“Ikalany Ni Chisambu Nau Antu Awonsu”

“Anch chikasikenip nchik kudi en, ikalany ni chisambu nau antu awonsu.” —ROME 12:18.

1, 2. (a) Yesu wayinkisha in kwilejend dibabesh ik? (b) Kwisu kutukutana chiyul cha kusadil pantaliken nich rupompat?

YESU wayibabesha in kwilejend anch akez kuyizengol kudi in michid adia mu mangand, ni pa uchuku wa kurutu kwa rufu rend, wayirumburila mulong wak walonday mazu minam. Wayileja atwimbuy end anch: “Anch en wadiany a mangand, ing mangand makunikatany, makatil aend; pakwez mulong kiudianyip a mangand, pakwez am nakutondilany kal kukudioshany mu mangand, chawiy chikukishilanyau kudi mangand.”—Yoh. 15:19.

² Kambuy Paul wimena amwinend ukinakin wa mazu minam ma Yesu. Mu mukand wend wa kaad wamufundilay mbay nend wa mudimu, nsand Timote, Paul wafunda anch: “Ey walondwil kal dilejan diamam, ni yinadinga ni kusot mu mwom wam, ritiy ram, kushimpish muchim, rukat, kudandamen, yakamish yam ni kwikonk kwam.” Kupwa Paul wawejinaku kand anch: “Chakin, awonsu asotila kwikal antu a Nzamb mu Kristu Yesu akez kikonk.” (2 Tim. 3:10-12) Mu shapitre wa 12 mu mukand wend wayifundilay in Kristu in Rome, Paul wayikinsha chiyul piur pa mutapu ufanyidinau kusal anch kwikal rupompat. Mazu mend makutwish mikal umutakel wetu mu machuku manam ma kwisudiel.

“Pakishany Kusal Yom . . . Yiwamp”

3, 4. Mutapu ik tukutwisha kusadil chiyul chidia mu Rome 12:17 (a) mu dijuku diaurikina pa mulong wa kwifukwil? (b) mu kuyisadil amutej netu?

³ Tang Rome 12:17, MM. Paul warumburila anch pa chisu cha kura nich kutusadil yom yiyimp, kitufanyidinap kwifundakesh ayinetu. Kutesh ni kusadil chiyul chend kudi kwa usey ujim pakampwil mu majuku maurikina pa mulong wa difukwil. Antu aad atijadina afanyidin kujijamen choziu cha kwifundakesh ku mazu ap kuyisal yakad kwikal yiwamp. ‘Kwifundakesh kuyip ku kuyip’ kuletiningap chibudikin chiwamp. Pakwez, mwikadil winou ukutwish wasal mwikadil wikal uyimp nakash.

⁴ Paul utulejin mutapu uwamp wa kusal: “Pakishany kusal yom yikumanau antu awonsu anch, yidi yiwamp.” Ku chikumbu, mband umekeshina kumubangin chakin kamu nfumwend anch walond chom chakad kusangaresh piur pa yitiyij ya mukajend ukutwish wasal anch kangal kulanka jintad. (Jinsw. 31:12) Carlos, wikadil kal katat chid cha dijuku dia Bethel, ulejen mutapu wadingay makwend ni kupandakan rupompat rikash ra tatukwend kusutil ku kushakam mu chisambu ni kusal nawamp midimu yawonsu ya ku chikumbu. “Maku wadinga ni kutukasikesh etu an chisu ni chisu chakwel tumulimisha tatuku. Wadinga ni kukasikeshin anch nisambishang kusengan ni tatuku masengan kanang ap anch kimadingap masengan minikatininga. Pakwez chadinga ni kumusangaresh nakash.” Chawiy wasambisha kwilej Bibil ni wababatishiwa. Pa mulong wa kupakish “kusal yom yikumanau antu awonsu anch, yidi yiwamp,” Atuman a Yehova ashikena kal ku kupandakan kasolikany kusutil ku kuyisadil amutej nau yom yiwamp anch kwikal yak ya chitangil.

