‘Tondany Mwom Chakwel Wez Upandany’

“Nakutekinany kal mwom ap rufu, chiyukish ap riyind. Tondany mwom chakwel . . . wez upandany.” —KUVURIK YIJIL 30:19.

1, 2. Mutapu ik wamutangau muntu mu chifu cha Nzamb?

“EL TUMUTANGANYAP muntu mu chifu chetu, ukufanakana niyetwetu.” Mazu minam malonday Nzamb madi mu shapitre wa kusambish wa Bibil. Chawiy, Disambishil 1:26, 27 dilondil anch: “Nzamb wamutanga muntu mu chifu chend amwinend, mu chifu cha Nzamb mwawiy mwamutangilau.” Chawiy muntu wa kusambish washalijana ni yitang yawonsu yadinga pa divu. Muntu wamufanikana Sakatang wend, watwisha kumekesh mu chilik chirumburikina ngikadil ya Nzamb, mud kumekesh rukat, kutentam, manangu ni usu. Muntu wadinga nich kom ka kumukwash kukwat mipak yikwisakinay amwinend ni kumusangaresh Tatukwend wa mwiur. (Rom 2:15) Mu kulond mu wiswimp, Adam wadinga nich want ipend. Pashinshikinay rutong ra kumutang mwanend wa pansh, Yehova walonda mwamu piur pa mudimu wa makas mend mulong wa muntu anch: “Yading yiwamp kamu.”—Disambishil 1:31; Kuseng 95:6.

² Chitudia an a Adam, niyetu atutanga mu chifu cha Nzamb ni tumufaniken. Pakwez, ov, tufanyidin chakin kamu kutond mu yitusadila? Inge, ap anch Yehova ukwet ukaliweny wa kwijik kurutu kwa chisu yikeza kushiken, katenchikap yisal yetu kurutu kwa chisu. Yehova watonda kulik kuyitakel anend a pansh kusutil ku kutenchik yom kurutu kwa chisu. Chakwel kutukwash tutesha usey wa kusadil want ipetu mulong wa kutond kuwamp, twilejany bil etu awonsu dilejan dimwing kusutil ku muchid wa Isarel.—Rom 15:4.

In Isarel Adinga Nich Want Ipau wa Kutond

3. Chijil cha kusambish cha Yijil Dikum chalonda ik, ni mutapu ik watondau in Isarel ashishamena kuziyil?

³ Yehova wayela in Isarel anch: “Am nidi [ Yehova] Nzamb wen, wakudioshanya en mwi ngand ya Idjibit ni mu chikumbu cha uswik.” (Kuvurik Yijil 5:6) Mu 1513 kurutu kwa chirung chetu, muchid wa Isarel wamana chilay cha kupandishiu kudiokal mu uswik wa Idjibit ni kudiosh kamu pinipa wadingap kand ni cha kwikanyek pa mazu minam. Mu chijil cha kusambish cha Yijil Dikum, Yehova walonda kusutil kudiay Moses anch: “Kangal wakikal ni akish kurutu kwam.” (Kubudik 20:1, 3) Pa chisu chinech, muchid wa Isarel watonda kuziyil. Amwifukwila ku rusot rau ching kusu Yehova.—Kubudik 20:5; Kuchind Michid 25:11.

4. (a) Moses wayitekina in Isarel kutond ik kurutu kwau? (b) Kutond ik tukweta ilel?

⁴ Kupwa kwa mivu 40, Moses wachivurisha nich usu chizaz chikwau cha in Isarel kutond kwadingau afanyidin katat kutond. Moses walonda anch: “Natazuk kal diur ni divu kwikal atuman kudi en ilel unou, nakutekinany kal mwom ap rufu, chiyukish ap riyind. Tondany mwom chakwel en ni a majuku men makeza kwez, wez upandany.” (Kuvurik Yijil 30:19) Chawiy chimwing kand ilel, niyetu tukutwish twatond. Chakin, tukutwish kutond kumusadil Yehova mu kushinshaman nich ruchingej ra mwom wa chikupu, ap tukutwish twatond kumubwambwil ni kutambul yibudikin yiyimp. Tushinshikinany yilakej ya antu aad atonda mitapu yaad kushalijan.

