Ov udi mwin kulejan wa want wa chisu ni chisu?
1 Twasangara etu awonsu kutesh anch Congo-Kinshasa washikedin kuvul kwa in kulejan 114 071 mu Mwinses 1999. Chakin kamu udi usu wa uumwing ni kujijaman! Kulondulijan ni rapor wa ngond walondulap, in kulejan amwing chading chiyikasikedin kwikal in kulejan a Want a chisu ni chisu, mulong kuvul kwadinga piswimp kwa in kulejan 105 600. Chinech chimekeshin anch mwin kulejan 1 pa in kulejan 13 kadingap wirijekina mulong wa kubudikin mu mudimu wa kulejan ngond ni ngond. Tuchingejin anch yikasikesh yilondwila ey yikutwish kukwash kurijek mwikadil winou.
2 Sanger chisend: Kusanger kwetu kufanyidin kwikal kujim mulong wa dilau ditwitapidila dia kulejan rusangu ruwamp ra Want kud antu akwau. Mujikit winou ukat kusangarish muchim wa Yehova ni ukat kuyikwash antu in muchim utok kwilej njil ya mwom. (Jnsw. 27:11; 1 Tim. 4:16) Kupan uman chisu ni chisu kukat kuyish kurutu ukaliweny wetu mu mudimu wa kulejan ni kukat kulet musangar wa kuusal.
3 Pan rapor wa mudimu: Amwing akata kusal mudimu wa chingand akat kudiul kupan rapor wau wa mudimu pa chisu chiwanyidina. Tufanyidinap kutong anch usu tusadina wafanyidinap mulong wa kupan rapor. (Tal Marko 12:41-44.) Chikalap nchik, tufanyidin kupan rapor wa mudimu twasadina! Kwikal ni program ku chikumbu, mud kusadin kalandrie, mulong wa kufund chisu tusutishina mu mudimu wa kulejan kukukwash kuvurik kufund rapor wa kashinsh kapamp kamwing kamu kwisudiel kwa ngond ni ngond.
4 Pan ukwash uswiridikina: Yitenchik ya pol petu yikutwish kwikal yiwamp mulong wa kuyikwash antu aswiridina ukwash wa kubudikin chisu ni chisu mu mudimu wa kulejan. Kalam’a ujindj wa chikumangen ni in kutakel a dilejan dia buku awapidil kutenchik chakwel in kulejan ayifuvu apana ukwash. Anch ukwet an ap in kwilej ney Baibel adia in kulejan akad kal kubabatishiu, yifundisha kupan rapor wau wa mudimu ngond ni ngond.
5 Vurik rusangu ridia mu Tour de Garde wa Mwinkind 1, 1997, “Kumujikitish Yehova Mulong wa Mwom Ulemp mu Mudimu Wend.” Nambaz Ottilie Mydland wa mu Norvej wikala mwin kulejan wa rusangu ruwamp wa chisu ni chisu kurutu kwa kutambul dibabatish diend mu 1921. Kwinyim kwa mivu makum sambwad ni musamban, nich mivu 99, walonda anch: “Nikwet musangar anch chichitwishikin ni katat kud am kwikal mwin kulejan wa chisu ni chisu.” Udi mwikadil muwamp mud ik wa kwilikej kud atushalapol a Yehova awonsu!