Kwenguril Rupompat ni “Makal ma Kasu”

5, 6. (a) Mutapu ik mutekiningau “makal ma kasu” pa mutu wa mukankuny? (b) Lond chom chasadikina pol pen chilejena anch kusadil chiyul chidia mu in Rome 12:20 kukutwish kwikal nich yibudikin yiwamp.

⁵ Tang Rome 12:20. Patonday mazu madia mu verse winou, chimeken anch Paul wadinga mu manangu ni mazu mitutangininga mu Jinswir 25:21, 22 malondila anch: “Anch mukankuny ney wovil nzal, mwinka yakudia chakwel adia. Anch wovil impu mwinkisha mem ana. Mwamu ukez kamuruzwikil makal ma kasu pa mutu pend, ni [Yehova ukez, NW] kakufut.” Pa kutal chiyul chend chidia mu mukand wa in Rome shapitre wa 12, chimeken anch Paul wadinga usotil kulond anch makal ma kasu makumupup ni kumukwatish usany mwin rupompat. Pakwez, jinswir—ni mazu mafanikena nich menday Paul madia mu in Rome—chimeken anch misambidin piur pa mulad umwing wa pakur wadingau ni kusadil mulong wa kwenguril nich utad kuudiosh yishoshot. Charles Bridges, mwin kwilej Bibil wa mu Angleterre wadingaku mu chitot cha 19 walonda anch: “Utad ukash wakad kal kuchil adinga ni kuutekin pansh ni piur; kadingap ni kuutek kusu piur pa kasu, pakwez adinga ni kuruzuk pansh ni piur makal ma kasu. Michim yimwing yiding yikash, chawiy kiyikatap kuziyil ap anch kwikal kushimpish kujim, kwitun, ni rukat rijim.”

⁶ Mudi “makal ma kasu,” yisal yiwamp yikutwish yaswanish michim ya in rupompat ni pamwingap kuyishikij ku kulik chisum chau. Yisal mudi yiney yikutwish yayishikij antu ku kwikal nich manangu mawamp piur pa antu a Yehova ni pantaliken nich uruu wa Bibil ukatau kulejan. Kambuy Pita wafunda anch: “Ikalany ni yisalijok yen yiwanyidina mukach mwa in mangand; chakwel anch akulondany en nayimp mudi in kusal midimu yiyimp, anch aman midimu yen yiwamp akez kamujikitish Nzamb mu dichuku dikwezay.”—1 Pita 2:12.

“Ikalany ni Chisambu Nau Antu Awonsu”

7. Kristu wayishila in kwilejend chisambu ik, ni chifanyidin kutubachik ku kusal ik?

⁷ Tang Rome 12:18. Pa uchuku wend wa kwinsudiel wasutishay Yesu pamwing ni atwimbuy end, ndiy wayileja anch: “Nakushany nich chisambu; chisambu cham napan kudi en.” (Yoh. 14:27) Chisambu chashay Kristu kudi in kwilejend chidi chisambu cha mu muchim chikatau kwovu anch atesh ang ayikatin ni Yehova Nzamb uyitiyijin ni Mwanend mukatish niyend uyitiyijin. Chisambu chinech cha mu muchim chifanyidin kutushikij ku kushakam mu chisambu ni antu akwau. In Kristu akin akatining chisambu ni asadiling chakwel kwikala chisambu.—Mat. 5:9.

8. Mutapu ik tukutwisha kwikal in kuletish chisambu ku chikumbu ni mu chikumangen?

⁸ Mutapu umwing wa kwikal mwin kuletish chisambu mu dijuku udi wa kupwish milong swa-swa mudi muchitwishikina kupandakanamu kusot kuyipish mashakamin. (Jinsw. 15:18; Efes 4:26) Chom chinech chiding kand chakin ni mu chikumangen cha Ukristu. Kambuy Pita wambatanishin kusot chisambu pamwing nich kulam rudim. (1 Pita 3:10, 11) Yakob niyend, kupwa kwa kulet chiyul chikash piur pa mutapu wa kusadil rudim ni kusot kwipuk mukau ni jintad, wafunda anch: “Chiyul chidiokila mwiur, pakusambish chidi zwang, chad ni chisambu ni kwitudish, chinzuril ku kujingunin, chizwil sens ni riy ni mabuj mawamp, kichikwetip ntad ap kubabek. Pakwez mabuj ma kutentam amakunyidin mu chisambu kudi awiy akata kutek chisambu.”—Yak. 3:17, 18.

