Ov Ukat Kukwashang Chakwel Kupan Rapor Wakin?

Jinsangu jivud ja Baibel jijimbwil uvud kanang wijikena, ukata kukwash kwikal nich chitongijok chovikena piur pa yom yashikena. Chilikej, Gedeyon washesha chibeng cha in Madian ni amakundj 300 kusu. (Ank. 7:​7, NW) Mwangel umwing wa Yehova wajipa amasalay 185 000 a in Siri. (2 Ant 19:​35, NW) Pa Pentekot wa muvu wa 33 C.C., abatisha piswimp antu 3 000, ni kupwa kwa chisu chikemp uvud wa in kwitiyij wiwejinaku kushik ku 5 000. (Midimu 2:41; 4:⁠4) Mu jinsangu jinej chimeken kwau patok anch atushalapol a pakur a Nzamb asala usu nakash chakwel kufund rapor uwanyidina ni wakin.

² Dirijek dia Yehova ni diawiy dikat kutufundish nlel kupan rapor wa mudimu wa chingand ngond ni ngond. Kusadil kwetu pamwing kushinshamena nich ditenchik dined kukat kukwash kupan uman uwamp wa mudimu wa kulejan. Marapor makutwish kumekesh anch mutambu umwing wa mudimu ufanyidin kubangin nakash ap anch kudi kuswir kwa in kusal mudimu avud ku chikunku kanang cha chingand. Mu chikumangen, marapor ma mudimu wa chingand makat kuyikwash amakurump kuyijik antu akweta usu wa kujimbish mudimu wau ni antu aswiridina kutambul ukwash. Marapor piur pa mutapu uyila kurutu mudimu wa kulejan Want ukat kuyikasikesh akadivar awonsu in Kristu. Ov ukat kusal usu ku mutambu wey chakwel kupan rapor wakin?

³ Chisend Chey Amwiney: Ov chikat kukukasikesh kuvurik yiwasadila mu mudimu wa kulejan, kwisudiel kwa ngond? Anch mwamu chidia, ov ukutwishap kufund rapor wa mudimu wey chisu chin chawonsu ubudikina mu mudimu wa chingand? Antu amwing akat kusadil kalandrie ap ajenda (karne). Akwau ni yawiy asendining dipaper dia rapor wa mudimu diakad kufund. Kwisudiel kwa ngond, pan kapamp kamwing rapor wey kud kalam wey wa dilejan dia buku. Ap kand, anch usotin, ukutwish kutul rapor wey mu mushet wa rapor udia ku Chot cha Want. Anch wavuramen kupan rapor wey, manijan kapamp kamwing ni kalam wey wa dilejan dia buku pakad kulabijok pa ndond pa kuchingel anch ndiy akwitay. Kupan rapor wa mudimu wey nich muchim wey wawonsu kumekesh kalimish mulong wa ditenchik dia Yehova ni kubangin kwa rukat mulong wa akadivar atekinau mulong wa kukumangej ni kufund rapor.​—⁠Luka 16:⁠10.

⁴ Chisend cha Kalam’a Dilejan dia Buku: Chidiay kafung mwin kubabal ni mwin kuta matu, kalam’a dilejan dia buku ukat kubangin nakash mudimu wa chisak mu kusut kwa ngond mwawonsu. (Jinsw. 27:23) Ndiy wij anch mwin kulejan mwin mwawonsu wasadil pakad kujing, mutapu ufanyidina, nich musangar ni ukutwish kupan swa ukwash anch kudi muntu wakad kubudikin mu mudimu wa kulejan mwi ngond mwawonsu wakabuj. Dizu dia kukasikesh, chiyul chimwing chifanyidina, ap kumwit kumubachikij mu midimu ya chingand yiney yawiy yom yiswiridikina.

⁵ Kwisudiel kwa ngond, kalam’a dilejan dia buku ufanyidin kutal nawamp anch antu in awonsu a mu chisak (chend cha dilejan dia buku) awanyishin nawamp chisend chau cha kupan rapor wa mudimu chakwel anch kalam’a ujindj atwisha kutum ku biro wa mutiy rapor wakin wa chikumangen kurutu wa dichuku dia musamban dia ngond ulondwilaku. Payilay ngond kwisudiel, chikutwish kwikal cha ukwash ku mutambu wend kuvurish chisak cha dilejan ni kwikal tayad nich mapaper ma kupanin rapor kwi ndond yikatau kusadin dilejan dia buku. Anch antu amwing avuramen kupan rapor wau wa mudimu, ukutwish kuyivurish mu mutapu umwing ufanyidina ni kuyikasikesh.

⁶ Kupan swa marapor metu ma mudimu wa chingand kukat kukwash kufund rapor ulejena chakin kamu yasadinau mu chingand. Ov ukez kusal yiufanyidina kusal mulong wa kupan swa rapor wa mudimu wey wa ngond ni ngond?