Yipul ya in Kutang

Chom ik chisadila anch ‘mapit ma in michid yawonsu’ meza mu “Chikumbu” cha difukwil diakin?—Hagai 2:7.

Yehova wasambela kulond, kusutil kudiay muprofet Hagai anch: “Nikez kayikwatish michid yawonsu wom, yikez kalet mapit mau kunoku. Chad Chikumbu cha [Yehova, NW] chikez kizwil sens nich mapit.” (Hagai 2:7) Ov, kuyikwatish “michid yawonsu” wom kwawiy kusadila anch “mapit” ma michid—antu akweta michim yitentamina—itiyija difukwil diakin? Chakul chidi anch bwat.

Tushinshikinany chom chiyikwatishina michid wom, ap anch kuyizadish ni chibudikin cha kuzadish kwinoku. Bibil ulondil anch: “Mulong ik michid yafunya ulabu? Mulong ik in mangand akwet yitongijok yamwamu pakach pau?” (Kuseng 2:1) ‘Yitongijok yamwamu yikwetau,’ ap yitonginau, yidi ya kudandamen nich winyikel wau ayinau. Kwikil chom chikata kuyizadish nakash kupandakanamu ubaj ukutwisha kushiken winyikel wau.

Mudimu wa kulejan pa mangand mawonsu kudishiu kwa Want wa Nzamb usadilau Atuman a Yehova wikadil kal chakin kamu chom cha ubaj chiyikwatishina michid wom. Chakin, Want wa Umesia wa Nzamb udia mu makas ma Yesu Kristu ukez “kushesh mant makwau mawonsu [ma antu].” (Daniel 2:44) Uruu wa dirumburish wiwejidina ku mudimu wetu wa kulejan ukat kuyizadish michid. (Isay 61:2) Ni kuzal kwinoku kukat kwikal kukash mulong wa kuya kurutu ni kujimb kwa mudimu wa kulejan. Wom wasambedilau kulond mu Hagai 2:7 umekeshin chom ik chikeza kusadik kurutu?

Mu Hagai 2:6, tutangin anch: ” Mwamu mulondilay Yehova wa yisak ya amasalay anch, ‘Mu chisu chikemp am nikez kanyikesh diur ni divu, mangand ni karung.’” Pisambinay verse winou, kambuy Paul wafunda anch: “Washilamu anch: ‘Nikez kunyikesh kand mangand kapamp kakwau, pakwez kiyidiap kusu mangand iminau, pakwez nikez kunyikesh kand ni yom yawonsu ya mwiur.’ Mazu malondila anch: ‘Kapamp kakwau’ matulejin anch yitang yawonsu yikutwisha kunyikek akez kuyidosh, chakwel yawonsu yakad kutwish kunyikek [Want] yikushakam chikupu.” (Hebereu 12:26, 27) Chakin, ditenchik diawonsu dia yom akudinyikesh ni kudishesh chakwel dishila ndond mangand masu ma Nzamb.

Antu akweta michim yitentamina ayipwitidin ku difukwil diakin chidiap mulong anch michid ayikwatishin wom, ap ayinyikeshin. Chisal chiyipwitidina kudiay Yehova ni ku difukwil diend chidi chawiy chimwing chiyikwatishina michid wom, mudimu wa kulejan pa mangand mawonsu anch Nzamb wadishen kal Want. Kulejan kwa “rusangu ruwamp ra chikupu” kuyipwitidin antu akweta michim yitentamina ku difukwil dia Nzamb wakin.—Kujingunik 14:6, 7.

Uruu wa Want udi uruu wa dirumburish ni dipandish. (Isay 61:1, 2) Chibudikin cha kulejan uruu wa Want mu mangand mawonsu chikwet yibudikin yaad: kuyikwatish michid wom ni kwez kwa mapit ma in michid mulong wa uyaj wa Yehova.