Rutong ra Usey ra Muvu Usu wa Mudimu

1. Ov, rutong ik tufanyidina kwitekin mu muvu usu wa mudimu?

¹ Tufanyidin kwitekin ntong anch tusotin kuya kurutu mu spiritu. Ov, ntong ik witekidina kal mulong wa muvu usu wa mudimu? Rutong ripandakena kuwap ridi ra kwikal chibol nkwash mwin ngond umwing ap angond kanang. Mudi mujikit winou usangareshina witining kwitenchik kurutu kwa chisu, katat chidi chisu chiwamp cha kusambish kuutongin. Mulong wak chifanyidin kwitekin mudimu wa uchibol nkwash mudi rutong?

2. Mulong wak tufanyidin kwitekin mudimu wa uchibol nkwash mudi rutong?

² Mayingish ma Kusal Mudimu wa Uchibol Nkwash: Mudimu wa uchibol nkwash utukwashin kumusangaresh Tatukwetu wa mwiur “kakwau ni kakwau” mu kusal yisu yivud mu mudimu wa kulejan. (1 Tes. 4:1) Anch twashinshikin yawonsu yatusadilay kal Yehova, michim yetu yikat kutubachik kuyilej antu akwau piur pend. (Kus. 34:1, 2) Yehova umen ni ukwatin nich usey kwipan kwetu mulong wa kusal mudimu ukash mu mudimu wa kulejan. (Heb. 6:10) Kwijik anch tumusangareshin Yehova kusutil ku mudimu wetu ukash kutusangareshining nakash.—1 Jins. 29:9.

3, 4. Tukat kutaninamu nchik mu mudimu wa uchibol nkwash?

³ Yisu yivud, anch wasal nakash chom kanang, ukuman chasambish kukuswapel ni kukusangaresh nakash. Kusal yisu yivud mudimu wa kulejan kukez kukwinkish want ipey wa kulond nawamp ku chis ni chis. Ukez kwikal nich ukaliweny ujim wa kusambish minsamb ni wa kusadil Bibil. Kwisambin nakash yitiyij yey, kukusal ritiy rey rikala rikash. Antu avud kadingap ni kutakel dilejan dia Bibil atwisha kusambish dilejan ap dimwing pasalau mudimu wa uchibol nkwash.

⁴ Mudimu wa uchibol nkwash ukutwish kwikal kand dikasikesh difanyidina mulong wa kwipuk mwikadil wa kuburen kukul mu spiritu. Muntu umwing wadinga pasak chibol wa rawonsu wiyova anch wadinga utekin nakash kashony pa mudimu wa ku mujimbu wakwata mupak wa kusal mudimu wa uchibol nkwash ngond umwing. Walonda anch: “Nashimoka nakash mutapu ngond winou umwing wankasikeshay mu spiritu! Nakwata mupak wa kusal mudimu wa uchibol nkwash pakad kwimik, kwawiy kwanshikija ku kwikal kapamp kakwau chibol wa rawonsu.”

5. Ov, mutapu ik tukutwisha kupandakan yovil ya kwiyov anch tukutwishap?

⁵ Kupandakan Yikangesh: Antu amwing akat kwidjidjek kwizwish fomu wa kusal mudimu wa uchibol nkwash mulong amen anch aburedin ukaliweny wa kulejan. Ang yawiy ukangedina kusal mudimu wa uchibol nkwash, Yehova ukukukwash mudi mwamukwashay Yeremiy. (Yer. 1:6-10) Ap anch Moses wadinga ni “kulond pakemp-pakemp ni rudim . . . rilimina” Yehova wamusadina mulong wa kuwanyish rusot Rend. (Kub. 4:10-12) Ang umen anch ukutwishap, mulembila Yehova akukasikesha.

6. Ov, mutapu ik chitwishikina kusal mudimu wa uchibol nkwash ap anch kudi milong ya ukash wa mujimbu ap anch ukwet program ukwatikena?

⁶ Ov, widjidjekin kwizwish fomu wa kusal mudimu wa uchibol nkwash mulong wa kuyip kwa ukash wa mujimbu ap mulong wa midimu yivud? Anch udi chilim, kusal yom kwambatan nich usu wey ku kukutwishish kusal mudimu wa uchibol nkwash. Anch ukwet program ukwatikena nakash, ukutwish kuman mutapu wa kushemunin midimu yakad usey kwi ngond mukwau. Antu amwing asadila mudimu wa ku mujimbu wa chisu chawonsu atwisha kwitekin chisu cha kusal mudimu wa uchibol nkwash ku kusend dichuku dimwing ap maad ma konje.—Kol. 4:5.

