4 Dilikishin

KURUMBURIK

Kulikishin kurumburikin kuvuramen kurumbuk kukutwishau kukusadin ni kwipuk rukuny ukutwisha kwikal nich. Kulikishin kurumburikinap kupipej kulim kwa uyimp kwasalangay muntu ap kudiul mud kwasadikangap kwau chom.

MBIL YA BIBIL: “Anch muntu ukwet mulong ni mukwau chifanyidin kulikishijadin umwing ni mukwau.”​—Kolosay 3:13.

“Anch umukatin muntu kanang, ukushinshikinap pa kuburen kuwanyin kwend, pakwez ukutal pa mikadil yiwamp yisadinay usu wa kumekesh.”​—Aaron.

MULONG WAK CHID CHA USEY

Anch walam rukuny, ukutwish kwimesh amwiney mar ku mujimbu ni mu manangu, ukutwish kand kuyipish uruw wey.

“Dichuku dimwing nfumwam wangita dilikishin mulong wa chom chimwing changovisha nayimp nakash. Chankasikena nakash kumulikishin. Nashikena ku kumulikishin, pakwez nanenganana mulong nasalap mwamu kapamp kamwing. Chinech chaleta milong ya chamwamu mu uruw wetu.”​—Julia.

YOM UKUTWISHA KUSAL

ISHINSHIKINA

Machuku ma kurutu am, anch nfumwey ap mukajey wasal ap walond chom chikukusala nayimp, iyipula anch:

• ‘Am Ov, nikat kujimanang swa-swa?’

• ‘Ov, kurumbuk kud kamu kujim ni chifanyidin kwingit dilikishin, ap chid chom nikutwisha kwam kudiul?’

AMBAMB NI MBAY NEY WA URUW

• Yisu yivud, tukat kusalang asaa inch, machuku minch ap angond inch mulong wa kulikishijadin?

• Yom ik tukutwisha kusal mulong wa kulikishijadin umwing ni mukwau pakad kulab?

YIYUL

• Anch nfumwey ap mukajey wakurumbukin, kangal watong anch wasalang mwamau mulong ukwet michim yiyimp.

• Sal usu wa kulikishin yisal ya mbay ney wa uruw ni vurik anch “etu awonsu tukat kurumbok mu mitapu yivud.”​—Jakobu 3:2.

“Chiswapeling kulikishin anch etu awonsu twarumbukang, pakwez chikasikening anch muntu umwing ndiy warumbukang. Chitin kamu kwikepish kwakin mulong wa kwit dilikishin ni kumulikishin muntu.”​—Kimberly.

MBIL YA BIBIL: ‘Swakal kupwish milong.’—Mateu 5:25.