Njit ja Harmagedon Chom ik?

Chakul cha Bibil

Njit ja Harmagedon jid njit jansudiel jikusadika pakach pa maguvernema ma antu ni Nzamb. Maguvernema minam ni antu amakwashina amubwambwidin Nzamb ni katat mu kulik kuziyil ku winyikel wend. (Kuseng 2:2) Njit ja Harmagedon jikupwish kamu shitit winyikel wa antu.​—Daniel 2:44.

Dizu “Harmagedon” adifundin kwau mu Bibil kapamp kamwing mu mukand wa Kujingunik 16:16. Kukwatijan ni uprofet, Kujingunik ulejen anch “ant awonsu” akuyikumangej pa “ndond yipidilau mu win Hebereu anch, Harmagedon,” mulong wa “kurish njit pa dichuku dijim dikurumburishay Nzamb Mwin Dikand Diawonsu.”​—Kujingunik 16:14.

Anany akurisha ku Harmagedon? Yesu Kristu ukutakel chisak cha amasalay a mwiur mulong wa kuyipandakan akankuny a Nzamb. (Kujingunik 19:11-16, 19-​21) Pakach pa akankuny inay pad antu abwambwidina winyikel wa Nzamb ni akad kumulimish Nzamb.—Ezekiel 39:7.

Ov, njit ja Harmagedon jikusadikin ku Moyen-Orient? Bwat. Njit ja Harmagedon jikusadik pa divu diawonsu diakabuj, kadiap kwau ching kwi ndond kanang.​—Jeremiy 25:32-34; Ezekiel 39:17-20.

Harmagedon ufundiningau yisu yimwing anch “Har–Magedon” (mu Hebereu Har Meghiddohnʹ), urumburikin anch “Mukandu wa Megido.” Megido wading musumbu wa mu Isarel wa pakur. Jinsangu ja pakur jitulejin anch njit jikash jasadikinang mwinimwa, kuwejaku ni jinjit jimwing jisambidinau mu Bibil. (Ankalansambu 5:19, 20; 2 Ant 9:27; 23:29) Pakwez, Harmagedon kamekeshinap ndond yakin yading kamu piswimp ni Megido wa pakur. Mu teritwar winawa mwikil kwau mukandu ujim, ap Kabeng wa Jizarel udia piswimp ni kwinikwa kakutwishap kwend kuwanyin antu awonsu akurisha kwi njit ja Nzamb. Pakwez Harmagedon kud kukumangan kwa michid yawonsu ya pa mangand mulong wa kumubwambwil Nzamb kapamp ka nsudiel.

Yom yikwikal mutapu ik pa chisu cha njit ja Harmagedon? Twijap mutapu ukusadinay Nzamb usu wend, pakwez ukwikal ni mat mamwing mud masadinay kand pakur​—mayal, kuzal kwa divu, ruval mukash, kasu ni sufre, milayilay, ni mayej. (Job 38:22, 23; Ezekiel 38:19, 22; Abakuk 3:10, 11; Zakariy 14:12) Mulong akwikal mu kanrumbangesh, akankuny amwing a Nzamb akujipijan ayinau, pakwez akushiken ku kujingunin anch arishin ni Nzamb.​—Ezekiel 38:21, 23; Zakariy 14:13.

Ov, Harmagedon ukujiyish mangand mawonsu? Harmagedon kakusheshap divu dietu, mulong divu yid ndond ya kushakam antu chikupu. (Kuseng 37:29; 96:10; Mulej 1:4) Pa ndond pa kuyijiyish antu, Harmagedon ukuyipandish, mulong “runtu ruvud” ra atushalapol a Nzamb rikupand.​—Kujingunik 7:​9, 14; Kuseng 37:34.

Mu Bibil, dizu “mangand” dimekeshin divu, pakwez yisu yimwing dimekeshin kand antu ayimp amubwambwidina Nzamb. (1 Yohan 2:15-17) Harmagedon ukulet “disudiel dia mangand,” charumburik anch ukuyijiyish antu awonsu ayimp.​—Mateu 24:3.

Njit ja Harmagedon jikusadik chisu ik? Pading pisambidinay piur pa ‘mar makash’ makupwa kwi njit ja Harmagedon, Yesu walonda anch: “Kwikil muntu wija kushik kwa dichuku dinidia ap kwa chisu chinicha. Aruu a mwiur kijap, ap Mwan, ching kusu Tatuku ndiy wija amwinend.” (Mateu 24:21, 36) Pakwez Bibil umekeshin anch Harmagedon ukusadik pa chisu cha kwikalaku kwa Yesu kwakad kumekan ku mes, kwasambisha mu muvu wa 1914.​—Mateu 24:37-39.