Yipul ya in Kutang

Ov, Want Wa Nzamb Udi Mu Muchim Wey?

Antu avud itiyijin anch chakul ku chipul chidia piur chidi: inge. Chilakej, buku The Catholic Encyclopedia ulondil anch: “Oku, want wa Nzamb urumburikin . . . winyikel wa Nzamb mu michim yetu.” Chisu chivud mwamu mulejeningau amakurump a marelijon. Ov, chakin kamu Bibil ulejen anch Want wa Nzamb udi mu michim ya antu?

Antu amwing atonginin anch Yesu amwinend ndiy walejana wa kusambish chitongijok chinech anch Want wa Nzamb udi mu michim ya antu. Yesu walonda anch: “Talany! Want wa Nzamb udi kamu pakach pen.” (Luka 17:21, Les Saintes Écritures — Traduction du monde nouveau) Yikarumun yimwing yilondil payom pinap anch: “Talany want wa Nzamb unidi mukach mwen” ap anch mu “michim yen.” Ov, wawiy mutapu uwamp wa kukarumun mazu ma Yesu? Ov, chakin kamu Yesu walonda anch Want wa Nzamb udi mu michim ya antu?

Cha kusambish, tushinshikin chiudia muchim wa muntu. Pawisambidinau mu Bibil, muchim wa chifanikesh urumburikin muntu wa mukach, musul wa yitongijok, ngikadil, ni yovil ya muntu. Chitong cha kwel anch chom kanang chipandikena kuwap mudi Want wa Nzamb wikala mu muchim wa muntu—mudi chilakej anch chakwel uyikarumun ni kuyiwapish antu—chikutwish kwovikan mudi cha manangu, pakwez, ov, chidi chakin kamu cha manangu?

Bibil utulejin anch: “Kwikil chom chikata kudimban mudi muchim wa muntu, muchim uyedil wakad kutwish kuyerik.” (Yeremiy 17:9) Yesu amwinend walonda anch: “Mulong mukach mwa muntu, mu muchi wend, mukat kudiokal yitongijok yiyimp, uruu uyimp, wij, wimpongirik, kusotan, ris, tuyimp.” (Marko 7:20-22) Tushinshikinany: Ov, mar mavud matumena mu mangand ilel tukutwish kulond anch madiokil ku michim ya antu akayitil? Ov, mutapu ik lel Want uwanyidina wa Nzamb wela kudiokal ku musul winou? Chakin kamu, muchim wa muntu ukutwisha ap pakemp win kuval Want wa Nzamb mudi kansangamb kakatwishap kusongish nfung.—Mateu 7:16.

Cha kaad, tushinshikinany antu adinga alejinau kudi Yesu palonday mazu minam mijikine madia mu Luka 17:21. Verse usambedilaku ulondil anch: “Ading ni kumwipul kudi Afarise pa muten ukweza want wa Nzamb, ndiy wayakul.” (Luka 17:20) Afarise adinga akankuny a Yesu. Yesu walonda anch in rubabek inay kakezap kwandam mu Want wa Nzamb. (Mateu 23:13) Katat anch Afarise kadingap afanyidin kwandam mu Want wa Nzamb, ov, Want wela kwikal mu michim yau? Chitwishikinap! Chad mazu ma Yesu marumburikin ik?

Mu kukarumun mazu minam ma Yesu, in kukarumun avud adimukina a Bibil asadidil mazu mudi madia mu Traduction du monde nouveau. Amwing alondil anch Want udi “mukach mwen” ap anch “pakach pen.” Ov, mutapu ik Want wa Nzamb wadinga pakach pa antu inay pamwing ni Afarise, pa chisu chinicha? Inge, Yesu wadinga muntu watonday Yehova Nzamb chakwel ikal Mwant wa Want. Mudi Mwant Watondau Kal, Yesu wadinga kamu pakach pa antu inay. Walejana piur pa Want wa Nzamb ni wasala yilay, wayinkisha chitongijok cha yikeza kusal Want winou. Komb lel, chakin kamu, Want wadinga pakach pau.

Chakin kamu, kwikil Verse mu Bibil ukasikeshina anch Want wa Nzamb udi mu michim ya antu. Chinyim ni chinech, wawiy udi winyikel wakin, ukeza kulet kapamp kamwing yikarumun pa divu, mudi mwalondau aprofet.—Isay 9:6, 7; Daniel 2:44.