Ov, Mar Makez Kupwa?

CHILONDINAY BIBIL

“Nzamb . . . ukez kayikuswol mansoj mawonsu ku mes mau, kukez kikalap kand rufu, ap madil, ap kwishikokin, ap kusansan.”​—Kujingunik 21:3, 4.

CHIRUMBURIKINA MAZU MINAM KUD EY

Kashinsh ka kwijik anch Nzamb kindiyap uletininga mar tumena.—Jakobu 1:13.

Rongoj pa kwijik anch Nzamb ukat kwovang niyend nayimp chisu tumena mar.​—Zakariy 2:8.

Ruchingej ra kwijik anch mar mawonsu makez kupwa.​—Kuseng 37:9-11.

OV, TUKUTWISH CHAKIN KAMU KWITIYIJ YILONDINAY BIBIL?

Mwaning, mulong wa mayingishin maad:

• Nzamb ukisining mar ni kuburen kutentam. Shinshikin mutapu wovay Yehova Nzamb chisu chayimeshau antu end a pasak mar. Bibil ulondin anch ndiy wanenganana mulong wa antu “in kuyimesh mar ni kuyakamish” antu end.​—Ankalansambu 2:18.

  Nzamb uyikisining antu ayimeshininga akwau mar. Chilakej, Bibil ulondin anch “makas makata kumwang mash mayingila” mamusangareshingap.​—Jinswir 6:16, 17.

• Nzamb ukat kutubangin muntu ni muntu panrend. Ap anch muntu ni muntu wij ‘kunenganan kwend ni mar mend amwinend’ pakwez, Yehova niyend wij yom yiney!​—2 Jinsangu 6:29, 30.

  Kusutil Want wend, Yehova ukupwish piswimp ap mar ma muntu ni muntu. (Mateu 6:9, 10) Pakwez katat ukat kuyongoj nich rukat antu amukimbina nich win kashinsh.​—Midimu 17:27; 2 Korint 1:3, 4.