9. Pitusadila usu wa kwikal mu “chisambu nau antu awonsu,” chom ik tufanyidina kulam mu manangu?

⁹ Mu mazu mend mitutangininga mu Rome 12:18, Paul uyil kulemp kupandakan pa kwikal kwau mwin kuletish chisambu mu dijuku ni mu chikumangen. Ndiy ulondil anch tufanyidin kwikal mu “chisambu nau antu awonsu.” Mu antu inay mudi amutej netu, akwetu tusadila nau mudimu pamwing, akwetu a ku shikol ni antu tukata kutan mu mudimu wa kulejan. Pakwez, kambuy ulondil chiyul chend ni kulond anch: “Anch chikasikenip nchik kudi en.” Mazu minam marumburikin anch tusala yawonsu yitukutwisha kusal mulong wa kwikal mu “chisambu nau antu awonsu” pakwez kichidiap mu chilik cha kusot kujiril yijil yitentamina ya Nzamb.

Kufundakesh Kudi kwa Yehova

10, 11. Mu mutapu ik tukata kushil “ujim wa Nzamb ndond,” ni mulong wak chawiy chiwapila kusal?

¹⁰ Tang Rome 12:19. Ap pa ntaliken ni “akata kukangashijan” pa mulong wa mudimu wetu ni pa uruu wetu, pamwing nau in rupompat, tufanyidin “kwishimpish muchim” ayinetu chakwel tusala “nich kwitudish.” (2 Tim. 2:23-25) Paul uyiyudin in Kristu anch kangal wapakishany kwifundakesh ayinen pakwez “shilany ujim wa Nzamb ndond.” Ov, wateshany kal anch udi ujim wa nany? Choviken komb zwang. Choviken anch tusha ndond ya ujim wa Nzamb. Chitudia in Kristu, kiyetwap ayinetu tufanyidina kwifundakesh. Nfund a kuseng, wafunda anch: “Ikuchika ku kuswej, ulika ujim; kangal wiswidiosh mulong chawiy chikat kutwal kusu ku kuyip.” (Kus. 37:8) Salomon niyend wayulana anch: “Kangal walond anch: ‘Nikez kachirish kuyip!’ Muchingela [Yehova, NW], ndiy ukez kakukwash.”—Jinsw. 20:22.

¹¹ Anch akankuny atusadil nayimp, chom cha manangu cha kusal chidi cha kuusha mulong winou mu makas ma Yehova chakwel ayipupa pa chisu chimenay anch chiyifanyidin kuyipup. Chakwel alejana anch wadinga wisambidin piur pa ujim wa Yehova mu manangu mend, Paul wawejinaku anch: “Achifunda anch: kufundakesh kuding kudi am; yam nikez kafutan, mwamu mwalonday Mwant.” (Isikej ni Kuvurik Yijil 32:35.) Anch twapakish kwifundakesh ayinetu, tukusal yom mu mutapu wa kwitutul, tukutwish twasal ayinetu yom yifanyidinay Yehova kusal, yitekidinay kal ndiy amwinend kusal. Chikwau, tukumekesh anch kuburen ritiy mu kushilamu kwa Yehova palondinay anch: “Yam nikez kafutan.”