5, 6. Kutond ik kwatonday Joshua, ni kwadinga nich yibudikin ik?

⁵ Mu 1473 kurutu kwa chirung chetu, Joshua wayitwala in Isarel mwi Ngand ya Kushilamu. Kurutu kwa rufu rend Joshua wayinkisha chiyul cha usu nakash, wilemba ku muchid wawonsu anch: “Anch kiukatilanyap kumusadil [ Yehova], tondanyap ilel unou nany ukukatany kusadil, ap anch akish asadilau angaken ushad wa wit, ap anch akish a in Amore akweta ngand yiushichanya katat.” Kupwa, wajimbula dijuku diend, walond anch: “Pakwez am ni chikumbu cham tukumusadil [ Yehova, NW].”—Joshua 24:15.

⁶ Kwisambishil, Yehova wamukasikesha Joshua ikala mukash ni kwiman dang, wamuleja chakwel kangal abwambwil ku Chijil cha Nzamb. Kusutil ku kutang buku wa Chijil ni kutongijokang muten ni uchuku, Joshua wela kutwish mu yisalijok yend. (Joshua 1:7, 8) Chakin kamu Joshua watwisha mu yisalijok yend. Kutond kwa Joshua kwaleta yiyukish. Joshua walonda anch: “Kushilamu kwawonsu kwa [ Yehova] kwashilayimu kud in Isarel kikwarezikap, pakwez yawonsu yawanyina.”—Joshua 21:45.

7. Pa machuku ma Isay, kutond ik kwatondau in Isarel amwing, ni kwadinga ni yibudikin ik?

⁷ Pakwez, shinshikin mwikadil mu Isarel kupwa kwa mivu 700. Pa chisu chinicha, in Isarel avud adinga ni kulondul yaku ya upagan. Chilakej, pa dichuku dia nsudiel dia muvu, antu adinga ni kukumangan mulong wa kusal musambu wa yakudia kushalijan yitadila ni nviny yitadila. Winou wadingap kwau musambu wa chamwamu wa majuku. Wadinga musambu wa relijon wadinga uyitumbishina anzamb aad a apagan. Muprofet Isay wafunda chitongijok cha Nzamb piur pa kuburen kushinshaman kwinoku: “Kukez kikal kwaurik kudi en, in kwinlik am, ukata kudiulany Sion, mukandu wam utumbila, chad wakamwifukwilany Gad nend Meni, awiy akish a kuyuk ni kutenchik yom ya kurutu.” Awiy itiyija anch kwangul kwa pa muvu kwadingap kwengamidina pa yiyukish ya Yehova, pakwez pa kuyitudish ‘Gad mukish wa Kuyuk’ ni ‘Meni mukish wa kutenchik yom ya kurutu.’ Chakin, kubwambwil kwau ni kwitondil kwau kwawiy kwamekesha yibudikin yau yiyimp ya kurutu. Yehova walonda anch: “En, ukez kafany rufu ruyimp ra chisum, ni mulong kiwangakulanyap pinakutazukanya, ap kiwangateshanyap pinakulejanya. En watonganya kulik kwinziyil, chad wasalanya yitil.” (Isay 65:11, 12) Kutond kwau kwa usup kwayiletina disheshik, ni mukish Meni wa kutenchik yom ya kurutu ni Gad wa kuyuk katwishap kuyichidij.

Tondany Kutond Kuwamp

8. Kwambatan nich yilondila Kuvurik Yijil 30:20, chom ik chifanyidina chakwel kutond nawamp?

⁸ Payiyulay Moses, in Isarel kutond mwom, wayileja yom yisatu yadia yifanyidinau kusal: “Mu kumukat [ Yehova] Nzamb wen, ni mu kuziyil dizu diend, ni kulamatil kudi ndiy.” (Kuvurik Yijil 30:20) El tushinshikinany chimwing ni chimwing cha yom yiney chakwel niyetu tutwisha kutond nawamp.

