Salany Anch ‘Muzuzu wa [Yah]’ Udandamena Kwak

1. Mutapu ik urumburilau rukat rakin mu Bibil?

‘MUZUZU wa rukat uding mud kasu ka chivud, muzuzu wa [Yah.] Mem mavud kimakutwishap kujimish rukat, ap mawit majim kimakutwishap kurujiyish.’b (Mum. 8:6, 7) Winou ud mutapu uwamp nakash urumburilau rukat rakin! Mazu minam makwet uyakin uyinkishina ambay a uruw kashinsh anch: akutwish kwikal ni rukat rukash umwing ni mukwau.

2. Yom ik yifanyidinau ambay a uruw kusal mulong wa kwikal nich kashinsh anch rukat rau riyilap mu kutalal?

² Chiyitin ambay a uruw kusal usu mulong wa kukatijan umwing ni mukwau mu mwom wau wawonsu. Chilakej, kasu kakutwish kudandamen kwak anch muntu wadandamen kukundakesh nkuny. Anch kwikil muntu ukundakeshina nkuny, kasu kakutwish kujimik. Chilik chimwing, rukat rudia pakach pa ikundj ni mband rikutwish kudandamen kwikal rikash chikupu anch akasikesh urund wau. Yisu yimwing, ambay a uruw akutwish kwiyov anch rukat rau riyil mu kutalal, pakampwil anch arishin ni milong ya kuburen nfalang, mayej, ap yikokujol yidiokila ku kulil an. Chawiy anch ud ngatan ap ngachik, mutapu ik ukutwisha kusal anch ‘muzuzu wa [Yah]’ udandamen kwak mu uruw wey? Mu mutu wa mulong winou, tukwisambin mitapu yisatu mulong wa kulam urund ukash mu uruw ni kwikal ni uruw ukweta musangar.c

DANDAMENANY KUKASIKESH URUND WEN NI YEHOVA

3. Urund ukash ni Yehova ukutwish kuyikwash mutapu ik ambay a uruw kulam rukat rau rikash? (Mulej 4:12) (Tal kand chipich.)

³ Mulong wa kusal anch ‘Muzuzu wa [Yah]’ udandamena kwak, ikundj ni mband afanyidin kusal usu pamwing wa kukasikesh rukat rau ni Yehova. Kusal mwamu kukutwish kuyikwash mutapu ik mu uruw wau? Anch ambay a uruw akwat nich usey urund wau ni Tatukwau wa mwiur, chisu chawonsu akusambish kusadin yiyul yend. Kusal mwamu kukuyikwash kwipuk ni kupandakan milong yikutwisha kusal anch rukat ra umwing ni mukwau risambisha kutalal. (Tang Mulej 4:12.) Antu akweta urund ukash ni Yehova akat kusal usu wa kumwimburij ni kukudish mikadil yiwamp mud kudimuk, kushimpish muchim, ni kulikishin. (Efes 4:32–5:1) Ambay a uruw amekeshina mikadil mud yiney, akat kusal anch rukat rau ridandamen kupam. Nambaz Lena watau kwasut kal mivu 25 ulondin anch, “Chiswapeling kumukat ni kumulimish muntu umukatina Yehova.”

4. Mulong wak Yehova wamutonda Josef ni Mariy kwikal anvaj a Mesia?

⁴ Shinshikin chilakej cha Bibil. Chisu chading chikimbinay Yehova kutond ambay a uruw afanyina kwikal anvaj a Mesia, wamutonda Josef ni Mariy a mu dijuku dia David. Mulong wak? Awonsu aad ading ni urund ukash ni Yehova, ni Yehova wamana anch uruw wau wafanyina kwimen pa rukat rau mulong wendendiy. Ambay a uruw, yom ik ukutwishana kwilejin ku chilakej cha Josef ni Mariy?

