Rusangu Ruwamp Mulong Wa Atuzwendj

DIZU DIA NZAMB ditukasikeshin anch: “Kakuvuramenip ayimana mar.” (Kuseng 9:18, TMK) Bibil ulondin kand piur pa Sakatang wetu anch: “Ukat kuburil chikas chey ni kuwanyish rusot ra chom chawonsu chidia mwom.” (Kuseng 145:16, TMK) Ruchingej riner ramekeshau mu Dizu dia Nzamb ridiap chilat bwat. Nzamb Mwin Dikand Diawonsu ukutwish kupan ukwash uswiridikina mulong wa kupwish uzwendj. Ov, chom ik chiswiridinau atuzwendj?

Muntu umwing utadina milong ya nfalang wa mu Afrik walonda anch, ngand ja uzwendj jiswiridin “in kutakel ku usu akweta ranaken.” Chitongijok chidi anch mulong wa kupwish uzwendj, muntu ukweta uyaj ufanyidin kusal yom nich ranaken chakwel aswimpa yom ni kupwish uzwendj. Tukutwish kuwejaku anch ntakel ukutwisha kupwish uzwendj kudi antu awonsu ufanyidin kwikal ntakel wa mangand mawonsu mulong uzwendj ukash udi chisu chivud chibudikin cha kulik kwisakan kwa mangand, mamwing makwet makwau maburedil. Chikwau kand, ntakel ukeza kupwish uzwendj ufanyidin kutwish kusal chom chimwing piur pa musul wa uzwendj​—chibachikin chetu cha choy. Ov, kwisu tukutwisha kutan mwant utentamina mwamu?

Namb wamutuma Yesu nich rusangu ruwamp kudi atuzwendj. Pimanay Yesu mulong wa kutang piur pa mudimu wamwikishay Nzamb, ndiy walonda anch: “Spiritu wa [Yehova] udi padi am, mulong ndiy wanzizidil kal many anch niyileja atuzwendj jinsangu jiwamp.”​—Luka 4:16-18, TMK.

Ov, Risu Rusangu Ruwamp?

Nzamb wamutonda Yesu mudi Mwant. Riner ridi chakin kamu rusangu ruwamp. Ndiy udi Ntakel muwamp ukupwisha uzwendj mulong (1) ndiy uyitakedil antu awonsu ni ukwet usu wa kusal mwamu; (2) ndiy wayisadila atuzwendj nich ranaken ni wayileja in kwilej end chakwel kuyibangin; ni (3) ndiy ukutwish kudiosh yikata kulet uzwendj, chibachikin chetu chitwaswana cha choy. Tushinshikinany amboku mikadil yiney yisatu ya rusangu ruwamp.

1. Ulabu wa Yesu wa kuyikel michid yawonsu Dizu dia Nzamb dilondin piur pa Yesu anch: “Amwinkisha usu wa kuyikel . . . chakwel antu a michid yawonsu ni mitapu yawonsu ni jindim jawonsu amusadila ndiy.” (Daniel 7:14) Ov, ukutwish kutongijokin pa yiyukish mudi ik ya kwikal nich winyikel umwing kusu ukeza kuyitakel antu awonsu? Winyikel winou ukez kapwish njit ni kubulijan piur pa mapit madia pa divu. Muntu mwawonsu ukutwish kutambul yiyukish pakad katond. Yesu amwinend utwinkishin ruchingej anch ndiy ukez kikal Nyikel wa ngand ni ukez kwikal ni usu wa kusal mwamu. Ndiy walonda anch: “Anginkishin kal ulabu wawonsu wa mwiur ni wa pansh.”​—Mateu 28:18.

2. Yesu wayovila atuzwendj riy Mu mudimu wend pa divu, Yesu wayisadila atuzwendj nich riy. Chilakej mband umwing washadisha mapit mend mawonsu mulong wa kwiyokish chawiy lel wakwata ku kabwik ka Yesu nich ruchingej ra kuyerik. Ndiy wading ni musong wa rilong ra mash mu mivu 12 ni mading mayej ma kushadish mash chakin kamu. Kwambatan nich Chijil, muntu win mwawonsu ukeza kumukwat wela kwikal mwin kwijond. Pakwez Yesu wamumekeshina rukat. Ndiy walonda anch: “Mwanam mband, ey wayerik kal mulong wa ritiy rey. Yang kwey nich chisambu, musong wey wapwa kal kamu chikupu.”​—Marko 5:25-34.

Mlejan ma Yesu mading nich usu wa kuswimp michim ya antu chakwel niyawiy ikala ni riy. Chilakej tal mutapu wamwakulay Yesu muntu wasota kwijik chifanyidinay kusal chakwel amusangeresha Nzamb. Muntu winou wading wij anch Nzamb usotin anch tumukata mutej netu, pakwez ndiy wamwipula Yesu anch: “Mukwetu mwin nany?”