12. Chisu ik ni mutapu ik ukeza kumekan ujim wa Yehova?

¹² Kwisambishil kwa mukand wend kudiau in Rome, Paul walonda anch: “Ujim wa Nzamb wamekana mwiur kudi antu awonsu akad Nzamb ni akad kutentam, kudi antu akata kukangesh uyakin mulong wa kupengam kwau.” (Rome 1:18) Ujim wa Yehova ukez kumekan mwiur kusutil kudiay Mwanend pa chisu cha “mar makash.” (Kubur. 7:14) Ujim winou ukez kwikal “chijingidij cha kurumburish kwa Nzamb kutentamina,” mudi mwarumburilay Paul mu mukand wend ukwau wapepilau anch: “Talany, ni mu kutentam kwa Nzamb akuchirish mar kudi awiy akata kukumeshany en mar, ni kupan kwiswedish kudi en pamwing ni yetwetu ni ku kumekan kwa Mwant Yesu, pakwezay mwiur ni angel end a usu mu mizwizu ya kasu, ukufundakesh kudi awiy akad kumwijik Nzamb, ni kudi awiy akad kuziyil katumb kawamp ka Nsalejetu Yesu.”—2 Tes. 1:5-8.

Pandikanany Tuyimp Nich Kuwap

13, 14. (a) Mulong wak tukwamukinap pakatau kutuzengol? (b) Mutapu ik tukutwisha kuyiyukish antu akata kutumesh mar?

¹³ Tang Rome 12:14, 21. Chitwija nich kashinsh anch Yehova ukuwanyish jintong jend, tukutwish twakungin usu wetu wawonsu pa mudimu watwinkishay kusal—mudimu wa kulejan “katumb kawamp ka want . . . ku mangand mawonsu.” (Mat. 24:14) Twij anch mudimu winou wa Ukristu wawiy ukeza kusarumun ujim wa akankuny netu, mulong Yesu watubabesha anch: “Akez kanikisany kudi michid yawonsu mulong wa kwambat dijin diam.” (Mat. 24:9) Chawiy lel, tukashimukinap ni tuziyinap pakatau kutuzengol. Kambuy Pita wafunda anch: “Akarukat, kangal wachitongany ni kukwamuk mulong wa mar makash madia mukach mwen, makat kwez ni kunipak mudi chom chisu chamekana kudi en. Pakwez mudi chiumenanya mar mulong wa Kristu, sangarany.”—1 Pita 4:12, 13.

¹⁴ Pa ndond pa kuyilamin rukuny akankuny netu, tusadiling usu wa kuyilej, ni kwijik anch amwing au asadiling yom yiney mulong wa kuburen kwau kwijik. (2 Kor. 4:4) Tusadil usu wa kusadil chiyul cha Paul chilondila anch: “Yiyukishany awiy akata kunimeshany mar; yiyukishany, kangal wayishingany.” (Rome 12:14) Njil yimwing ya kuyiyukish akankuny yidi ya kuyilembidil. Yesu walonda mu malejan mend ma pa mukandu anch: “Yikatany akankuny nen, akukisilanya yisalany nawamp, yiyukishanya akata kukushingany, akata kukupipejany en yilembidilany.” (Luka 6:27, 28) Kambuy Paul wij nawamp kusutil ku yom yamanay amwinend anch mukankuny ukutwish wakarumuk ni wikal mwin kwilej ushinshamena wa Kristu ni kashalapol mwin mushiku wa Yehova. (Gal. 1:13-16, 23) Mu mukand ukwau, Paul walonda anch: “Akat [kutusaal], etu tukat kuyiyukish; anch atupompat tukat kujikitish; pakutulondau nayimp tukat [kwakul nich mazu mawamp, MM].”—1 Kor. 4:12, 13.

