Mutapu Tukutwisha Kusambish Malejan ma Bibil ni Antu Twinkishininga Magazet
1. Ov, rutong ik tukweta pitukata kupan magazet?
1 Diampos tupanining magazet Chinong cha Kalam ni Réveillez-vous ! mu mudimu wa kulejan. Pakwez, riner riding rizau retu ra kusambish ra kuwanyish rutong retu ra kuyilej antu akweta michim yiwamp uyakin. Kwishin oku kudi yiyul yimwing piur pa mutapu wa kupan buku Chifundishinay Bibil piukeza kuyichirikin antu ni kusambish dilejan dia Bibil. Ukutwishany kuyambatanish nich teritwar wen ni kuyilond mu mutapu ukutwishany. Ukutwishany kusadil mambamb makwau anch makwet yibudikin yiwamp kudi ey.
2. Mutapu ik tukutwisha kusadil mapaj ma kusambish ma buku Chifundishinay Bibil chakwel kusambish dilejan dia Bibil?
2 Sadilany Mapaj ma Kwisambishil ma Buku Chifundishinnay Bibil: Piukuchirika ukutwish kulond anch: “Gazet unakushila upwitidin manangu pa Bibil. Tal mulong wak kutang Bibil kudi kwa usey nakash.” Tangany Isay 48:17, 18; Yohan 17:3; ap verse mukwau wa Bibil ufanyidina. Chawiy lel, kupwa kwa kumulej buku Chifundishinay Bibil ni kumwinkish mwin chikumbu kopi umwing, ukutwishany kusal mwamu:
◼“Bibil utwinkishin ruchingej rakin mulong wa machuku ma kurutu.” Muleja mwin chikumbu paj wa 4-5, ni mwipula anch: “Ov, kushilamu ik usotina kuman anch kuwanyina?” Mupwitina yitongijok mu shapitre wisambidina kushilamu kwa Bibil kwatondangay, ni shinshikinany mu wiswimp paragraf umwing ap maad anch mwin chikumbu usotin.
◼Ap ukutwish kulond anch: “Bibil wakwil ku yipul ya usey nakash ya mwom.” Pwitin yitongijok yend pa paj wa 6, ni mwipula anch wiyipulap kal chimwing cha yipul yidia kwishin kwa paj. Yangany mu shapitre wakwila ku chipul chinech, ni isambinany paragraf umwing ap maad mu wiswimp.
◼Ap ukutwish kumulej mitu yimwing ya milong yidiamu ni kumwipul anch wisu umusangareshina pakach pa mitu yiney. Yangany mu shapitre winou, ni muleja mu wiswimp mutapu wa kwilej Bibil.
3. Ov, mutapu ik tukeza kusambish dilejan dia Bibil anch twapana magazet misambidina (a) kuyip kwa mikadil ya mangand? (b) dijuku? (c) ukinakin wa Bibil?
3 Mushila Chipul Kapamp ka Kusambish Kumwendil: Chifanyidin kand kutek chilal mulong wa kuchirikinamu kwambakedinap. Anch mwin chikumbu witiy magazet, mwipula chipul ni muleja anch ukez kwakul ku chipul chinech dichuku dikwau. Sal usu chakwel wirijeka mulong wa kumuchirikin, ni shinshikin anch ukulimish kukan kwey. (Mat. 5:37) Piukeza kumuchirikin, muvurisha mwin chikumbu chipul, tang ni isambina mu wiswimp chakul chidia mu buku Chifundishinay Bibil. Mwinkisha kopi umwing wa buku chakwel alondwisha piutangina. Yiney yidi kusu yilakej yikemp:
◼Anch gazet wapanina wisambidin kuyip kwa mikadil ya mangand, ukutwish kulond anch, “Chisu nikweza tukwisambin chakul cha Bibil ku chipul chinech, Ov, yikarumuk ik yikezay kulet Nzamb pa divu?” Piukuchirika sadil paj wa 4-5. Ap ukutwish kand kumwipul anch, “Ov, yinship ya mar yidi rusot ra Nzamb?” Piukuchirika, muleja mwin chikumbu paragraf wa 7-8 mu shapitre wa 1.
◼Anch gazet wapana wisambidin milong ya dijuku, kurutu kwa kuya ukutwish kumwipul anch: “Chom ik chikutwisha kusal chid ni chid cha dijuku chakwel mwom wa dijuku wikala usangareshina nakash?” Piukeza kumuchirikin shinshikin paragraf wa 4 mu shapitre wa 14.
◼Anch gazet wapana wisambidin ukinakin wa Bibil, ukutwish kumwipul mwamu mulong wa kwisamb nend dichuku diukweza, “Ov, Bibil udi wakin pisambidinay milong ya siyans?” Piukeza kumuchirikin shinshikinany paragraf wa 8 mu shapitre wa 2.
4. Chom ik tufanyidina kusal anch mwin chikumbu walik kwend buku Chifundishinay Bibil?
4 Kwisudiel kwa minsamb, ipul chipul chikwau ukeza kwakul dichuku ukuchirika. Anch dilejan dia Bibil diajik mij, shinshikinany buku kudiosh kwisambishil djat kwisudiel. Chikwikal nchik anch mwin chikumbu ulikin kwend buku Chifundishinay Bibil? Ukutwish kudandamen kand kumuletin magazet ni kwisambin nend piur pa Bibil. Piukata kukudish kusanger kwend, ukutwish kwitiyij dichuku dikwau dilejan dia Bibil.
5. Mulong wak tufanyidinap kwimen ching kusu pa kuyinkish antu magazet?
5 Chinong cha Kalam ni Réveillez-vous ! yikutwish kulangwish maku ma muntu chakwel ileja chifundishinay chakin kamu Bibil. Chawiy lel, sal usu wa pakampwil chakwel usambisha malejan ma Bibil pamwing ni antu itiyijina magazet. Anch twasal mwamu, tukez kuziyil kwi mbil ya Yesu anch: “uyikadishany in kwilej, . . . wend uyilejany.” (Mat. 28:19. 20).