Mivu Chitot ya Kuyikel kwa Want!

1. Mutapu ik wading mudimu wa kulejan wa usey kudi Yesu? Rumburil.

YESU wakatang kwisambin piur pa Want wa Nzamb. Padingay panap pansh, Want wawiy wading mutu wa mulong ujim kusutamu yikwau yalondangay. Wajimbula Want tupamp 100 ni kusut mu mudimu wend wa kulejan. Want wading chakin kamu wa usey kudi Yesu.​—Tang Mateu 12:34.

2. Antu inch asadina mbil yidia mu Mateu 28:19, 20, ni mulong wak tulondin mwamu?

² Kupwa kwa kuvumbuk kwend, Yesu wayimekena akadivar 500 ni kusut. (1 Korint 15:6) Pamwingap pawiy papanay Yesu mbil ya kulejan kudi “antu a michid yawonsu.” Mudimu winou wadingap uswapela.a (Tal mazu ma kwinshin.) Wayileja anch mudimu wa kulejan ufanyidin kudandamen chisu chilemp, kushik ni “kwisudiel kwa mangand.” Piulejena rusangu ruwamp lel, ukat kukwash ku kuwanyin kwa uprofet winou.​—Mateu 28:19, 20.

3. Yom ik yisatu yatukwasha mulong wa kulejan rusangu ruwamp?

³ Kupwa kwa Yesu kuyinkish mbil ya kulejan, wayileja anch: “Nidi nen.” (Mateu 28:20, TMK) Chawiy, Yesu wayikana in kwilej anch ukutakel mudimu wa kulejan ni anch ukuyikwash chakwel alejana pa mangand mawonsu. Yehova niyend udi netu. Yehova watwinkisha “yom yawonsu yiwamp” mulong wa kutukwash kulejan. (Hebereu 13:20, 21) Mu mutu wa mulong winou, tukushinshikin yom yisatu pakach pa yom yiney yiwamp: (1) yom ya kusal nich mudimu, (2) mitapu yitwasadina, ni (3) kufumb kutwatambula. Chakusambish, tushinshikinany amboku yom ya kusal nich mudimu yasadidina mu mivu 100 yasutina ey.

YOM YIYIKWASHINA ATUSHALAPOL A NZAMB MULONGA WA KULEJAN

4. Mutapu ik watukwasha yom kushalijan mu mudimu wetu wa kulejan?

⁴ Yesu wafanikesha rusangu ra Want ni kukun mbut mwi ndond yishalijadina. (Mateu 13:18, 19) Mulong wa kutenchik divu, mwi kukun ukat kusadin yom kushalijan. Chilik chimwing, Mwant wetu watwinkisha yom tukutwisha kusadin chakwel tuyikwasha antu kwitiy uruu wetu. Yom yimwing twayisadina mu chisu chikemp, pakwez yikwau tuyisadidin kushik lel. Chad, yom yiney yawonsu yatukwasha kusal yom yivud mu mudimu wetu wa kulejan.

5. Kart wa kupan nich uman chom ik, ni mutapu ik wadingau kumusadin?

⁵ Mu muvu wa 1933, in kulejan asambisha kusadin kart wa kupan nich uman, chom chayikwasha antu avud kusambish kulejan. Kading ka kart kakemp karumburila uruu wa Bibil mu winswimp. Yisu yimwing abudisha kart mwindjing ukweta uruu usu. Mukadivar Erlenmeyer wading ni mivu dikum pasadinay kart wa kupan nich uman kapamp ka kusambish. Ulondina anch: “Mazu ma kusambish nich mading anch, ‘Ukutwish amboku kutang kart ou?’ Kupwa kwa mwin chikumbu kutang kart, twamulejang yifundinau pa kart kupwa twaya.”

6. Mutapu ik wakwasha kart wa kupan nich uman?

⁶ Kart wa kupan nich uman wayikwasha in kulejan mu mutapu kushalijan. Chilakej, in kulejan amwing ading ovil usany, ni ap anch ading akatin kamu kulejan, pakwez kadingap ij yifanyidina kulond. In kulejan akwau ading akwet mushiku nakash. Atwishang kumulej mwin chikumbu yom yawonsu yading yijau mu a minit akemp pakwez alondang pakad nkeu. Kart wa kupan nich uman wayikwasha in kulejan awonsu chakwel apana uman winswimp ni wovikena.