9. Mutapu ik tukutwisha kumumekeshin Yehova rukat retu?

⁹ Mu kumukat Yehova Nzamb wetu: Tutondin kumusadil Yehova mulong tumukatin. Kutesh yilakej ya dibabesh ya pa machuku ma Isarel, kutukwashin kujijamen yoziu yawonsu ya kusal masandj ni tukat kuchin mwom ukutwisha kutuwishin mu mupit wa kusot mapit. (1 Korint 10:11; 1 Timote 6:6-10) Tukulamat dang kud Yehova ni kulam yijil yend. (Joshua 23:8; Kuseng 119:5, 8) Kurutu kwa in Isarel kwandam mwi Ngand ya Kushilamu, Moses wayikasikesha anch: “Talany, am nakulejanya kal en yijil ni malejan, mud mwanlejay [ Yehova] Nzamb wam chakwel uyisadilany mwi ngand yiukwandamanya kukwat. Yilamany ni kuyisadil, mulong yawiy kwikal ronganyin ren ni kwijikan ku mes kwa antu. Pakwez kuteshau yijil yiney yawonsu.” (Kuvurik Yijil 4:5, 6) Katat chawiy chisu cha kumumekeshin Yehova rukat retu kusutil ku kutek rusot rend pa ndond ya kusambish mu mwom wetu. Chakin kamu tukez kuyukishiu anch twatond kusal mwamu.—Mateu 6:33.

10-12. Malejan ik twilejidina ku kushinshikin yom yasadika pa machuku ma Nowa?

¹⁰ Mu kutesh dizu dia Nzamb: Nowa wadinga “mulej wa kutentam.” (2 Pita 2:5) Antu avud a pa machuku ma Mabeb adinga azuwodilau ni “kijikap [kateshap]” dibabesh dia Nowa. Kwadinga chibudikin ik? “Mabeb mayijiyisha awonsu shutit.” Yesu wababesha anch machuku metu, pa chirung cha “kwez kwa Mwan a muntu,” mwamu kand chikeza kikal. Chom chashikena pa machuku ma Nowa chidi dibabesh dikash kud antu ilel alikina kutesh uruu wa Nzamb.—Mateu 24:39.

¹¹ Antu adiburila kubabesh kwa Nzamb kulejenau atushalapol a Nzamb ilel afanyidin kwijik chikeza kurumburik kulik kutesh kubabesh kwinoku. Piur pa in dises inay, kambuy Pita walonda anch: “Yikat kuvuramenau yawiy ey, anch kwading maur pa muten wa pasak, ni ngand ayitangila pa mem, yichidi mu mem, mulong wa dizu dia Nzamb; ni mem mabwika ngand yading pasak, yajiya ni mem. Pakwez maur madiaku katat, ni ngand, ayilamin kal ni pakweza dichuku dia kurumburish ni kusheshik kwa antu akad Nzamb.”—2 Pita 3:3-7.

¹² Kutond kwa Nowa ni dijuku diend kwashalijana ni kwa antu inay. “Ku ritiy kwawiy kwamubabeshilau Noa kudi Nzamb ku yom yakad kal kumekan, ndiy warijeka wat.” Kutesh kwend dibabesh kwaleta dipandish mu dijuku diend. (Hebereu 11:7) El twikalany aswapela kutesh uruu wa Nzamb ni kuuziyil.—Yakob 1:19, 22-25.

13, 14. (a) Ov, mulong wak chidi cha usey ‘kulamat dang kud Yehova’? (b) Mutapu ik tukumushila Yehova ‘muumb wetu,’ chakwel kutuumb?