7. Ov, mulong wak chidia cha usey kutek mudimu wa uchibol nkwash mu malembil?

⁷ Mutapu wa Kuusal: Tek rusot rey ra kwikal chibol nkwash mu malembil. Mwita Yehova chakwel ayukish usu wey usadina mulong wa kwipan mu mudimu wey wa kulejan. (Rom 12:11, 12) Ndiy ukutwish kukukwash ukwata mupak wa manangu piur pa mutapu ukutwisha kutenchik program wey. (Yak. 1:5) Anch uburedin rusot ra kwikal chibol nkwash, mwita Yehova akukwasha chakwel usangera mudimu wa kulejan.—Luka 10:1, 17.

8. Mutapu ik kusadil Jinswir 15:22 ku kutwisha kukukwash kusal mudimu wa uchibol nkwash?

⁸ Isambinany piur pa rutong ra kusal mudimu wa uchibol nkwash mu dijuku. (Jinsw. 15:22) Pamwing ap chid chimwing cha dijuku chikutwish kusal mudimu wa uchibol nkwash nich ukwash wa antu akwau mu dijuku. Isamba pamwing ni antu akwau mu chikumangen piur pa rutong rey ra kusal mudimu wa uchibol, pakampwil antu akweta mikadil mudi yeyey. Kusal mwamu kukutwish kulangwish musangar wa kusal mudimu wa uchibol nkwash.

9. Angond ik ukutwisha kutond mulong wa kusal mudimu wa uchibol nkwash?

⁹ Piushinshikidina program wey wa uteokras wa muvu usu wa mudimu, chisu ik utongina anch ukutwish kusal mudimu wa uchibol nkwash? Anch usadin mudimu wa ku mujimbu wa chisu chawonsu ap anch uchidi ku shikol, ukutwish kushinshikin angond akez kwikal nich machuku ma konje ap akweta machuku ma Diampos matan ap ma Diarubing matan. Chilakej, Mwinses, Kachirikin, Rish, ni Kafumpul akwet ma Diampos ni ma Diarubing matan. Ngond wa Ndol-Mem ukwet ma Diampos matan, ni Kalol ukwet ma Diarubing matan. Anch ukwet milong ya ukash wa mujimbu, shinshikin angond akweta chisu chiwamp. Ukutwish kand kusal mudimu wa uchibol nkwash mwi ngond ukatay kalam wa munyimuku kwendil chikumangen chen. Pakatay kushik, ukez kwitapil dilau dia kukumangan ku chikunku cha kusambish cha chikumangan chisadilingay ni ayibol a rawonsu. Chivurikish chikeza kusadik pa Rish 22 muvu wezina ou, Rish, Ndol, ni Ndol-Mem adi angond awamp mulong wa kusal mudimu wa uchibol nkwash. Anch watond ngond ap angond usotina kusal mudimu wa uchibol nkwash, sambish kufund pa program anch ukez kutwish kuwanyish a saa itinau.

10. Chom ik ukutwisha kusal anch chitwishikinap kusal mudimu wa uchibol nkwash?

¹⁰ Ang wiyovil anch ukutwishap kusal mudimu wa uchibol nkwash mu muvu wa mudimu wezina ou, ukutwish kand kukudish spiritu wa uchibol mu mudimu wa chingand. Dandamen kusal yiukutwisha kusal mu kulejan, nich ruchingej ra kwel anch Yehova usangaredin usu wey usadina nich mupim wey wawonsu mulong wa kusal yawonsu ukutwisha kusal mu mudimu wend. (Gal. 6:4) Ikal mwin kuyikwash, ni yikasikesha antu atwishina kusal mudimu wa uchibol nkwash. Pamwing ap ukutwish kutenchik program wey mulong wa kuwej dichuku dikwau pa rubing mulong wa kulejan pamwing ni antu asadina mudimu wa uchibol.

11. Ov, mulong wak tufanyidin kwikal nich chitong cha kuswapej?

¹¹ Antu a Yehova ij anch tudi pa chisu cha kuswapej. Kudi mudimu ufanyidina kusal—Kulejan rusangu ruwamp. Mwom wa antu udi mu chak, chisu chashal kal chikemp. (1 Kor. 7:29-31) Kumukat Nzamb ni mutej netu kukez kutubachik kusal yawonsu tukutwisha kusal mu kulejan. Kusutil ku kusal usu ni kutenchik kuwamp, tukutwish kusal mudimu wa uchibol nkwash ap ngond umwing pa muvu usu wa mudimu—rutong rimwing ra usey kamu!