7. Yikokujol ik yadingaku mu kusadin kwa ma kart?

⁷ Kwading kand yikokujol yikwau. Nambaz Grace Estep ulondin anch: “Yisu yimwing, afanyina kutwipul anch: ‘Mwaning, yom ik ulondinanya? Ukutwishap kwinlej piur pa chom chinech?’” Chikwau kand, in yikumbu akwau katwishangap kutang yom yadinga pa kart. Akwau niyawiy atambulang kart ni kufung kapamp kamwing chis. Antu amwing ading akisin uruu wetu, chawiy, apulang ma kart metu. Chikalap nchik yikokujol yiney, ma kart ma kupan nich uman mayikwasha in kulejan chakwel ayileja antu akwau ni kwikal ijikena mudi in kulejan a Want.

8. Mutapu ik wasadinau fonograf wa kusend? (Tal chipich cha kwinsambishil.)

⁸ Chom chikwau chasadinau kupwa kwa muvu wa 1930 chading fonograf. Atuman amwing amutazukang anch Aron mulong mashin ma fonograf malondang pa ndond yau. (Tang Kubudik 4:14-16.) Anch mwin chikumbu wakatish kutesh, mwin kulejan wafanyina kumwovish chikunku chikemp cha diskur dia Bibil ni kumushil mikand yimwing. Yisu yimwing, majuku mafanyina kukumangan mulong wa kutesh diskur! Mu muvu wa 1934, sosiete Watch Tower wasambisha kusal ma fonograf ma kusend mulong wa mudimu wa kulejan. Kupwa, akadivar akwata ma diskur 92 mashalijadina.

9. Fonograf wa kusend wading ni yibudikin ik?

⁹ Pateshay Hillary Goslin diskur ku fonograf, wamusenda mu rubing rumwing mulong wa kutesh uruu wa Bibil pamwing ni antu akwau. Mudi chibudikin, antu avud itiyija uyakin ni atambula dibatish. Kupwa, ampanyend aad a mukadivar Goslin ayitazuka ku Shikol ya Gilead ni ikala amishoner. Mudi kart wa kupan nich uman, fonograf wa kusend wayikwasha in kulejan avud chakwel asambisha kulejan. Kupwa, kusutil Shikol ya Mudimu wa Uteokras, Mwant ukuyifumb antwend chakwel ikala alej akash.

KUSADIL MITAPU KUSHALIJAN MULONG WA KUYIKIMB ANTU

10, 11. Mutapu wasadilau magazet ni radio mulong wa kulejan rusangu ruwamp, ni mulong wak mitapu yiney yading yiwamp?

¹⁰ Mu umutakel wa Mwant wetu, antu a Nzamb asadila mitapu kushalijan mulong wa kuyikimb antu avud mu mudimu wa kulejan. Mitapu yiney yading ya usey chisu chadingaku in mudimu akemp. (Tang Mateu 9:37.) Chilakej, kusut kwa mivu yivud asadila magazet mulong wa kulejan rusangu ruwamp. Rubing rawonsu, mukadivar Russell watumanga diskur dia Bibil chakwel adichapa mu gazet. In kuchap atumanga ma gazet mading makwet diskur diend mu Canada, mu Europe ni mu États-Unis. Mu muvu wa 1913, ma diskur ma mukadivar Russell amapalangesha mu magazet 2 000 ni amatanga kudi antu 15 000 000 ni kusut!

