Tukudishany Ukaliweny Wetu mu Mudimu wa Kulejan—mu Kumwakul Mwin Chikumbu Ujimena

Chidia cha Usey: Antu avud tutanininga mu mudimu wa kulejan akweting kalimish. Pakwez, Yesu wabwaka anch antu amwing akez kutukis. (Yoh. 17:14) Chawiy lel, chidiap cha kukashimuk anch twatan mwin chikumbu ujimen. Anch mwikadil winou watushiken, tufanyidin kumwakul mu mutapu umusangareshina Yehova, mulong tusadin mu dijin diend. (Rom 12:17-21; 1 Pita 3:15) Kusal mwamu kukez kukangesh kushiken ku kupwitijan. Kukez kupan kand uman kudi mwin chikumbu ni kudi antu awonsu atutadina, kusal anch asangera kutesh kand pakezau kuyendin kapamp kakwau kudi Atuman a Yehova.—2 Kor. 6:3.

Mutapu wa Kusal:

Lam chisambu ni mekesh chifu cha urund. Chinech chikukwash kupwish mwikadil winou ukash. Kangal washinshikin pa ujim wa mwin chikumbu. (Mul. 7:9) Ukutwish pamwing ap kwov ujim mulong wa milong yend amwinend ap wamwendila pamwing ap pa chisu chimwing chiyimp. Ap anch ukutwish kujiman mulong wa uruu wetu, pamwing ap amudimba.—2 Kor. 4:4.
Akul nich manangu ni ranaken. (Jinsw. 15:1) Ov, wamukaturisha pa tul ap wamukaturija kulond? Ap anch tukutwishap kwit dilikishin mulong wa mudimu wetu, ukutwish pamwing ap kwit dilikishin nich kwikepish mulong wamwendila pa chisu chakad kuwanyin. Ov, ujimen mulong wateshin yom yiyimp piur petu? Anch chidi mwamu ukutwish kulond anch: “Nikutwish kwijik chom chikovishina ujim. Pakwez, chimeken anch yom yiwatesha piur petu yadingap yakin. Ov, nikutwish kukurumburil?” Ov, walika yitiyij yetu, pa mulong utadina kumwopat muntu mu chikumangen ap pa mulong wa mash? Ukutwish kulond anch: “Nakutesh kal. Antu akwau alonda niyawiy milong yiney. Ov, nikutwish kukulej mutapu mulejenau yom yiney mu Bibil?”
Anch muntu ulikin kamu kwend, chiwapidil uya kwey pakad kupakish kupwitijan nend. Anch ulondin anch kasotinap kumwendil kapamp kakwau kudi Atuman a Yehova, ukutwish kumulej anch tukulimish rusot rend.

Pakish Kusal Mwamu pa Ngond:

Salany yikunku yiney pa chisu chen cha kwifukwil mu dijuku.
Kupwa kwa kudiokal ku chikumbu cha muntu ujimena, isamba ni mbay ney wa mudimu piur pa mutapu ukutwisha kumwakul nawamp.