5. Yom ik yikutwishau ambay a uruw kwilejin ku chilakej cha Josef?

⁵ Josef walondula umutakel wa Yehova, ni chinech chasala anch ikala ikundj muwamp. Piswimp tupamp tusatu, watambula umutakel wa Yehova piur pa dijuku diend. Kapamp kin kawonsu waziyinang, ap anch chading chimukasikedin. (Mat. 1:20, 24; 2:13-15, 19-21) Kusutin kulondul umutakel wa Nzamb, Josef wamuchidija Mariy, wamukwasha, ni wamubangina. Tongijokin mutapu yisal ya Josef yasala anch chimuswapel Mariy kumukat ni kumulimish! Angatan, ukutwishan kumwimburij Josef kusutin kukimb chiyul cha Bibil piur pa mutapu wa kubangin majuku men.d Anch wasadinan chiyul chinech ap anch chikasiken, ukumekeshany anch uyikatinany akajen, ni uruw wen ukukasikan. Nambaz umwing wa mu Vanuatu, watau kwasut kal mivu 20 ni kusut, ulondin anch: “Chisu chikatay nfumwam kukimb ni kusadin umutakel wa Yehova, nikat kumulimish chipandakena. Nikat kwiyov anch nid mu diking, ni nichingejidining mipak yend.”

6. Yom ik yikutwishau angachik kwilejin ku chilakej cha Mariy?

⁶ Mariy wading ni urund wa pakampwil ni Yehova; ritiy rend radingap rimedina pa yom yasalangay Josef. Wading wij nawamp Mifund. (Luka 1:46.) Wishilang kand chisu cha kutongijokin pa Mifund. (Luka 2:19, 51) Chakin kamu, urund wa Mariy ni Yehova wamwikadisha mband muwamp nakash. Nlel unou, angachik avud asadin usu wa kusal yom mud mwasalay Mariy. Chilakej, nambaz utazukinau anch Emiko ulondin anch: “Pinading mujich, nading ni chaku cham cha mu spiritu. Pakwez kupwa kwa kwingat, najingunina anch, mulong nfumwam ndiy walembilang ni kutakel difukwil dia mu dijuku, ritiy ram rading rimedin pa yom yasalangay. Najingunina anch nading ni kuswir kwa kwitekin chisu cha kukasikesh urund wam ni Yehova. Chawiy nasambisha kwishil chisu cha kusutish pamwing ni Nzamb wam kusutin kulembil, kutang Bibil, ni kutongijokin pa yom nitangina.” (Gal. 6:5) Angachik, anch wadandamenany kukasikesh urund wen ni Yehova, anfumwen akwikal ni mayingishin ma kukushimekany ni kukukatany.​—Jnsw. 31:30.

7. Yom ik yikutwishau ambay a uruw kwilejin ku chilakej cha Josef ni Mariy piur pa kwifukwil pamwing?

⁷ Josef ni Mariy asala kand usu pamwing mulong wa kukasikesh urund wau ni Yehova. Ading ij usey wa kumwifukwil Yehova pamwing mu dijuku. (Luka 2:22-24, 41; 4:16) Chafanyina kuyikasiken kusal mwamu, pakampwil pading payila dijuku mu kujimb, pakwez atwisha. Chid chilakej chiwamp nakash kud ambay a uruw nlel unou! Anch ukwetany an mud muchadinga kud Josef ni Mariy, chikutwish kukukasikenany kukumangan, ap kwikal ni program wa kusal difukwil dia mu dijuku. Chikutwish kand pamwing ap kukukasikenany kutenchik chisu cha kwilej ap kulembil pamwing. Pakwez vurikany anch, kumwifukwil Yehova pamwing, kukukusejishany piswimp ni ndiy, ni ayinen ukwikalany kand piswimp nakash. Chawiy tekany difukwil pa ndond ya kusambish.

