspiritu, antu akashinsh. Chifanyidinap kwisukin ya kudia mu Chot cha Want. akutwish kutung kapayot mu rupang kakezau kusadil mulong wa kwisuk kusu mu chirung cha chikumangan. Kupwa kwa chikumangan, akez kukawupul. Chiwapidil anch chot pamwing ni mu rupang rach yikal yilaminau mu kwinang ni pakad kanvundangesh. Chifanyidin kutal anch kangal kwayip chom ap chimwing. Antu ashichamu afanyidin kusal usu wau wawonsu chakwel kumekesh mwikadil ufanyidina wa in Kristu akin umwing ni mukwau pamwing kand ni antu adia amutej nau.—1 Kor. 10:31.
5 Kambuy Paul wayivurisha yikumangen yadinga mu Galatia “kusal nawamp kudi antu awonsu, pakwez kupandakan kudi anamakwetu in ritiy.” (Gal. 6:10) Akadivar ni anambaz amapal, ayilim, anvaj adia ayinau, atuzwendj ap adia mu mudimu wa chisu chawonsu kakutwishap kukwitany ukwash, pakwez akutwish kwikal nich yikokujol yirishinau nich chakwel kukumangan ku chikumangan. Ov chitwishikin kwol kwey “kusal nawamp” ku mutambu wau ni kuyikwash? Anamakwetu in Kristu ni amakurump afanyidin kubabal pakampwil mulong wa mwikadil wa antu inay.
6 Ditenchik dined didi mulong kusu wa in kulejan akweta mwikadil uyimp, pamwing ni anau akweta yaku yiwamp. Anch Departema wa Kuladik angendj ukwet yipul piur pa mutapu wa kwit ndond ya kulal, akez kumwipul kalam’a ujindj wa chikumangen.
7 Ku chikumangan chasalau antu a Yehova pasutin kal piswimp mivu 2500, Ezra nau ambayend in Levi atanga Dizu dia Nzamb ni ayirumburila antu akumangana. Chom ik chasadika? Nehemi 8:12, NW utulejin anch “antu awonsu aya . . . nich musangar ujim, mulong atesha mazu mayijikishau.” Ov, tukwetap musangar ujim anch chisak cha kashalapol uzizidilau many, mud Ezra nau in Levi, asadidil Dizu dia Nzamb, adirumbiril, ni kulejan mutapu wa kudisadil mu mwom wetu? Mu kusalang mwamu, kashalapol winou umekeshin rukat ra Yehova ni kuyibangin antwend awonsu. Kwat mupak wa kulik kuburen dichuku ap dimwing dia Chikumangan cha Distrik “Endany Nend Nzamb”!
8 Mudimu wa Kwikatin: Atushalapol ashinshamena a Yehova akat kumekesh chisu chawonsu spiritu wa kwipan kusutil ku kwipan ayinau mulong wa mudimu wa kwikatin. Chilikej, chisu chamwitau kwikal muruu wa Nzamb, muprofet Isay wakula swa anch: “Yam unou! Ntumany.” (Is. 6:8, NW) Kurijek ni kutenchik chikumangan, kwitining chisu ni usu. Yikumangen ya mu ul mukusadikina chikumangan yikwaka angendj yifanyidin kwakul nawamp ku maswir ma in kusal mudimu wa kwikatin. Pakampwil amakurump nau ankwash’a mudimu afanyidin kupan chilikej chiwamp pa mulong winou. Rukat retu kud Yehova Nzamb, mulong wa difukwil dishitwila, ni mulong wa akadivar netu rifanyidin kutubachik twipan ayinetu. Kudi chishimu chilondila anch: “Ut ap, ut ap, nnam wafa.”
9 Twitiyany Kusal Mud in Kwikatin: Chisu cha chikumangan, yitot ya in kwikatin yikat kwipanang swa mu kusadil kuwamp kwa madepartema. Akat kuyikwash in kukumangan mwi ndond ya kukumangen ni ndond ya kutek motak ni jinking, kupan ndond ya kushakam ni kulam motak yetu ni jinking muten wawonsu wa kabuj. Departema wa Kwinang ukwet chisend cha kulam katumb ketu kawamp mulong wa kwinang, kulam pa ndond yetu ya difukwil pinangina kupandakan mutapu padinga kurutu kwa kupasadil. Ov tukutwish kuyikwash, ap kukwash madepartema makwikala nich kuswir kwa ukwash wetu? Ov ukez kupan ukwash wey amwiney chakwel kusadil “chikij ku chikij” pamwing nau akadivar ney?—Sof. 3:9, NW.
10 Tukwet kuswir kwa yikumangan yetu yitukwasha kushal ababela mu spiritu, mulong ‘yom ya mangand minam yikat kukarumok.’ (1 Kor. 7:31) Kwirijek chakwel kukumangan dichuku ni dichuku kwitin usu, pakwez kudi kwa usey. Chikumangan cha Distrik cha muvu unou “Endany Nend Nzamb” achirijekin mulong wa kutukwash kushal ajijamena pituchingedina dirumburish dia Yehova piur pa mangand ma Satan. Kangal twashil chom ap chimwing ndond chitukangesh kutambul malejan maturijekidinay Yehova.—Is. 51:4, 5, NW.
[Caption on page 3]
Program
[Caption on page 3]
[Picture on page 3]
Diakatan ni Diampos
9:30 pamanch — 5:10 urel
Diarubing
9:30 pamanch — 4:05 urel
[Caption on page 4]
[Picture on page 4]
Manans mamwing ma kushinshikin pa kuya ni kukumangan ku Chikumangan cha Distrik “Endany Nend Nzamb”
1. Anch ufanyidin kukas weny umwing ulemp mulong wa kukumangan ku chikumangan, sambish kulam nfalang mulong wa kufut ditike diey ni dia dijuku diey, ni ja kuland nich yakudia.
2. Tongin kand kukwash dirijek dia chikumangan nich milambu yey. ‘Kangal muntu ap kusu umwing kwez kurutu kwa Yehova makas a makas,’ pakwez ‘Mulimisha Yehova nich yom yey yawonsu ya usey.’—Kuv. 16:16; Jinsw. 3:9.
3. Tukutumbish dijin dia Yehova nich mwikadil uwamp pa chisu cha chikumangan ni kudjal maswin minangina ni mafanyidina.—1 Kor. 10:31.
4. Sadil kovijan pamwing ni akadivar akweta mudimu wa kwandjik ni kushichik antu. Kangal wakwatin ndond chamwamu, ching kusu mulong wa yid ya dijuku diey ap antu wezina nau pamwing.
5. Pa yisu ya kupim, diang yakudia yipipela mulong wa kutwish kwisakin sens yikunku ya urel. Yakudia yivud ap yilimina yikat kulet tul.—Luka 8:18.
6. Kwinang kukat kumulimish Yehova. Kwisudiel kwa chikunku ni chikunku, muntu ni muntu uwapidil kusal yawonsu yikutwishay chakwel kusha ndond ya chikumangan yinangina nich kunonol mapaper ni yishoshot mulong wa kuyidjibul mu mashitil matekilau mulong wa yishoshot.—1 Pi. 1:15, 16.