Ov, Marelijon Mawonsu Mad Chilik Chimwing? Ov, Mawonsu Matwadin Kud Nzamb?

Chakul cha Bibil

Bwat, marelijon mawonsu madiap mutapu umwing. Bibil ulejen anch kud marelijon mavud makad kumusangaresh Nzamb. Tukutwish kumalong mu milad yaad.

Mulad wa 1: Kwifukwil anzamb a makasu

Bibil wisambidin difukwil dia anzamb a makasu mud yom “ya mwamu,” ‘yakad usey,’ ni ‘ya usup.’ (Jeremiy 10:3-5; 16:19, 20) Yehovaa Nzamb wayileja in Isarel a pasak anch: “Kangal wakikal ni akish kurutu kwam.” (Kubudik 20:3, 23; 23:24) Chisu chifukwilau in Isarel anzamb akwau, “ujim wa [Yehova] wasweja nakash.”​—Kuchind Michid 25:3; In Levi 20:2; Ankalansambu 2:13, 14.

Ni katat Nzamb ukwet chitongijok cha mutapu umwing piur pa kwiyifukwil ‘atazukinau anch anzamb.’ (1 Korint 8:5, 6; Galatia 4:8) Uyilejin antu asotina kumwifukwil anch afanyidin kulik kubombakan nau antu adia mu relijon wa makasu, palondinay anch: “Diokalany, aurikany nau.” (2 Korint 6:14-17) Anch marelijon mawonsu mad mutapu umwing ni mayitwadin antu kud nzamb, chad mulong wak Nzamb uletin chijil chinech?

Mulad wa 2: Kumwifukwil Nzamb wakin mu mutapu wakadiay kwitiy

Yisu yimwing, in Isarel amwifukwilang Nzamb mu kusadin yitiyij ni yaku yidiokila ku difukwil dia anzamb a makasu, pakwez Yehova kitiyap anch abomba difukwil diakin ni dia makasu. (Kubudik 32:8; Kuvurik Yijil 12:2-4) Yesu wayifisha nich antakel a relijon a pa chirung chend mulong wa mutapu wamwifukwilangau Nzamb; ading ameken mud alamatin nakash kudiay Nzamb, pakwez nich rubabek, alika “kuziyil ku malejan mapandakena kujimb ma Yijil mudi dirumburish ditentamina, riy, ni uyakin.”​—Mateu 23:23.

Chillik chimwing nlel, ching kwau relijon wimedina pa uyakin ndiy uyitwadina antu kud Nzamb. Uyakin winou ud mu Bibil. (Yohan 4:24; 17:17; 2 Timote 3:16, 17) Marelijon makweta mafundish makad kutanijan ni Bibil makat kuyitwal antu kulemp nakash ni Nzamb. Mafundish mavud matonginau antu anch madiokil mu Bibil​—mud mafundish ma Usatu, kulik kufa kwa mupim ni kasu ka chikupu​—madiokala ku difukwil dia anzamb a makasu. Difukwil dikasikeshina mafundish mud minam did dia “chamwamu,” ap diakad ukwash, mulong dikat kuswinkesh yijil ya Nzamb ni yinshakur ya chirelijon.​—Marko 7:​7, 8.

Nzamb ukisin nakash rubabek ridia mu marelijon. (Titus 1:​16) Mulong wa kuyikwash antu kusej piswimp ni Nzamb, relijon ufanyidin kuyibachik kusal yom yiwamp mu mwom wau wa pichuku pichuku, kadiap kwau kuchirokin yom yimwing yimwing ap kusal yishankur. Chilakej, Bibil ulondin anch: “Anch muntu utongil anch: ‘Nidi mwin kumwitiyij Nzamb,’ pakwez kalaminap rudim rend, ritiy rend ridi ramwamu, ukat kwidimb amwinend. Ritiy ra zwang rakad chitaj rusotilay Nzamb Tatuku rawiy riner, kuyikwash an anshon ni adiaafu, ni kwiyep wakad kwijond nich yom yiyimp ya mu mangand.” (Jakobu 1:​26, 27) Bibil wa King James Version usadidin mazu “relijon wishitwila” mulong wa kumekesh difukwil dined diakad rubabek.