Ukutwish Kuwanyish Mipak Yey ya mu Spiritu

1. Chikokujol ik charishinau kal nich antu avud pakach petu?

OV, WITEKIDINAP kal mupak wa mu spiritu pakwez chakukasiken kuuwanyish?b Anch mwawiy, udiap amwiney. Chilakej, Philip wading ukatin kuwapish mutapu wend wa kulembil ni tupamp tufanyidinay kusal mwamu, pakwez chamukasikenang kuman chisu cha kulembil. Erika witekina mupak wa kusambish kushik kurutu kwa chisu ku yikumangan ya mudimu wa kulejan; pakwez wadandamena kuswinkan piswimp ku yikumangan yawonsu. Tomáš wapakisha tupamp tuvud kutang Bibil wa kabuj. Ulondin anch: “Mu wiswimp nasangerangap kutang Bibil. Napakisha tupamp tusatu, pakwez yisu yawonsu najaminang kwam mu buku wa In Levi.”

2. Mulong wak tufanyidinap kuziy anch tukwet mipak ya mu spiritu twakad kal kutwish kuwanyish?

² Anch kud mupak witekidina kal pakwez kandikal utwish kuuwanyish, ikal nich kashinsh anch ukangenyap bwat. Yisu yivud ap mupak ukemp witining chisu ni usu nakash mulong wa kuuwanyish. Mulong ni katat ukatin kuwanyish mupak wey, chinech chimekeshin anch ukwatin nich usey urund wey ni Yehova ni ukatin kumusadin nich usu wey wawonsu. Yehova ukwatin nich usey usu usadina. Chakin kamu, kakatap kuchingej anch umwinkish yom wakad kwikal ni mutapu wa kumwinkish. (Kus. 103:14; Mik. 6:8) Chawiy mupak wey ufanyidin kwikal wisikena, ufanyidin kukwatijan ni mutapu udia mashakamin mey. Anch wawiy mutapu udia mupak wey, yom ik chad ukutwisha kusal mulong wa kuuwanyish? El twisambinany yiyul yimwing.

RUSOT RA KUWANYISH MIPAK YEY RID RA USEY

3. Mulong wak rusot rid ra usey?

³ Rusot rid ra usey nakash mulong wa kuwanyish mipak ya mu spiritu. Muntu ukweta rusot ra kusal chom ukweting impu yikash ya kusal usu wa kuwanyish mupak wend. Tukutwish kufanakesh rusot ra kusal yom nich rinkind ubachikina waat kuuyila. Anch rinkind wadandamen kupep, ukutwish kumukwash chabul kushik kuyilay. Ni anch rinkind watut nakash, ukutwish kumukwash kushik ap pakad kulab. Chilik chimmwing, anch tukwet rusot rikash ra kusal chom, chikutwish kutuswapel kuwanyish mipak yetu. David, mukadivar umwing wa mu El Savador ulondin anch: “Anch ukwet rusot ra kusal chom, ukwipan nakash. Ukwikasikesh chakwel kangal chom ap chimwing chikukangesh kuwanyish mupak wey.” Chawiy, yom ik ukutwisha kusal mulong wa kwikal ni rusot rikash ra kuwanyish mipak yey?

4. Yom ik tukutwisha kwit mu malembil metu? (Filip 2:13) (Tal kand chipich)

⁴ Mwita Yehova akukwash kukudish rusot rikash. Kusutin spiritu wend utumbila, Yehova ukutwish kukwinkish rusot ra kuwanyish mipak yey. (Tang Filip 2:13.) Yisu yimwing tukat kwitekin mipak mulong twij anch chawiy chom chiwamp tufanyidina kusal. Pakwez pamwing ap tukwetap kamu impu ya kuuwanyish. Yawiy yom yamushikena nambaz Norina wa mwi ngand ya Uganda. Witekina mupak wa kusambish kutakel dileja dia Bibil, ap anch kadingap kamu kwovila ja kusal mwamu mulong wading wiyovil anch kadiap mulej muwamp. Chad yom ik yamukwasha? Ulondin anch: “Nasambisha kumulembil Yehova pichuku pichuku chakwel ankwash kukudish impu ya kutakel dilejan dia Bibil. Mulong wa kusal kukwatijan ni malembil mam, nasambisha kusal usu wa kukudish ukaliweny wa kufundish. Kupwa kwa angond akemp, najingunina anch nasambisha kukudish impu ya kutakel dilejan dia Bibil. Muvu wawiy winiwa, nasambisha kutakel malejan maad ma Bibil.”

