Tukudishany Ukaliweny Wetu mu Mudimu wa Kulejan—Mu Kumekesh Musangar wa Pakampwil

Chidi cha Usey: Yesu wamumanaga muntu ni muntu panrend ni wamumekeshininga rukat ra pakampwil. Chilakej, yisu yimwing Yesu wayovila ushon antu afisha, chawiy chamwokay muntu kanang, ndiy wamwokina ku ujindj ni wamudiosha mu chisak cha antu waya nend kuns. (Mar. 7:31-35) Ndiy wayimekeshina in kwilej end kalimish kusutil ku kwijik mipak yau ni kayovishap runeng nakash. (Yoh. 16:12) Chikalap nchik ndond yend yikwetay mwiur, Yesu umekeshining musangar wa pakampwil. (2 Tim. 4:17) Pitudia in kwilej a Kristu, tusotining kumwimburij. (1 Pita 2:21; 1 Yoh. 3:16, 18) Chikwau kand, tukez kwikal nich yibudikin yivud mu mudimu wetu wa kulejan anch twamumekeshin mwin chikumbu kalimish ni kushinshikin pa mikadil yend, pa musangar wend ni pa milong yend. Ndiy ukez kutesh nakash anch waman anch twezinap ching kusu kumulej uruu ap kumushil mikand, pakwez tumumekeshidining musangar wa pakampwil.

Mutapu wa Kusadil:

Ikal mwin kwirijek nawamp. Mwin kwitudish, mwin masip ni murund.
Ikal mwin kushinshikin yom. Ov, umen anch muntu winou ukwet an? usangaredining kudim ap kulam annam? ukwet yitiyij kanang ya marelijon? Pamwing ap ukutwish kurijek mazu mey ma nsambishil kwambatan nich mikadil yend.
Mwipula chitongijok chend ni mutesha nawamp pakad kumukaturij. Mutala palondinay mulong wa kumekesh anch uteshin yom yilondinay. Mujikitish mulong wa kwakul kwend anch chitwishikin kusal mwamu. Ipuk kumekesh anch yeya wija yom yivud.
Ikal mwin kwambatesh yom. Anch chitwishikin rijek mazu mey ma nsambishil chakwel wisambina pa milong ya muntu winou. Chikutwish ku kuswapel kusal mwamu anch wasadil matrakt, mabroshir ni magazet metu misambidina pa mitu ya milong kushalijan. Anch wamwendila muntu pa chisu chakad kuwanyin, mudi pa chisu chikwatikenay, ijik mulong winou ni kepish minsamb yey.

Pakish Kusal Mwamu pa Ngond:

Ijidishany pa chisu cha difukwil mu dijuku ap piudia mu mudimu wa kulejan pamwing ni mwin kulejan ufanyidina kwambatesh minsamb yend nich yom yilondinay mwin chikumbu.
Pa chisu cha yikumangan yimwing ya mudimu wa chikand, mukadivar utakedila ukutwish kwisambin ap kulejan mitapu ya kumekeshin musangar wa pakampwil.