CHISHANY KU MES!
Mulong Wak Milong ya Politik Yikat Kulet Kwaurik?—Bibil Ulondinap Ik?
Milong ya politik yiletin kwaurok mu mangand mawonsu. Kukwatijan ni kukimbijol kwasadika mu jingand 19 muvu wa 2022 kud Pew Research Center kumekeshin anch “65 pa chitot wa antu apamina kal itiyijin anch mu jingand jau mud kupwitamijan kukash pakach pa antu akwashina yisak ya chipolik.”
Ov, niyey umen anch milong ya politik yikat kulet kwaurik kukash nakash kwi ndond ushicha? Mulong wak yom yiney yisadikina? Ov, mulong winou ukez kupwa? El tushinshikina yom yilondinay Bibil.
Yom yiletina kwaurok
Bibil wasambela kulejan anch pa chirung chetu, chitazukinau anch “machuku ma kwisudiel,” antu avud akwikal ni yisal yikuyibachika alika kwikal mu uumwing.
“Machuku ma kwisudiel makez kwikal ma mar nakash. Antu akez kikal in kwikat ayinau, . . . in kwishimek.”—2 Timote 3:1-3.
Chikalap nchik usu usadinau antu avud mulong wa kukwash maguvernema chakwel masala yom nawamp, pakwez kwikil chom chisadikina kamu nawamp. Antu akwetinga yitongijok ya kubwabwil amening kamu anch chiyikasikedining kamu kusal pamwing mulong wa kupwish milong. Yom yiney yisadikina yikwatijadin kamu ni yilondinay Bibil pasutin kal mivu yivud.
‘Muntu ukat kumuyikel mukwau mulong wa kumumesh mar.’—Mulej 8:9.
Pakwez, Bibil upanin chakul chilondina anch—kud guvernema ukutakelau kud muntu umwing ukupwisha misul yawonsu yisadina anch antu amana mar nlel unou.
Ntakel uwanyidina ukata kutubangin
Bibil umumekeshin patok ntakel umwing wa pakampwil uwanyidina ukutwisha kupwish milong yawonsu: Yesu Kristu. Yesu ukwet usu, ulabu ni ukatin kulet uumwing ni chisambu pa mangand mawonsu.
“Chifanyidin kutentam kuvulijan mu machuku ma mwant, ni chisambu chipalangan kwawonsu.”—Kuseng 72:7.
“Ni michid yawonsu yikez kamusadil.”—Kuseng 72:11.
Yesu ud ntakel muwamp nakash mulong ukat kuyibangin antu ni usotin kuyikwash, pakampwil antu arishina ni yom yakuburen kutentam.
“Ukat kumukamunin chimanamar umutazukina, ni kazwendj kand uburedina mwin kumukwash. Ukat kumwovil chimanamar riy, ni uburedina kand. Ukat kuyipandish atuzwendj. Ukat kuyikwol ku kuzengol ni ku chisum.”—Kuseng 72:12-14.
Tukwitin amboku chakwel wileja yom yivud piur pa Want wa Nzamb, guvernema wa mwiur utakedinau kud Yesu. Kuutwish kutan yiyukish yivud yikuleta want winou ni mutapu ukutwisha kuunung chikas.
Tal video Want wa Nzamb Chom Ik?
Tang mutu wa mulong ulondina anch “Want wa Nzamb—Guvernema Wakad Kukatul Milamu.”