5. Yom ik tukutwisha kutongijokin mulong wa kukasikesh rusot ra kuwanyish mipak yetu?

⁵ Tongijokin pa yom yakusadidinay kal Yehova. (Kus. 143:5) Kambuy Paul watongijokina pa ranaken rijim ramumekeshinay Yehova, ni chinech chamubachika kwipan nakash mu mudimu wa Yehova. (1 Kor. 15:9, 10; 1 Tim. 1:12-14) Chilik chimwing, anch watongijokin nakash pa yom yakusadidinay kal Yehova, yikukubachik kuwanyish mupak wey. (Kus. 116:12) Shinshikin yom yamukwasha nambaz umwing wa mu Honduras kuwanyish mupak wend wa kwikal chibol wa rawonsu. Ulondin anch: “Natongijokina nakash pa mutapu winkatinau kud Yehova. Wankwasha kwikal pakach pa antu end. Ukat kwimbangin ni kwinchidij. Kutongijokin pa yom mud yiney kwasala anch nimukat nakash ni kwakasikesa rusot ra kuwanyish mupak wam.”

6. Yom ik yikwau yikutwisha kutukwash kukasikesh rusot ra kuwanyish mipak yetu?

⁶ Tongin pa yiyukish ukutana anch wawanyish mupak wey. Shinshikin yom yamukwasha Erika twisambinang kwiur oku mulong wa mupak wadingay nich wa kushik kurutu kwa chisu. Ulondin anch: “Najingunina anch naburenang yom yivud nakash kusutin kuswinkan ku yikumangan ya mudimu wa kulejan. Pakwez kushik kurutu kwa chisu kwafanyinang kwinkwash kulangwishijan nau akadivar ni anambaz ni kusutish nau chisu pamwing. Nafanyina kand kutesh yiyul ya ukwash yikutwisha kwinkwash kusanger mudimu wa kulejan ni kukudish ukaliweny mu mudimu winou.” Erika watongina pa yiyukish yikutanay anch wasambish kushik kurutu kwa chisu, ni watwisha kuwanyish mupak wend. Yiyukish ik ukutwisha kutongijokin niyey? Chilakej, anch mupak wey ud piur pa kutang Bibil ap kulembil, tongin mutapu kusal mwamu kukutwisha kukasikesh urund wey ni Yehova. (Kus. 145:18, 19) Anch mupak wey ud wa kukudish mwikadil kanang wa win Kristu, tongin mutapu kusal mwamu kukutwisha kuwapish urund wey ni antu akwau. (Kol. 3:14) Umen nchik anch wasal list wa mayingishin makubachikina kuwanyish mupak wey? Sambish kushinshikin list winou chisu ni chisu. Tomáš twisambinang kwiur oku ulondin anch: “Anch nij mulong wak nikatina kuwanyish mupak kanang, nikatap kwimik kusal usu wa kuuwanyish.”

7. Yom ik yayikwasha Julio ni mukajend kuwanyish mupak wau?

⁷ Sutish chisu pamwing nau antu akukukasikesha kuwanyish mupak wey. (Jnsw. 13:20) Tal yom yayikwasha Julio ni mukajend kuwanyish mupak wau wa kutanduril mudimu wa kulejan. Julio ulondin anch: “Twatonda arund atukasikeshang kuwanyish mupak wetu, ni twawisambinang nau. Avud pakach pau ading awanyishin kal mipak ya mutapu winou, chawiy ading akwet mutapu wa kutwinkish yiyul ya ukwash. Arund netu atwipulang kand piur pa mutapu tutenchikina yom, ni atukasikeshang chisu tukweta kuswir kwa ukwash.”