8. Yom ik yikutwishau ambay a uruw arishina ni milong kusal mulong wa kutaninamu nakash mu difukwil diau dia mu dijuku?

⁸ Yom ik ufanyidinana kusal anch ukwetany milong mu dijuku? Chitongijok cha kusal difukwil dia mu dijuku chikutwishap pamwing ap kukusangareshan. Anch chid mwamu, kwinsambishin ukutwishany kwen kwisambinany yom yikemp, ni yisangareshina, yom ukatinana en awonsu kwisambin. Kusal mwamu kukutwish kukasikesh urund wen ni impu ya kumwifukwil Yehova pamwing.

SUTISHANY CHISU PAMWING

9. Mulong wak ufanyidinau ikundj ni mband kusutish chisu pamwing?

⁹ Mulong wa kulam rukat rau rikash, ambay a uruw afanyidin kand kusutish chisu pamwing. Kusal mwamu kukuyikwash kwijik yitongijok ni yovil ya umwing ni mukwau. (Dis. 2:24) Tan yom yajinguninay Lilia ni Ruslan chisu chikemp kupwa kwa kwatijan, kwasut kal mivu 15 ni kusut. Ulondin anch: “Twajingunina anch twafanyinap kutwish kusutish chisu chivud pamwing mud mutwading tutongina. Twading tukwatiken nakash ni midimu ya kumujimbu, ya kurijek chikumbu, ni ya kulil anetu. Twamana anch, anch tusutishinap chisu pamwing ayinetu, twafanyina kwikal palemp palemp.”

10. Mutapu ik ukutwishau ambay a uruw kusadin mbil yidia mu Efes 5:15, 16?

¹⁰ Yom ik yifanyidinau ambay a uruw kusal mulong wa kwikal nich kashinsh anch asutishin chisu pamwing? Ufanyidinan kwitekin chisu ap kusal program wa kusutish chisu pamwing. (Tang Efes 5:15, 16.) Uzondu, mukadivar wa mu Nigeria ulondin anch: “Anch natenchik program wa mijikit yam, nikat kuwejamu chisu nifanyidina kusutish pamwing ni mukajam, ni chisu chinech nikat kuchitek pandond ya kusambish.” (Fil. 1:10) Shinshikin mutapu usadidiningay nawamp nambaz Anastasia, mband wa kalam wa munyingumuku mu Moldavi chisu chend. Ulondina anch: “Nisadining usu wa kusal mijikit yam chisu chikwatakenay nfumwamu ni yisend yend. Kusal mwamu kukat kutukwash kusutish chisu pamwing anch twishadin.” Pakwez yom ik ufanyidinana kusal anch program wen kakwinkishinanap mutapu wa kusutish chisu pamwing?

11. Akila ni Prisil asala mijikit ik pamwing?

¹¹ Ambay a uruw akutwish kwilejin ku chilakej cha Akila ni Prisil, ambay a uruw ading alimishinau kud in Kristu avud akusambish. (Rom 16:3, 4) Bibil kalejenap nsangu jivud piur pa uruw wau, pakwez wovakeshin patok anch asalang mudimu, alejanang, ni ayikwashang akwau pamwing. (Mid. 18:2, 3, 24-26) Chikwau kand, pakatay Bibil kwisambin piur pa Akila ni Prisil, ukat kuyijimbul chisu chawonsu pamwing.

12. Yom ik yikutwishau ikundj ni mband kusal mulong wa kusutish chisu chivud pamwing? (Tal kand chipich.)

¹² Mutapu ik ukutwishau ambay a uruw kumwimburij Akila ni Prisil? Tongijokin piur pa yom ufanyidina kusal pamwing ni mukajey. Ov, ukutwishany kusal yom yiney pamwing pandond pa kuyisal muntu ni muntu panrend? Chilakej, Akila ni Prisil alejanang pamwing. Ov, niyen mwamu ukata kusalany yisu yivud? Akila ni Prisil asalang kand mudimu pamwing. Pamwing ap ey ni mukajey ukwetanyap mudimu umwing, pakwez ov, ukutwishanyap kusal midimu ya kuchikumbu pamwing? (Mul. 4:9) Anch wakwashijanany kuwanyish chisend kanang, ukwiyovany anch usadinany chisak, ni ukwikalany ni mutapu wa kwambamb. Robert ni Linda atijana kwasutin kal mivu 50 ni kusut. Robert ulondin anch: “Kulond uyakin, tukwetingap chisu chivud cha kusutish pamwing mulong wa kwipuwangej. Pakwez anch nikat kowish malong ni mukajam ukat kumakuswon, ap anch nikat kusiy pol ni ndiy wez wasambish kusal nam pamwing, nikat kwov musangar nakash. Kusal mudimu pamwing kukat kutusejish pamwing. Rukat retu rikat kudandamen kupam.”