¹¹ Asadina kand radio nakash mulong wa kulejan rusangu ruwamp. Dichuku dia ngond dia 16 ngond wa 4 muvu wa 1922, mukadivar Rutherford wasala diskur diend dia kusambish ku radio, ni antu piswimp ni 50 000 aditesha. Pa pinipa, twasambisha kusadil radio wetu watazukangau anch WBBR, ni program wa kusambish amusala mu dichuku dia ngond dia 24 ngond wa 2, 1924. Dichuku dia ngond dia 1 ngond wa 12, 1924, Chinong cha Kalam chalonda anch: “Twitiyijin anch radio udi mutapu umwing uswapela ni wakad kushesh nfalang jivud wa kupalangeshin uyakin kupandakanamu mitapu yawonsu yasadinau pasak.” Mudi magazet, radio wakwasha mulong wa kuyikimb antu avud mu misumb mwadinga in kulejan akemp nakash.

12. (a) Mitapu ik ya kulejan uman patok yikusangareshining nakash? (b) Chom ik chikutwisha kutukwash kurish nich wom tukutwisha kwov piur pa kulejan uman patok?

¹² Kulejan uman patok udi mutapu ukash lel usadinau mulong wa kukimb antu. Asala usu uvud mulong wa kuyilej antu ndond ya kwimikin ma motak, ndond ya kusendin mashuw, mu ma bal-bal, ndond yidia antu avud, ni mu sok. Mudimu wa kulejan uman patok ukat kukwovish wom? Anch chidi mwamu, it ukwash ni shinshikin chilakej cha mukadivar Manera, kalam wa munyingumuku walonda anch: “Twashinshikinang mulad wawonsu usu watwinkangau mudi mutapu ukwau wa kumusadil Yehova, mutapu ukwau wa kumekesh kushinshaman kwetu kudiay ndiy, mutapu ukwau wa kupak kushinshaman kwetu, ni twading tayad mulong wa kumekesh mushiku wetu wa kumusadil Nzamb mudi mudia rusot rend.” Anch twarish nich wom wetu ni twasadin mitapu yisu ya kulejan nich, tukukasikesh ruchingej retu mudiay Yehova ni tukwikal in kulejan awamp.​—Tang 2 Korint 12:9, 10.

13. Mulong wak kusadin kapend ketu ka web mu mudimu wa kulejan udi mutapu uwamp wa kulejan, ni yom ik wataninamu mu kusadin kapend?

¹³ In kulejan avud akweting musangar wa kuyilej antu piur pa kapend ketu ka web, jw.org., pakutwishau antu kutang ni kusend mikand yilondina piur pa Bibil mu mazu 700 ni kusut. Dichuku diawonsu, antu uvud wa miliyon 1.6 akat kwandam pa kapend ketu. Pakur, radio wayikwasha antu kutesh rusangu ruwamp mu misumb kushalijan. Lel, kapend ketu ka web kasadin mutapu umwing.

KUYIFUMB IN KULEJAN RUSANGU RUWAMP

14. In kulejan akwet kuswir nich kufumb ik, ni shikol ik yayikwashina chakwel ikala in kulejan awamp?

¹⁴ Yom ya kusal nich mudimu ni mitapu twisambinang yading yiwamp nakash. Pakwez, in kulejan a kwinsambishil ading akwet kuswir kwa kuyifumb piur pa mutapu wa kuyisadin. Chilakej, yisu yimwing mwin chikumbu kasangerangap kutesh yadingau kulond ku fonograf. Yisu yikwau mwin chikumbu wakatishang ni wakimbang kwilej yom yivud. In kulejan ading akwet kuswir kwa kwijik mutapu wa kurish nich yikokujol nich nkeu ni mutapu wa kwikal in kulejan awamp. Chakin kamu spiritu wa Nzamb wamukwasha mukadivar Knorr walonda anch chading cha usey kudi in kulejan kwilej mutapu wa kulond mu mudimu wa kulejan. Chawiy lel, kusambishin mu muvu wa 1943, yikumangen yasambisha kutenchik Shikol ya Mudimu wa Uteokras. Shikol yiney yayikwashin antu avud kwikal in kulejan awamp.

15. (a) Yom ik yayishikena antu asala ma diskur ku Shikol ya Mudimu wa Uteokras? (b) Mutapu ik umekena kushilamu kwa Yehova kudia mu Kuseng 32:8 mu mwikadil wey?