ANCH TWASHADISH RUSOT RA KUWANYISH MIPAK YETU

8. Mutapu ik yafanyina kwikal anch mud tukat kusalang usu wa kuwanyish mipak yetu ching anch kusu tukwet rusot ra kusal mwamu? (Tal kand chipich.)

⁸ Uyakin ud anch etu awonsu kud machuku mamwing twakading kwov ja kusal chom. Ov, chinech chirumburikin anch tukutwishap kuwanyish mupak wetu? Bwat. Chilakej: Rinkind ukat kukwash nakash kubachik waat kuya kwi ndond uyila. Pakwez usu wa rinkind ushalijadining, ni machuku mamwing rinkind kakatap kupep ap pakemp. Ov, chinech chirumburikin anch chabul kakutwishap kushemunik mulong kwikil rinkind? Bwat. Chilakej, maat mamwing makweting moter; ni makwau makweting yikay. Muntu wawishina ukutwish kusadin yom yiney mulong wa kushik kuyilay. Rusot retu ra kusal yom tukutwish kurifanakesh ni rinkind; machuku mamwing rikutwish kwikal rikash ni machuku makwau rikutwish kushadik. Ni kud machuku mamwing tukutwishap kwov ja kusal chom mulong wa kuwanyish mupak wetu. Chawiy, anch yad mud anch tukat kusalang usu wa kuwanyish mupak wetu ching anch tukwet rusot ra kusal mwamu, ing tukatap kuwanyish mipak yetu. Pakwez mud mutapu ukatay chabul kusadin mitapu yindj mulong wa kushik kuyilay, niyetu tukutwish kusal usu wa kuwanyish mipak yetu ap anch tuburedin rusot ra kusal mwau. Ap anch kusal mwamu kukwitin kusal usu nakash, ukwov musangar nakash anch wawanyish mupak wey. Kurutu kwa kwisambin yom tukutwisha kusal, el twisambinany bil chipul tukutwisha pamwing ap kwiyipul.

9. Ov, chiyipin kusal usu wa kuwanyish mupak wetu anch tukwetap rusot ra kusal mwamu? Rumburil.

⁹ Yehova ukatin anch tumusadin nich musangar ni kwa kwisotin. (Kus. 100:2; 2 Kor. 9:7) Chawiy, ov, tufanyidin kusal usu wa kuwanyish mipak ya mu spiritu anch twovilap ja kusal mwamu? Shinshikin chilakej cha kambuy Paul. Walonda anch: “Nikat kumesh mujimbu wam mar mulong winziyil.” (1 Kor. 9:25-27) Paul wikasikesha kusal yom yiwamp ap anch wading wovil ja kusal yom yindj. Ov, mudimu wa Paul wamusangaresha Yehova. Inge! Ni Yehova wayukisha usu wasalangay.​—2 Tim. 4:7, 8.

10. Kusal usu wa kuwanyish mupak wetu ap anch tukwetap rusot ra kusal mwamu kukat kutuletin yiyukish ik?

¹⁰ Chilik chimwing, Yehova ukat kusangar pakatay kutuman tukat kusal usu wa kuwanyish mupak wetu ap anch tukwetap rusot ra kusal mwamu. Ukat kusangar mulong ap anch chisu chawonsu tukatap kusal yom mulong twovil ja kusal yom yiney, pakwez wij anch tukat kuyisal mulong tumukatin ndiy. Mud mutapu wamuyukishay Paul, Yehova ukutuyukish kand niyetu mulong wa usu tusadina. (Kus. 126:5) Ni anch twaman mutapu Yehova utuyukishinay, tukutwish kusambish kukudish rusot ra kuwanyish mipak yetu. Nambaz Lucyna wa mu Polony ulondin anch: “Kud yisu yimwing nikwovangap ja kuya mu mudimu wa kulejan, pakampwil anch naziyang kal. Pakwez musangar nikata kwov kupwa kwa kulejan chiding chipan chisangareshina nakash.” Chawiy el tumanany yom tukutwisha kusal anch twamburen rusot ra kusal chom.