13. Mulong wa kwikal mu uumwing, yom ik yifanidinau ikundj ni mband kusal?

¹³ Pakwez vurik anch, kusutish chisu pamwing kukutwishap kukasikesh chisu chawonsu uumwing. Mband umwing wa mu Brezil ulondin anch: “Nlel tukwet yom yivud yin kutuletin kampuw, chawiy tukutwish kuwil mu mupit wa kutong anch tusutishining chisu pamwing ni mbay netu mulong tushich nend chikumbu chimwing. Najingunina anch chitin kusal yom yivud kusutamu kwau kwikal pamwing. Chitin kand kuta matu kudiay mukajey.” Shinshikin yom yasalay Bruno ni mukajend Tays, mulong wa kwikal nich kashinsh anch muntu ni muntu util matu kud mukwau. Bruno ulondin anch: “Pitukata kusutish chisu pamwing, tukat kutul matelefon metu ni kusanger chisu tusutishina pamwing.”

14. Yom ik yikutwishau kusal ambay a uruw anch kakatiningap kusutish chisu pamwing?

¹⁴ Pakwez, chid nchik anch ey ni mbay ney wa uruw ukatininganyap kusutish chisu pamwing? Pamwing ap ukatiningany yom yishalijadina, ni ukat kujimeshijanangany umwing ni mukwau. Yom ik ukutwishanya kusal? Shinshikin kand chilakej cha dijuku dia kasu twisambinang kwiur oku. Kasu kakatap kamu kuyem kwinsambishin. Chitin kukakundakesh ni nkuny pakemp pakemp. Chilik chimwing, niyen ukutwish bil kusambishan kusutish pamwing kachisu kakemp kakemp dichuku diawonsu? Salany yom yiukatinanya en awonsu, kangal kusal yom yikutwisha kusal anch upwitamijanany. (Jak. 3:18) Anch wasambishany kusal mwamu, pakemp pakemp rukat ren rikuzubuk kand.

LIMISHIJANANY

15. Mulong wak kalimish kad ka usey nakash chakwel kangal rukat ratalal?

¹⁵ Kalimish kad ka usey nakash mu uruw. Kad mud rinkind ukwashina kasu kudandamen kwok. Pakad rinkind, kasu kakujim swa. Chilik chimwing, anch ambay a uruw kalimishijadinap, rukat rau rikutwish kutalal pakad kulab. Ku mutambu ukwau, ikundj ni mband asadina usu wa kulimishijan umwing ni mukwau akat kukasikesh rukat rau. Pakwez, lam mu manangu anch kutong anch umulimishin mbay ney kurumburikinap kamu anch umulimishin, pakwez chifanyidin kwikal nich kashinsh anch mbay ney wiyovil kamu anch umulimishin. Penny ni Aret akwet mivu 25 mu uruw. Nambaz Penny ulondin anch: “Kulimishijan umwing ni mukwau kukat kutukwash kwovijan nawamp ku chikumbu. Tukatap kwidjidjek kulejijan yom tutongina mulong twij anch muntu ni muntu ukwatin chitongijok cha mukwau nich usey.” Chad, yom ik ukutwisha kusal mulong wa kumukwash mbay ney wa uruw kwiyov anch umulimishin chakin kamu? Shinshikin chilakej cha Aburaham ni Sara.