¹⁵ Akadivar avud kadingap akwet chaku cha kulond kurutu kwa antu avud. Mukadivar Ramu uvurikin diskur diend dia kusambish diasalay mu muvu wa 1944. Diskur diading kulondin piur pa muntu wa mu Bibil Doweg. Walonda anch: “Mend ni makas mam mazala nakash, ni mazeu mazala.” Uwejidinaku anch: “Yawiy yom yanshikena panasala diskur diam dia kusambish, pakwez nalikap.” Ap anch chadingap chiswapela, an ading kusal ma diskur ku shikol. Mukadivar Manera uvurikin chashikena pasalay mwan nsand umwing diskur diend dia kusambish: “Mwan winou wading ukwet wom pasambishay diskur diend, wasambisha kudil. Pakwez mulong wakimba ching kusal, wasala diskur diend djat ni kwinsudiel nich kudil.” Pamwing ap utwishinap kulet yakul mu yikumangan ap kusal mudimu mulong wovil wom ap utongin anch ukutwishap. Anch chidi mwamu, mwita Yehova chakwel akukwasha kupandakan wom. Ukukukwash ching mwayikwashay ansand a Shikol ya Mudimu wa Uteokras ya kusambish.​—Tang Kuseng 32:8.

16. Shikol ya Gilead yading yikwet rutong ik? (a) pasak ni (b) kudiosh mu muvu wa 2011?

¹⁶ Dirijek dia Nzamb diayifumba kand antu kusutil Shikol ya Gilead. Rutong rimwing ra shikol yiney ridi ra kuyikwash in kwilej kukasikesh maswir ma kulejan rusangu ruwamp. Shikol ya Gilead yasambisha mu muvu wa 1943, ni kudiosh chisu chinicha ayifumbin kal antu 8 500 atumau mu jingand 170. Kudiosh mu muvu wa 2011, antu atazukinau ku shikol yiney adi ayibol a pakampwil, atulam a munyingumuku, antu asadidina ku Betel, ap amishoner akadiau kal kutazuk ku shikol yiney.

17. Mutapu ik wakwasha shikol ya Gilead?

¹⁷ Shikol ya Gilead yakwasha mudimu wa kulejan? Mwaning. Shinshikin chashikena mu Japon. Mwi ngond wa 8, 1949, kwading in kulejan want mwinshin mwa dikum mwi ngand yiniya. Pakwez kwinsudiel kwa muvu winou, amishoner 13 asambisha kusal mudimu pamwing ni in kulejan want mwingand yiniya. Lel, kudi in kulejan want uvud wa 216 000 mu Japon, ni in kulejan avud adi ayibol!

18. Shikol ik yikwau tukwetinga?

¹⁸ Tukwet mashikol makwau mavud, mudi Shikol ya Mudimu wa Want, Shikol ya Mudimu wa Uchibol, Shikol ya in Kulejan Want, Shikol ya atulam in Kwendangan ni Akajau, ni Shikol ya Yid ya Komite wa Mutiy ni Akajau. Shikol yiney yayifumbin kal nawamp akadivar ni anambaz kukasikesh ritiy rau. Chidi chakin anch Yesu udandamedin kuyifumb antu avud.

19. Chom ik chalonday Mukadivar Russell piur pa mudimu wa kulejan, ni mutapu ik wawanyina yom yiney?

¹⁹ Want wa Nzamb wasambisha kuyikel kwasutin kal mivu 100. Mu chisu chinech, Mwant wetu, Yesu Kristu, udandamedin kutakel mudimu wa kulejan. Mu muvu wa 1916, Mukadivar Russell wading ukwet kashinsh anch kulejan rusangu ra want kwafanyina kusadik pa mangand mawonsu. Walonda anch: “Mudimu uyil swaa, ni ukudandamen kuya kurutu, ukudandamen kamu kuya kurutu, mulong chifanyidin kusal mudimu wa kulejan ‘rusangu ruwamp ra want’ pa mangand mawonsu.” (La foi en marche, kudi A. H. Macmillan, paj 69) Mudimu winou usadikin lel! Tumujikitishin Yehova, Nzamb wa chisambu, utwinkishina chisu chawonsu yom tukweta nich kuswir mulong wa kusal rusot rend!