11. Mutapu ik ukutwishay Yehova kutukwash kusal usu wa kuwanyish mipak yetu?

¹¹ Mwita Yehova spiritu utumbila. Spiritu utumbila ukutwish kutukwash kukudish mikadil tuswirikedina mulong wa kuwanyish mipak yetu, pakampwil anch chom tukimbina kusal chikasiken, ap tukwetap rusot ra kuchisal. Chawiy mwita Yehova spiritu wend utumbila chakwel akukwash kukudish dibuj dia spiritu dikukukwasha kukudish mikadil uswirikedina mulong wa kuwanyish mupak wey. (Luka 11:13; Gal. 5:22, 23) David twisambinang mu maparagraf ma kwiur warumburilang mutapu malembil mamukwasha. Wading ukatin kulimish program wend wa dilejan dia pakampwil. Chawiy wamwita Yehova spiritu wend chakwel atwish kudandamen kusal usu wa kuwanyish mupak wend. Ulondin anch: “Ku ukwash wend, natwisha kwikal ni program muwamp wa kwilej ni kumulimish kand.”

12. Mbil yidia mu Mulej 11:4 yitadin mutapu ik mipak ya mu spiritu?

¹² Kangal wachingel anch kukwez chisu chiwamp nakash chakwel uwanyish mupak wey. Pamwing ap tukwikalap kamu ni chisu chiwamp nakash mu mangand minam mulong wa kuwanyish mupak wetu. Anch twachichingel, tukezap kawanyish mupak wetu. (Tang Mulej 11:4.) Mukadivar Dayniel ulondin anch: “Kwikiling chisu chiwamp nakash. Tukat kwisadinap ayinetu chisu chiwamp nakash anch twasambish kusal yom tutongina.” Pakwez mukadivar Paul wa mu Uganda ulejen diyingishin dikwau difanyidina kutubachik kulik kuladikij yom. Ulondin anch: “Anch twasambish, ap anch chisu chiwapinap kamu nakash, tukat kumwinkish Yehova mutapu wa kutuyukish.”​—Mal. 3:10.

13. Kusambish bil ni tumipak tukemp tukemp kukwet ukwash ik?

¹³ Sambish pakemp pakemp. Tukutwish kuburen rusot ra kusal chom pamwing ap mulong mupak wetu ukasiken nakash kuuwanyish. Anch wawiy mutapu udia mupak wey, umen nchik anch waukatwol mu tuyikunku tukemp tukemp? Anch mupak wey ud wa kukudish mwikadil kanang, umen nchik anch wasambish kuumekesh bil mu tuyom tukemp tukemp? Anch mupak wey ud kutang Bibil mwawonsu, umen nchik anch watek program wa kusambish kutang mu tuyisu tukemp tukemp? Tomáš twisambinang kwinsambishin warisha nakash pa kuwanyish mupak wend wa kutang Bibil wa kabuj mu muvu umwing. Ulondina anch: “Najingunina anch nitekinang chikunku chijim nakash cha kutang mu kapamp kamwing. Chawiy nakwata mupak wa kupakish kand, pakwez kapamp kinak, natenchika kusambish kutang kachikunku kakemp kakemp dichuku diawonsu ni kukatongijokin. Mud chibudikin nasambisha kusanger yom natangang.” Padandamenay Tomáš kusanger yom yatangangay, wasambisha chad kuvudish yom ya kutang. Kupwa watwisha kutang Bibil wakabuj.c

KANGAL WAZIY MULONG WA YIKANGESH YIKUCHIRISHINA KWINYIM

14. Yom ik yikutwisha kutuchirish kwinyim?

¹⁴ Cha ushon, ap anch tukwet rusot ni twikasikeshin, kukutwish kwikal yishiken yikutwisha kutuchirish kwinyim. Chilakej, ‘yishiken yakad kutongin’ yikutwish kutusend chisu twafanyinang kusadin mulong wa kuwanyish mupak wetu. (Mul. 9:11) Tukutwish kurish nich chakamish ap chikokujol chikutwisha kutuziyish. (Jnsw. 24:10) Mujimbu wetu wakad kuwanyin ukutwish niwawiy kutushikij kusal yom yikutwisha kutukangesh kuwanyish mupak wetu. (Rom 7:23) Ap tukutwish kamu kwetu kuziy. (Mat. 26:43) Yom ik yikutwisha kutukwash kupandakan yom yituchirishina kwinyim ap yituziyishina?