¹³ Mu kulamat dang kud Yehova: Chakwel ‘kutond mwom ni kupand,’ kitufanyidinap ching kusu kumukat Yehova ni kumutesh pakwez tufanyidin kand ‘kulamat dang kud Yehova,’ chirumburikin, kudandamen kusal rusont rend. Yesu walonda anch: “Mu kudandamen kwen mwawiy muukeza kisakilany mipim yen.” (Luka 21:19) Chakin, kutond kutusadila pa mulong winou kumekeshin yidia mu muchim wetu. Jinswir 28:14 ulondil anch, “Wayuk muntu ukata kumwov [ Yehova] wom machuku mawonsu, pakwez muntu ukukasikesha muchim wend pwamu, ukez kawil mu mar.” Farao wa ku Idjibit udi chilakej cha uyakin wa yilondilau mu chikunku cha nsudiel cha verse winou. Chisu chawila pa Idjibit chipupu ni chipupu cha Yipupu Dikum, Farao wakasikesha pwamu muchim wend pa ndond pa kumwov Nzamb wom. Yehova kamushindilap Farao mu kubwambwil pakwez wamwinkisha nyikel winou ukweta chibud mutapu wa kutond. Mu mwikadil ap wisu, rusot ra Yehova rasadika, mud mwarumburilay kambuy Paul chitongijok cha Yehova piur pa Farao: “Mulong wa mukand wa Nzamb walonda kudi Farao anch, Chinech chawiy nikuzambwidila, chakwel nimekeshilip usu wam mu ey, chakwel ni dijin diam adipalangeshilip ku mangand mawonsu.”—Rom 9:17.

¹⁴ Kupwa kwa yitot ya mivu kwinyim kwa kuyikol in Isarel kudiokal mu usu wa Farao, muprofet Isay walonda anch: “Chawiy kangal watujimen kupandakan, ap kutuchindil yitil yetu chikupu. Etu tudi antwey itwovilap riy.” (Isay 64:8) Anch twamushil Yehova chakwel akarumuna untu wetu kusutil ku dilejan dietu ni ku kusadil kwetu Dizu diend, tukat pakemp-pakemp kudjal muntu musu. Tukat kwikal in kwikepish nakash ni aswapela kuumb, ni chikutuswapel kulamat nich kushinshaman kud Yehova mulong tusotil chakin kamu kumusangaresh ndiy.—Efes 4:23, 24; Kolosay 3:8-10.

“Yilejanany”

15. Moses wayivurisha in Isarel yisend ik yaad, kwambatan nich Kuvurik Yijil 4:9?

¹⁵ Pawakumangana muchid wa in Isarel piswimp ni kwandam mwi Ngand ya Kushilamu, Moses walonda anch: “Babalany, lamany mipim yen. Kangal wavuramenany yom wamananya nich mes men. Kangal yidiokala mu michim yen machuku mawonsu ma mom yen, pakwez yilejanany kudi anen, ni kudi ijukuren.” (Kuvurik Yijil 4:9) Chakwel kutambul chiyukish cha Yehova ni kushakam mwi ngand yadia yifanyidinau kuswan, chayifanyina antu kuwanyish yisend yaad kurutu kwa Yehova Nzamb wau. Chayifanyidinap kuvuramen yom yamushena yasalay Yehova ku mes mau, ni chayifanyidina kuyilejan ku yizaz yikweza. Etu antu a Nzamb ilel tufanyidin kusal chilik chimwing anch tusotil ‘kutond mwom ni kupand.’ Ov, chom ik twamena ni mes metu chatusadidilay Yehova?

16, 17. (a) Chom ik chatwishau kusal kud amishoner afumbau ku Gilead mu mudimu wa kulejan Want? (b) Yilakej ik yiwija ya antu in mushiku akad kuziy?

¹⁶ Tukwet musangar wa kuman mutapu uyukishinay Yehova mudimu wetu wa kulejan ni wa kwikadish in kwilej. Kudiosh pasambishina Shikol ya Bibil ya Gilead ya Watchtower mu 1943, amishoner asambishin kal mudimu wa kwikadish in kwilej mu jingand jivud. Kudiosh pa muvu winou, antu atambula madipulom a kusambish a shikol yiney akwet mushiku wa kulejan Want, ap anch ikadil kal amapal ni amwing au katwishinap kusal mwadingau kusal mulong wa yikangesh ya mujimbu. Chilakej chimwing chiwamp chidi cha Mary Olson, watambula dipulom ku shikol ya Gilead mu 1944. Wasadila mud mishoner ni wasambishina mu Uruguay, kupwa waya mu Colombie, ni katat udi mu Porto Rico. Ap anch ukwet yikangesh ya milong ya mujimbu mulong wa upal, Nambaz Olson uchikwet musangar wend mulong wa kulejan. Chijay rudim ra Espanyol, utenchikining program wa kulejan pamwing ni atutwambil a pol pau pa rubing ni rubing.