15. Njil ik yipandakena kuwap ya kupandakan tuyimp nich kuwap?

¹⁵ Kukwatijan nich, mwin Kristu wakin ukutesh ni kusadil verse wansudiel udia mu Rome shapitre wa 12 ulondila anch: “Kangal akupandikanany kudi tuyimp, pakwez pandikanany tuyimp nich kuwap.” Satan Djabul ndiy musul wa tuyimp twawonsu. (Yoh. 8:44; 1 Yoh. 5:19) Mu kuburik kwamwinkishau kambuy Yohan, Yesu walonda patok anch akadivar nend azizidilau many “amupandikan kal [Satan] usu mulong wa mash ma Mwan a mukoku, ni mulong wa dizu dia uman wau.” (Kubur. 12:11) Chom chinech chilejen anch njil yiwamp ya kumupandikan Satan ni usu wend uyimp ukwetay pa ditenchik dia katat dia yom yidi kusal yom yiwamp kusutil ku mudimu wetu wa kulejan uman, kulejan rusangu ruwamp ra Want.

Sangarany mu Ruchingej

16, 17. Rome shapitre wa 12 watulej kal yom ik piur pa mutapu utufanyidina (a) kusadil mwom wetu? (b) kusal yom mu chikumangen? (c) kuyisadil antu apompatina ritiy retu?

¹⁶ Kushinshikin kwetu mu wiswimp kwa shapitre wa 12 udia mu mukand wa Paul wayifundinay in Kristu in Rome kwatuvurish kal yom yivud. Twilej kal anch, chitudia atushalapol ipana kal a Yehova, tufanyidin twikala tayad mulong wa kwipan. Mudi spiritu wa Nzamb ndiy utusadishina, chawiy tukata kupan yakupesh yiney nich kwikatin kwetu ayinetu mulong usu utwinkishinay Nzamb utwitiyikishin anch rawiy riner rusot ra rend. Tukwet mushiku mu muchim ni tukat kusadil yiyukish yetu kushalijan nich mushiku. Tukat kusal nich kwikepish ni kwitudish kwin kwawonsu, ni tukat kusal usu wa kulam uumwing wetu wa Ukristu. Tulondwil muchim wa kuyak angendj ni kumekesh kuyanaken kwetu ambay netu.

¹⁷ Rome shapitre wa 12 utwinkishin kand yiyul yivud piur pa mutapu tufanyidina kusal anch kwikal rupompat. Tufanyidinap kwifundakesh ayinetu. Tufanyidin tusala usu wa kupandakan rupompat rawonsu nich yisal yiwamp. Mudi muchitwishikina, pakad kujiril yijil yidia mu Bibil, tufanyidin tusala usu wa kushakam mu chisambu nau antu awonsu. Chiyul chinech chidi cha kusadil mu dijuku, mu chikumangen, pantaliken nau amutej netu, ku mudimu, ku shikol ni mu mudimu wetu wa kulejan. Ap pa chisu tukura nich rupompat ra patok, tukusal usu wetu wawonsu chakwel tupandakana tuyimp nich kuwap, nich kuvurik anch Yehova ndiy kusu ufanyidina kufundakesh.

18. Yiyul ik yisatu yitwinkishinau mu Rome 12:12?

¹⁸ Tang Rome 12:12. Kuwejin pa yiyul yiney yawonsu ya manangu, Paul uletin yiyul yisatu. Mudi mutukutwishap kusal yom yiney yawonsu pakad ukwash wa Yehova, kambuy utuyudil chakwel ‘tudandamen mu kulembil.’ Kusal mwamu kukututwishish tulondula chiyul chend chinech cha kujijaman “mu yakamish.” Kupwa, tufanyidin kukungin manangu metu pa dikez ditulamidinay Yehova ni ‘tusangarany mu ruchingej’ ra mwom wa chikupu, chikala mwiur ap panap pansh.

Kuchirikinamu

• Mutapu ik tufanyidina kusal pantaliken nich rupompat?

• Mu jindond ik mutufanyidina kwikal in chisambu, ni mulong wak?

• Mulong wak tufanyidinap kwifundakesh ayinetu?

[Chipich chidia pa paj wa 16]

Kuyikwashang amutej netu kukutwish kwatukwash kupandakan kasolikany

[Chipich chidia pa paj wa 17]

Ukat kusal usu wa kwikal mwin kulet chisambu mu chikumangen?