16. Chilakej cha Aburaham chiyifundishin amakundj yom ik? (1 Pita 3:7) (Tal kand chipich.)

¹⁶ Aburaham wamulimishang Sara. Wateshang yitongijok ya Sara ni walimishang yovil yend. Dichuku dimwing, Sara wading wajimanang kal, chawiy wamuleja Aburaham yom yawonsu yadingay nich ku muchim ni wamufisha kand nich. Ov, Aburaham wamuzazimokina? Bwat. Wading wij anch Sara wading mband uziyidina ni wamunungang nfumwend chikas mu mipak yend. Aburaham wamutesha ni wikasikesha kupwish mulong. (Dis. 16:5, 6) Chilakej chinech chitufundishin ik? En amakundj, ukwetany chisend cha kukwat mipak mulong wa majuku men. (1 Kor. 11:3) Pakwez chom chiwamp ukutwisha kusal, chid kutesh yitongijok ya mukajey kurutu kwa kukwat mupak, pakampwil anch mupak winou ukwikal ni yibudikin padiay ndiy. (1 Kor. 13:4, 5) Yisu yimwing, mukajey ukutwish kwiyov nayimp ni ukutwish kwikal ni kuswir kwa kukulej mutapu wiyovilay. Ov, ukat kulimishang yovil yend ni kuta matu ku yom yikulejinay? (Tang 1 Pita 3:7.) Angela ni Dmitry akwet piswimp mivu 30 mu uruw wau. Angela urumburil mutapu ukatay kumekesh nfumwend anch umulimishin. Ulondin anch: “Dmitry uding chisu chawonsu kwaku mulong wa kwintesh anch najimanang kal ap chisu nikweta kwam kuswir kwa kumulej yom. Ukat kwinshimpishinang muchim ap anch najimanang kal nakash.”

17. Chilakej cha Sara chiyifundishin amband yom ik? (1 Pita 3:5, 6)

¹⁷ Sara wamulimishang Aburaham kusutin kunung chikas ku mipak yend. (Dis. 12:5) Dichuku dimwing Aburaham wasota kuyak angendj amukashimwisha ku chikumbu. Wamuleja Sara kwimik yading yisadinay mulong wa kosh mabot mavud. (Dis. 18:6) Sara wasala mwamu pakad kulab ni wanunga chikas ku mupak wa Aburaham. En amband, ukutwishany kumwimburij Sara kusutin kunung chikas ku mipak ya anfumwen. Anch wasal mwamu, ukukasikesh uruw wey. (Tang 1 Pita 3:5, 6.) Dmitry twisambina kal mu paragraf tudiokila ou urumburil mutapu ukatay mukajend kumekesh anch umulimishin. Ulondin anch: “Nikat kusangerang nakash usu ukatay kusal Angela mulong wa kunung chikas ku mipak yam, ap anch tukwet yitongijok yishalijadina. Ap anch mipak yam yikal ni yibudikin yiyimp, kakatap kwinlond nayimp.” Chakin kamu, chiswapeling nakash kumukat muntu ukulimishina!

18. Kusal usu wa kulam rukat rau chakwel kangal radwut kukat kuyikwash mutapu ik ambay a uruw?

¹⁸ Nlel, Satan ukatin kudwudish rukat mu ma uruw ma in Kristu. Wij anch ang ambay a uruw alik kukatijan umwing ni mukwau, akutwish kand kusambish kwiyauril ni Yehova. Pakwez rukat rakin rikutwishap kudwut! Chawiy, el wikalany mu uruw wen nich rukat mud risambidinau mu Muminy wa Salamon. Kwatany mupak wa kumutek Yehova pa ndond ya kusambish mu mwom wen, sutishan chisu pamwing, ni muntu ni muntu alimish yovil ni maswir ma mukwau. Anch wasalany mwamu, uruw wen ukumutumbish Yehova udia musul wa rukat rakin, ni rukat ren rikudandamen kuzut chikupu mud kasu kadandamedina kuyem.