Ndol—Chisu cha kwikal ni mushiku wa kusal yom yiwamp!
1 Rinkind mukash pakimbinay kutut piswimp ni ndond yidia antu, kuswir kwa kuyibabesh antu ku chak chikimbina kuyishiken kukat kwikal kuswiridikina nakash. Anch rinkind mukash washik kal kamu piswimp nakash, chifanyidin kubabesh nakash chisu ni chisu. Mulong wak? Mulong mwom wa antu udi mu chak! Chitwishikin anch antu amwing kateshap kwau kubabesh kwa kusambish. Chitwishikin akwau atesha pakwez adiula kwirijek. Chidi chilik chimwing ni kubabesh kwa Nzamb kutwinkishinau kwijikish kurutu kwa “chinzwij mukash” wa kadimu katentamina ka Nzamb chishesha yom yawonsu ya mangand mayimp minam. (Jnsw. 10:25) Mwom wa chikupu wa tunan twa mamiliyon ma antu udi mu chak! Chifanyidin kuyibabesh. Tufanyidin kwikal ni “mushiku wa kusal yom yiwamp.” —Titus 2:11-14.
2 Mu yirung ya mivu, Atuman’a Yehova ading abachikinau kusal chirung cha Chivurish kwikal chisu chimwing cha mushiku wa pakampwil mu mudimu wa kulejan. Kwisambishil kwa chishipu cha 1939, Informateur, katat Mudimu Wetu wa Want waleta dikasikesh anch: “Nich chirung chinech cha ngond wa kasatu kushik ku ngond wa musamban chasambishina kal, ni chisu chiwamp chidaku, tuchingejin anch in kulejan a [chikumangen], akulejan tupamp twaad kusut ni asaa a ayibol ni yawiy akwiwejinaku. Ndol udi ngond ukweta machuku ma Rubing matan. Ukwet kand machuku ma Mpos matan. Tusalany Diampos din diawonsu ni Diarubing din diawonsu mwi Ndol . . . chisu cha kupan uman wa pakampwil.” Riner radinga rutong ra kashinsh ritekinau akadivar mivu 60 kwinyim! Muvu unou, mud kamu mu 1939, ngond wa Ndol ukwet machuku ma kwisudiel kwa rubing matan. Ov yom ik utongidina kusal ngond winou? Yom ik ufundina pa kalandrie wey wa Ndol 2000? Tongin kusal mutapu ufanyidina midimu yiwamp pamwing nau antu a Yehova mwi ngond winou wa pakampwil wa mijikit ya muspiritu yiyila kurutu.
3 Yituchingejina kusal: Dichuku dia usey nakash dia muvu wa 2000 dikwikal mwi ngond unou. Didi dichuku dia Ndol 19, dichuku dia musambu wa rufu ra Yesu. Tusalany usu wa pakampwil chakwel kuyitazuk antu avud mud muchitwishikina kwez ku Chivurish. Mud chatuyudilau ngond wadap ou, tufundany list wa antu awonsu akutwisha kwez ku Chivurish ni tutala nawamp anch tuvuramedinap muntu ap umwing. Pakach pa antu atazukinau pawapidil kwikal in kulejan in awonsu akad kutulang rapor, antu twilejina nau Baibel, antu itukata kuya ni kutal pa kuchirikinamu, antu adinga ni kwilej pasak, ambayetu a mudimu, ambayetu a shikol, antu tushicha nau ndond yimwing, anamakwetu, ni antu akwau itwija. Ov antu asotina kwez kukumangan akwet kal mwakwendil? Anch bwat, ov ukutwishap kuyikwash nich rukat? Urel wa Chivurish, etu awonsu tukwikal ni chisend cha kusal chakwel antu akumangena iyova nawamp. Kupwa kwa Chivurish, tukutwish kuya ni kuyital antu amekeshina kusanger nich ukwash ukwau wa muspiritu.
4 Kwikal ni “mushiku wa kusal yom yiwamp” mu machuku ma kurutu kwa Chivurish ni kupwa kwach udi mutapu uwamp wa kumekesh kud Yehova anch chakin tumen usey wa yawonsu yasalay mulong wetwetu. Avud pakach petu tukutwish kuwejinaku usu tusadina mu mujikit wa kulejan rusangu ruwamp. Anch udi chibol nkwash, ukukimb kusal yawonsu ukutwisha chakwel kusal asaa 50 ap kusut mu mudimu wa kulejan. (Mat. 5:37) Londul kamu piswimp nakash program witekidina kwisambishil kwa ngond. (Mul. 3:1; 1 Kor. 14:40) Chiwapidil etu tushadilap tusalany yawonsu yitukutwisha chakwel kuyikwash ayibol awonsu, mu kuyikasikesh ni mu kusadin nau pamwing mu chingand. (Tal 2 Ant 10:15, 16, NW.) Anch nich mushiku twakun mwi Ndol, tukutwish kuchingejin musangar ujim ni chiyukish chidiokila kud Yehova. (Mal. 3:10, NW) Chitwishikin anch chinech chikukwash mud pa kumatikin chakwel kudandamen nich mudimu wa uchibol nkwash ap uchibol wa rawonsu. Chiwapidil kamu anch usu wa muspiritu ututambwila mwi Ndol udandamena kand ni mu angond akulondula pitudandamena kwikal in kulejan a Want a chisu ni chisu.