¹⁷ Nancy Porter, udi katat mwadia-mufu, watambula dipulom diend dia Shikol ya Gilead mu 1947, uchidi nikatat kusadil mu Bahamas. Udi niyend mishoner umwing usadila yivud mu mudimu wa kulejan. Nambaz Porter walonda mu rusangu ra mwom wend anch:a “Kuyilej antu akwau uyakin wa Bibil uding musul wa musangar. Kwinkwashining kwikal nich program muwamp wimedina pa kumwifukwil Nzamb ni kukasikesh mwom wam.” Pakatay Nambaz Porter ni atushalapol kutongin pa mwom wau wasuta kal, kakatap kuvuramen yayisadilau kud Yehova. Chad chidi nchik kud etu? Ov, tukat kutal nich kusanger mutapu wayukishay Yehova mudimu wa Want mwi ndond yitushicha?—Kuseng 68:11.

18. Chom ik tukwileja ku kutang jinsangu ja mwom wa amishoner?

¹⁸ Tuyisangaredin nakash antu asala kal mivu yivud mu mujikit wa Yehova. Kutangang jinsangu ja mwom wau udi musul wa kutukasikesh mulong pitumena yayisadilay Yehova antu inay ashinshamena, kukat kukasikesh mupak wetu wa kumusadil niyetu. Ov, ukat kutang jinsangu jinej jisangareshina jipalangeshinau mu Chinong cha Kalam ni kujitongijokin?

19. Mutapu ik ukutwishau anvaj in Kristu kusadil jinsangu ja mwom jifundilau mu Chinong cha Kalam?

¹⁹ Moses wayivurisha in Isarel anch chiyifanyidinap kuvuramen yom yawonsu yayisadilau kud Yehova ni anch yom yiney kangal yidiokal mu michim yau mu machuku ma mwom wau. Kupwa wawejinaku chom chikwau anch: “Yilejanany kudi anen, ni kudi ijukuren.” (Kuvurik Yijil 4:9) Jinsangu ja mwom jikat kusangaresh nakash. Ansand achipamina akwet kuswir kwa yilakej yiwamp. Anambaz ajich akutwish ilej malejan kusutil ku chilakej chiwamp cha anambaz isambidinau jinsangu ja mwom mu Chinong cha Kalam. Kusal mudimu mu teritwar ulondilau rudim ridjing mwi ngand yau kuyinkishin akadivar ni anambaz mutapu wa kusal yivud mu kulejan rusangu ruwamp. En anvaj in Kristu, ukutwishany kusadil uman wa amishoner ashinshamena ileja ku Gilead ni akwau mulong wa kuyibachik anen atonda mwom wa kusal mudimu wa chisu chawonsu.

20. Chom ik tufanyidina kusal chakwel ‘kutond mwom’?

²⁰ Ov, mutapu ik ukutwishay umwing ni umwing wetu ‘kutond mwom’? Kusutil ku kusadil katok kawamp ka want ipau chakwel kumulej Yehova anch tumukatin ni kusutil ku kudandamen kusal chipandikenamu kuwap mu mudimu wend mud mututwishishinay. ‘Mulong,’ mud mwalonday Moses, Yehova ‘udi mwom wen ni kuvul kwa machuku men.’—Kuvurik Yijil 30:19, 20.

[Mazu madia kwishin kwa paj]

Ov, Uvurikin?

• Chom ik wilejidinaku ku yilakej kushalijan ya kutond yitwashinshikinang?

• Yom ik tufanyidina kusal mulong wa ‘kutond mwom’?

• Yisend ik yaad yitukasikeshinau kuwanyish swa?

[Chipich chidia pa paj wa 24]

“Ilel unou, nakutekinany kal mwom ap rufu”

[Chipich chidia pa paj wa 27]

Kutesh dizu dia Nzamb kwawiy kwamupandisha Nowa ni dijuku diend

[Chipich chidia pa paj wa 28]

Mary Olson

[Chipich chidia pa paj wa 28]

Nancy Porter