Tukudishany Ukaliweny Wetu mu Mudimu wa Kulejan—Mu Kufund Yom Kanang ya Muntu Wamekesha Musangar

“Babal ey amwiney, babal kand ku malejan mey.” (1 Tim. 4:16) Chiyul chinech chapepilau cha kambuy Paul chamuyulay Timote chimekeshin anch ap anch tudi in kulejan asu ap tukwet ukaliweny, tufanyidin kusal usu chakwel tuya kurutu. Mitu ya milong yisu yikez kubudik mu Mudimu Wetu wa Want ni yikez kwikal nich mutu wa mulong ulondina anch: “Tukudishany Ukaliweny Wetu mu Mudimu wa Kulejan,” yawiy yikeza kutukwash chakwel tusala mwamu. Mutu ni mutu wa mulong ukez kwisambin pa yom ya usey ni ukupan yiyul yimwing ya kusadil pa mutapu wa kuukasikesh. Etu awonsu atukasikeshin kupwitin jinkeu pa ukaliweny winou wa pakampwil pa ngond in yang. Pa kupwa kwa ngond, chikunku cha Chikumangan cha Mudimu chikez kutwinkish chisu cha kwisambin mutapu twatanidinamu kusutil ku kushinshikin pa yom yiney. Atukasikeshin kufund majin ma antu amekesha musangar pa ngond winou.

Chidi cha Usey: Chakwel tuwanyisha chisend chetu, tufanyidin kusal nakash mu mudimu wa kulejan. Tufanyidin kuyichirikin antu awonsu amekesha musangar chakwel tuyifundisha ni twichila mem pa jimbut ja uyakin jitwakuna. (Mat. 28:19, 20; 1 Kor. 3:6-9) Chinech chitin kumutan kand muntu, kwisamb nend pa milong yend yimutadina ni kukasikesh mambamb twisamba nend. Chawiy lel, chisu tumutanina muntu umekeshina musangar, chidi cha usey kufund yom kanang piur pend.

Mutapu wa Kusadil:

• Ikal nich kashinsh anch ukwet yom ya mudimu wey wa kulejan mu sakosh chakwel ufunda dijin diend ni yom yimusangareshina. Lam nawamp yom yiwafunda, tenchik nawamp ni muchirikina pa dichuku dia ngond diwafunda. Kupwa kwa kufund yom yiney pikil walab kumuchirikin.

• Fund jinsangu jimutadina mwin chikumbu. Ov, ukufund dijin diend ni jinsangu jikwau mudi adres wend, nimero wa telefon ap adres e-mail? Ov, yom ik wamana yimekena patok piur pend ni piur pa dijuku diend?

• Fund kachom ni kachom piur pa minsamb yey. Ov, verse ik watangina? Ov, yom ik yalonday piur pa yitiyij yend? Ov, mukand ik wamushila? Fund chisu, dichuku dia pa rubing ni dichuku dia ngond ukumuchirikina.

• Fund yom ukurijeka mulong wa chisu chikwau. Ov, yom ik wakana kwisamb nend? Ov, chisu ik wamulejina anch ukumuchirikin?

• Fund kurutu chisu ni chisu cha kumuchirikin. Kangal wafunda jinsangu jakad kumusangaresh.

Pakish Kusal Mwamu pa Ngond:

• Chisu ufundina yom yiney, ukuyilejamu in kulejan awonsu ukusala nau yom yiwafunda.