Mutapu wa Kupan Buku Chifundishinay Bibil

Wenjil winou ukwet yitongijok kushalijan mulong wa kupan buku Chifundishinay Bibil. Chakwel kwikal utwishina nakash, yilonda mu mazu mey amwiney, londwish minsamb yey kud antu a mu teritwar wey, ni iyijidisha mukulond nich manans madia mu buku. Minsamb yikwau yidia ya ukwash mulong wa teritwar wey ukutwish kand kuyisadil.​—⁠Tal Mudimu Wetu wa Want wa Chiwong 2005, paj wa 8.

Armagedon

◼ “Chisu chiteshinau antu dizu ‘Armagedon,’ avud akat kutongin kusheshik kwa rumb (antu avud). Chikutwish kukushimokish kwijik anch Armagedon chidi kamu chom cha kuchingej nich musangar? [Mulika muntu akula. Kupwa tang Kuburik 16:​14, 16.] Tal kurumburil mutapu ukwikala mwom kupwa kwa Armagedon.” Buril paj wa 82-84, ni tang paragraf wa 21.

Bibil

◼ “Chisu ni chisu antu akat kujimbul Bibil mud Dizu dia Nzamb. Ov, wiyipulap kal mutapu ik ukutwishau kutazuk buku wafundau kud antu anch Dizu dia Nzamb? [Mulika muntu akula. Kupwa tang 2 Pita 1:21 ni paragraf wa 5 pa paj wa 19-20.] Mukand winou upanin yakul ya Bibil ku yipul yiney.” Lejan yipul yidia pa paj wa 6.

◼ “Chisu cha katat, antu atambwil jinsangu jipandikena kusutamu pakur. Pakwez utongin anch kwisu tukutwisha kutan chiyul cha manangu chikutwisha kutukwash, kwikal nich mwom wa musangar? [Mulika muntu akula. Kupwa tang 2 Timote 3:​16, 17 ni paragraf wa 12 paj wa 23.] Mukand winou urumburil mutapu tukutwisha kushakam mu mulad umusangareshina Nzamb ni kutaninamu.” Lejan kart ni chipich pa paj wa 122-123.

Chikumbu

◼ “Mu jindond jivud, kutan ndond ya kushakam yikweta usey uwanyidina chikal kal chikasikena nakash. Utongin anch dichuku dimwing kukez kwikal yikumbu yiwanyidina mulong wa muntu ni muntu? [Mulika muntu akula. Kupwa tang Isay 65:​21, 22 ni paragraf wa 20 pa paj wa 34.] Mukand winou urumburil mutapu kukuwanyina kushilamu kwinoku kwa Nzamb.”

Dijuku

◼ “Etu awonsu tukat kusangar kwikal nich mwom wa dijuku wa musangar. Kimwawiyap? [Mulika muntu akula.] Bibil ulondil chom chikutwishay kusal muntu win mwawonsu mu dijuku chakwel kukwash ku musangar wa dijuku​—⁠kumwiburij Nzamb mu kumekesh rukat.” Tang Efes 5:​1, 2 ni, paragraf wa 4 pa paj wa 135.

Kusheshik/Mar

◼ “Chisu chishikedina kusheshik, antu avud akat kwiyipul anch Nzamb chakin ukat kuyibangin antu ni kuman mar mau. Watongidinap kal pa chinech? [Mulika muntu akula. Kupwa tang 1 Pita 5:7 ni paragraf wa 11 pa paj wa 11.] Mukand winou urumburil mutapu ukudioshay Nzamb mar ma antu chikupu.” Lejan yipul ya kusambish pa paj wa 106.

Malembil

◼ “Wiyipulap kal anch mutapu ik ukatay kwakul Nzamb malembil? [Mulika muntu akula. Kupwa tang 1 Yohan 5:​14, 15 ni paragraf wa 16-18 pa paj wa 170-172.] Mwimbu winou urumburil kand mulong wak tufanyidina kulembil kud Nzamb ni yom ik tufanyidina kusal chakwel atutesh.”

Mwom wa Chikupu

◼ “Antu avud asotil kwikal nich mujimbu uwamp ni mwom wa machiku malemp. Pakwez anch chading chiswapel, ov, wasotang kushakam chikupu? [Mulika muntu akula. Kupwa tang Kuburik 21:​3, 4 ni paragraf 17 pa paj wa 54.] Buku winou wisambidin mutapu tukutwisha kutambul mwom wa chikupu ni mutapu ukwikala mwom chisu chikuwanyina kushilamu kwinoku.”