15. Anch kwikal yishiken yituchirishina kwinyim, ov, chinech chirumburikin anch twakangany kal kuwanyish mupak wetu? Rumburil. (Kuseng 145:14)

¹⁵ Vurik anch ang kwikal yom yikuchirishina kwinyim, chirumburikinap anch wakangany kal. Bibil ulejen anch milong ni yakamish yikutwish kutushiken. Pakwez umekeshin kand patok anch tukutwish kulank, pakampwil nich ukwash wa Yehova. (Tang Kuseng 145:14.) Mukadivar Philip twisambinang kwiur oku ulondin piur pa kutwish anch: “Nikatap kushinshikin pa tupamp nikata kukangany kuwanyish mupak. Pakwez nikat kushinshikin pa tupamp nikata kwikasikesh mulong wa kuwanyish kand mupak winou.” David twisambinang kwiur oku ulondin anch: “Nikat kwikasikesh kulik kuman yom yinchirishina kwinyim ni yinziyishina mud yikangesh, pakwez nikat kuyiman mud mitapu ya kumekesh anch nimukatin nakash Yehova.” Inge, anch wadandamen kusal usu chikalap nchik yom yikuchirishina kwinyim, ukumekesh anch ukatin kumusangaresh Yehova. Chakin kamu, Yehova ukusangar nakash anch waman usu udandamedina kusal mulong wa kuwanyish mupak wey!

16. Yom ik tukutwisha kwilejin ku yom yituchirishina kwinyim?

¹⁶ Ilejina ku yom yikuchirishina kwinyim. Kimb kwisu yidiokila, ni iyipula anch: ‘Ov, kud yom nifanyidina kuswimp chakwel kangal kwikal kand yom yikwau yikutwisha kwinchirish kwinyim?’ (Jnsw. 27:12) Pakwez yisu yimwing, yom yituchirishina kwinyim yikutwish kumekesh anch mupak twitekina udiap wa chilik chetu mud mutapu twading tutongina. Anch waman anch wawiy kamu mutapu udia yom piur pey, shinshikin kand mupak wey mulong wa kuman anch udandamedin kwikal wisikena kud ey.d Yehova kakukumanap mud wakangany kal mulong uwanyishinap mupak ukusutina chipim.​—2 Kor. 8:12.

17. Mulong wak tufanyidin kudandamen kuvurik mipak twawanyishina kal?

¹⁷ Vurik mipak wawanyishina kal. Bibil ulondin anch: “Nzamb utentamin, ndiy kakutwishap kuvuramen yisalijok yen.” (Heb. 6:10) Chawiy, niyey ufanyidinap kuvuramen. Tongijokin pa mipak wawanyishina kal—mud kwikal murund wa Yehova, kuyilej antu akwau piur pend, ap kutambul dibatish. Mud mutapu waya kurutu ni kuwanyish mipak ya mu spiritu pakur, ukutwish kand kuya kurutu ni kuwanyish mupak wey ukweta katat.​—Fil. 3:16.

18. Yom ik tufanyidina kuvurik patusadina usu wa kuwanyish mupak wetu? (Tal kand chipich.)

¹⁸ Nich ukwash wa Yehova, ukutwish kuwanyish mupak wey mud chabul ushikina nich musangar kwi ndond yiyilay. Pakwez vurik anch ayabul avud akatining kand kusanger yom yimenau pawishinau. Chilik chimwing, paudandamedina kusal usu wa kuwanyish mupak wey wa mu spiritu, kangal wavuramen kutal mutapu Yehova ukukwashinay ni kukuyukish pawikasikeshina kusal mwamu. (2 Kor. 4:7) Anch walik kuziy, ukutambul yiyukish yivud nakash.​—Gal. 6:9.