Pamwakulay Yesu walejana chishimu chend chamushena cha muntu wakasa weny wa kudiokal ku Yerusalem kuya ku Yeriko, wabulau ni kumusha “ukat kulengumwok.” Mwin kupesh wasuta mwi njil yiniya wasenguril kuns. Mwin Levi ni ndiy wasala chilik chimwing. “Pakwez mwin Samaria niyend wasuta mwin njil yiniya, chad chamumanay muntu winou, wamwovila riy nakash.” Ndiy wowisha yitat ya muntu winou, kupwa wamuteka pa nnam wend ni wafuta ku chikumbu cha aeny chakwel amwoka. Yesu wamwipula anch: “Ov, . . . nany wading mukwau wakin wa muntu winou wabulau kudi aij?” Ndiy wamwakula anch: “Mukwau, ndiy kamu wamwovila riy wa.” Kupwa Yesu walonda anch: “Niyey, yang, ukasala kand mwamu.”​—Luka 10:25-37.

Antu ikadila Atuman a Yehova ilejin malejan minam ma Yesu ni aswimpin yaku yau piur pa kuyikwash antu aswiridina ukwash. Chilakej, mwin kufund umwing wa ku Lettonie wafunda mu buku wend Les femmes dans les prisons soviétiques piur pa mayej mend pading pasadilay kwi ndond kwa rukan rijim ra Potma mu muvu wa 1960. Ndiy wafunda anch: “Mu mayej mam mawonsu [Atuman] ading angang akash. Nachingejinap kuyerik kuwamp.” Ndiy walonda kand anch: “Atuman a Yehova amening anch afanyidin kuyikwash antu awonsu chikalap nchik relijon ap muchid wend.”

Pburenau Atuman a Yehova nfalang ku Ancón mu Équateur, pashalau pakad mudimu ap akad kwisak, ambay nau Atuman akwata mupak wa kuyitwadin nfalang, kuyisukin yakudia ya kulandish kudi in kuta ansh padingau ni kuchirik uchuku kwayau ni kuta anch (tal chipich chidia ku katatuku). Antu awonsu mu chikumangen asala pamwing, kuwejinaku kand ni an. Awiy ading ni kusambishang pa saa wa kusambish dichuku ni dichuku pamanch chakwel yakudia yikala tayad pa chisu chikushika wat pa saa wa kanying. Nfalang japanau kudi Atuman ajaurila kwambatan nich maswir ma muntu ni muntu.

Yom yiney yamekesha anch chilakej ni malejan ma Yesu yading ni usu wa kuswimp yaku ya antu pantaliken ni kuyikwash antu aswiridina ukwash.

3. Usu ukwetay Yesu wa kukarumun yibachikin yetu ya chitil Yibachikin ya muntu ya kwikal nich choy chidi chom chijiken mu mangand min mawonsu. Bibil uchitazukin anch “chitil.” Ap kambuy Paul wafunda anch: “Chawiy nimen anch, usu wa yom yiney yimeken kudi am, pinikutonga anch, ing nasalang yom yiwamp, nikat kutwish kutond ching kusu kusal yom yiyimp.” Kupwa ndiy wawejinaku kand anch “Ov, nany ukez kwinkamunin ku mujimbu winou ukata kwintwal ku rufu? Namujikitish Nzamb mulong wa Yesu Kristu ukata kusal chom chinech.” (Rom 7:21-25) Pinap Paul wisambina piur pa mutapu Nzamb, kusutil kudi Yesu ukez kuyikamunin in kwifukwil end akin kudiokal ku yibachikin ya chitil yaswanau, yimwing yau yidi choy, musul uletina uzwendj. Ov, chom chinech chikez kuwanyin mutapu ik?

Chisu chatambulay Yesu dibatish, Yohan Mubatish wamumekesha Yesu kudi antu anch: “Talany kwa, Mwan a Mukoku wa Nzamb ukata kudiosh yitil ya antu!” (Yohan 1:29) Piswimp ap divu dikez kwikal ni antu akwolau kudiokal ku yibachikin ya chitil yaswanau, kuwejinaku yibachikin yau ya choy. (Isay 11:9) Yesu ukez kupwish milong yawonsu yiletina uzwendj.

Chidi cha musangar mudi ik pakuman chisu chikezau antu awonsu kwikal nich yom yiswiridinau! Dizu dia Nzamb dilondin anch: “Antu awonsu akez kashakam mu chisambu mu yir yau ya mitond ya nviny ni mitond ya nfung, kwikil muntu ap umwing ukeza kayakamish.” (Mike 4:4) Mazu minam mamekeshin chisu chikezau antu awonsu kwikal ni mudimu usangareshina, diking ni kwikal nich chisu cha kusanger ngand yakad uzwendj, yawonsu mulong wa kumushiman Yehova.