Program musu wa chikunguril cha pakampwil cha dichuku dimwing
Program wa yikungurilya pakampwil ya dichuku dimwing ukusambisha mu Mwinses 1999 ukwet mutu wa mulong: “Tukimbany mu Yom Yijingamina ya Nzamb.” (1 Kor. 2:10) Ov, yom ik ya usey tukwileja?
Mu kukimb kwau kwa ronganyin, antu avud kakatap kusanger yikatau kuman. Baibel utukasikeshin, mud mukuchilejanay kalam wa sirkwit mu chikunku chend chikweta mutu wa mulong “Kukimb Dizu dia Nzamb Kuletining Diswedish.” Mwin kulond mweny ukwisambin kovijan kudia pakach pa kukimb mu yom yijingamina ya Nzamb ni kulejan rusangu ruwamp pakushinshikinay chipul “Ov Mutapu ik Umening Mudimu wa Want wa Kulejan?”
Anvaj akutwish nchik kuyikwash aanau kupund mu Dizu dia Nzamb? Akupan yiyul yifanyidina mu chikunku “Andjikany Dizu dia Nzamb mu Anen.” Ansand in Kristu ayikwashining mwi njil yiwamp nakash nich kwinungin pamwing ni antu akudila muspiritu mu chikumangen. Yilikej ya mutapu wa yikwashinau mutapu uwamp akuyisambin mu chikunku “Ansand Ilejidina Kud Amakurump.”
Yehova udi Mwin kulejan ujindj. Ov, mulong wak tufanyidina kujijaman kukimb chipau cha muspiritu chijingamina pa chisu chinech? Mwin kulond mweny ukurumburil yalejanay Yehova pa yirung ya pasak ni ya katat mu diskur “Yehova Ukat Kulejan Pakemp Pakemp Yom Yijingamina.” Chinech chikukasikesh kutakaman kwetu kwa kujijaman “kukimb yom yijingamina ya Nzamb.”
Tutonginany kukumangan. Antu atongidina kumekesh kwipan kwau kud Yehova kusutin dibabatish afanyidin kumwijikish kalam-ntakel mud kamu chitwishikina. Rusot retu ra kashinsh ra kukimb nakash mu Dizu dia Nzamb rikwikal rikasikeshinau nich yituteshina. Chawiy lel kangal twaburen dichuku dined dia pakampwil dia mafundish ma muspiritu!