Ov, Chakin Kamu Afu Akutwish Kwikal Kand ni Mwom?

CHILONDINAY BIBIL

“[Antu] akez kavumbuk.”​—Midimu 24:15.

CHIRUMBURIKINA MAZU MINAM KUD EY

Rongoj anch wafish mukatish ney.​—2 Korint 1:3, 4.

Ukwovap kand wom wa rufu.​—Hebereu 2:15.

Ruchingej rakin ra kuyiman kand akatish ney afila kal.​—Yohan 5:28, 29.

OV, TUKUTWISH CHAKIN KAMU KWITIYIJ YILONDINAY BIBIL?

Mwaning, mulong wa mayingishin masatu:

• Nzamb ud Sakatang wa mwom. Bibil umutazukin Yehova Nzamb anch ‘musul wa mwom.’ (Kuseng 36:10; Midimu 17:24, 25) Mulong ndiy wapana mwom kud yitang yawonsu, chawiy ndiy kamu ukutwisha kumuchirishin muntu wafila kal mwom.

• Nzamb wayivumbula antu pasak. Bibil wisambidin jinsangu chinan ja antu​—ikala anikanch, amakurump, amakundj, ap amband—​avumbuka kwikal aom pa divu. Amwing ayivumbula chisu chikemp kupwa kwa kufa, pakwez umwing ndiy wasala machuku manying mwi nzay!​—Yohan 11:39-44.

• Nzamb ukwet impu ya kuyivumbul kand afu. Yehova ukisining rufu; ndiy urimening mud mukankuny. (1 Korint 15:26) Ndiy ukwet impu nakash ya kumupandikan mukankuny winou, kusutil divumbuk. Ukwet impu nakash ya kuyivumbul antu adia mu manangu mend chakwel ashakam kand pa divu.​—Job 14:14, 15.