Njit/Chisambu

◼ “Ndond yawonsu antu achingejin chisambu. Utongin anch ruchingej ra chisambu pa manangand ridi kwau chilat? [Mulika muntu akula. Kupwa tang Kuseng 46:​8, 9.] Mukand winou wisambidin mutapu ukuwanyishay Nzamb rutong riner ni kulet chisambu pa mangand mawonsu mabuj.” Lejan chipich pa paj wa 35, ni shinshikin paragraf wa 17-21 pa paj wa 33-34.

Relijon

◼ “Antu avud asambishin kal kuman marelijon ma mangand kwikal makata kusarumun milong ya antu pa ndond pa kuyipwish. Utongin anch relijon uyitwadil antu mwi njil yiwamp? [Mulika muntu akula. Kupwa tang Mateu 7:​13, 14 ni paragraf wa 5 pa paj wa 145.] Mwimbu winou ushinshikidin yom musamban chakwel kujingunin difukwil ditiyijinay Nzamb.” Lejan dipang pa paj wa 147.

Rufu/Divumbuk

◼ “Antu avud akat kwiyipul piur pa yom yikata chakin kamu kushiken ku rufu. Utongin anch chiswapel etu kwijik? [Mulika muntu akula. Kupwa tang Mulej 9:5 ni paragraf wa 5-6 pa paj wa 58-59.] Buku winou urumburil kand chikurumburika kushilamu kwa Bibil kwa divumbuk mulong wa antu afila kal.” Lejan chipich pa paj wa 75.

◼ “Anch muntu tukatila wafa, chiding kamu chaku cha kusot kumuman kand. Kimwawiyap? [Mulika muntu akula.] Avud atanin dikasikesh mu kushilamu kwa Bibil kwa divumbuk. [Tang Yohan 5:​28, 29 ni paragraf wa 16-17 pa paj wa 71-72.] Mwimbu winou wakwil kand yipul yiney.” Lejan yipul ya kusambish pa paj wa 66.

Yehova Nzamb

◼ “Antu avud amwitiyijina Nzamb akusot kwiyov kwikal nend piswimp. Wij anch Bibil utwitin kusej piswimp ni ndiy? [Mulika muntu akula. Kupwa tang Jakobu 4:8a ni paragraf wa 20 pa paj wa 16.] Mukand winou aurijekin chakwel kuyikwash antu kwilej yivud piur pa Nzamb mu kusadil Bibil wau.” Lejan yipul ya kusambish pa paj wa 8.

◼ “Antu avud akat kulembil mulong dijin dia Nzamb aditumbish, ap adilimish. Wiyipulap kal anch dijin dined diawiy disu? [Mulika muntu akula. Kupwa tang Kuseng 83:18 ni paragraf wa 2-3 pa paj wa 195.] Buku winou urumburil chifundishinay Bibil chakin piur pa Yehova Nzamb ni rutong rend mulong wa antu.”

Yesu Kristu

◼ “Mu mangand mawonsu antu ateshin kal piur pa Yesu Kristu. Amwing alondil anch kadingap kwend muntu wa usey nakash. Akwau amwifukwidil mud Nzamb wa Dikand-Diawonsu. Utongin anch yom twitiyijina piur pa Yesu Kristu yidi ya usey?” Mulika muntu akula. Kupwa tang Yohan 17:3 ni paragraf wa 3 pa paj wa 37-38. Pwitin manangu ku yipul ya kusambish mwishin mwa mutu wa mwimbu.

[Caption on page 5]

[Picture on page 5]

Mitapu ya Kujimbul Ditenchik dia Yipan

“Anch usotil kupan chipan chikemp nlel mulong wa mudimu wetu wa ngand ya kabuj, ni kuchitambul nich musangar.”

“Ap anch mikand yetu ayipanin pakad difut, twitiyijin yipan yikemp mulong wa mudimu wetu wa ngand ya kabuj.”

“Ukutwish kwiyipul mutapu tutwishina kusal mudimu winou. Chidi mulong mudimu wetu wa ngand ya kabuj usadikin nich yipan ya kwikatil. Anch usotil kupan chipan chikemp nlel, nikusangar kuchitambul.”