5 Chakin kamu, ngond unou tunan twa antu a Yehova akusambish malejan ma Baibel mavud. Ov ukimbin kusambishap dimwing? Lembil kusu mulong wa kwikal ni dilejan, ni sadil kulondulijan ni malembil mey. Ukutwish kuman chakin anch Yehova ukusanger kwit kwey kwa kwikepish mulong wa ukwash wa kuman muntu wa muchim utok wa kufundish. —1 Yoh. 3:22.
6 Tal mutapu wa kusambish misamb wimekeshina kwikal ni mabuj. Sambish bil kwipul anch: “Ov utongin anch ubaj wawonsu ku mashikol chidi chibudikin cha mujikit wa ayilembil ap chidiokil ku kukangany kufundish kwa anvaj?” Chingel chakul. Anch muntu walond anch “mujikit wa ayilembil,” tang Kujingunik 12:9, 12, ni kurumburil mudimu wa Djabul mu kusarumun kanvundangesh mu mangand. Kupwa buril broshir Nzamb Witin pa difundish dia 4, ni mwipula anch wiyipulap kal kwadiokalay Djabul. Sambish kutang ni kwisambin maparagraf maad ma kusambish. Anch muntu watond “kukangany kufundish kwa anvaj” mudi diyingish dia kwikalaku kwa ubaj mu mashikol, tang 2 Timote 3:1-3 ni mekesh milong yiwejidinaku chakin ku mulong winou. Kupwa buril broshir Nzamb Witin pa difundish dia 8, tang paragraf wa 5, ni dandamen nich misamb. Anch ukutwish kukanijan nend mulong wa kuchirikinamu, ukutwish kwirijek nawamp mulong wa kwilej nend Baibel chisu ni chisu. Pa chisu cha kwez kumutal kand, mwipula anch wij muntu mukwau ukutwisha kusangar mu kutesh yom yilejinay.
7 Mutapu ukwau wa kwikal ni “mushiku wa kusal yom yiwamp” mwi Ndol kudi kulejan mu maveni kushalijan. Ov watonginap kal kupan uman mu park ap ndond ya kwimikin miotak? Ndond ya kuchingedin bis ap mu gar? Ov usotin kupakish kupan uman kusutin ku telefon, mu balibal ap mu teritwar mudia mijikit yivud? Ov mulong wak ukutwishap kusadin yitongijok yiney ngond winou? Yehova ukukukwash kukumangej usu uswiridina. (Mid. 4:31; 1 Tes. 2:2b) Chitwishikin anch wovijanany mulong wa kusadil pamwing ni chibol ap ni mwin kulejan wijidina kal yikunku ya mudimu wa kulejan yiney.
8 Muntu mwawonsu usotina kusal yivud mu mudimu wa kupan uman ukez kusot kupan uman wa kukashimun. Yisu yivud awonsu akat kusambishang misamb ya urund ni muntu. Isambina kwey mutu wa mulong ukata kuyisangarish avud, chitwishikin kusadil misamb yidia kwiur oku mu paragraf wa 6. Ikasikesha kusadil nawamp ap yikunku yikemp ya chisu chamwamu chikutwish kushadik. Many ap anch makepin tukumichilangap mulong mizwilap mulond. Ov mulong wak tukutwishap kusadil mutapu uwamp aminit ap atan,dikum, ap dikum ni yitan chakwel kupan uman wa kukashimun?
9 Chisu cha kutong: Tongin milong yadinga ya usey ujim mu dram wa chikunguril cha distrik cha muvu wadap ou “Dizu dia Uprofet dia Nzamb”. Dram ukweta mutu wa mulong Tumanany Usey wa Uswan Wetu wa Muspiritu, watutongishin nawamp piur pa kushalijan kwa Jakob nend Esau. Esau walonda anch mud Jakob, wadinga ni kusanger yom ya muspiritu, pakwez yisalijok ya Esau yachimekeshap bwat. (Dis. 25:29-34) Didi dibabesh dikash mudi ik kudi etu! Mud kamu Jakob, twikalany tayad kwikasikesh, ni kusal usu, mulong wa chiyukish cha Yehova. (Dis. 32:24-29) Ov mulong wak tukutwishap kusadil Ndol ni angond awonsu alondwila chakwel kuvuvurish kand mushiku wetu, pakad kupipej ap pakemp uswan wetu wa muspiritu upandakena kuwap?
10 “Dichuku dijim dia Yehova didi piswimp. Didi piswimp ni dikat kwez swa swa.” (Sof. 1:14, NW) Rusangu ruwamp ra Want rifanyidin kurilejan. Mwom wa antu udi mu chak! Chiwapidil anch ngond winou ikala ngond uyukina mutapu wa pakampwil mulong wa antu awonsu a Yehova pitumekeshina mu umwing anch tukwet “mushiku wa kusal yom yiwamp.”
[Caption on page 4]
[Box on page 4]
Chivurish cha muvu unou chikwikal Diakasatu, Ndol 19. Amakurump afanyidin kutal nawamp milong yilondwila:
Yivurikish ya chivurish
◼ Chiukutenchikanya chisu cha kukumangan, talany nawamp anch yijingidij kakuyisutishap kurutu kwa muten kuzwek.
◼ Muntu ni muntu, kuchindinamu ni mwin kulond, afanyidin kumwijikish chisu ni ndond yikusadilau musambu.
◼ Akukimb mulad wa dibot ni nviny yifanyidina ni kuyirijek kurutu kwa muten.—Tal Tour de Garde wa Kasan 15, 1985, paj 17.
◼ Malong, jimpas ni mes ni disun dia pa mes difanyidina afayindin kuyirijek kurutu kwa muten.
◼ Chot cha Want ap ndond yikwau ya chikumangan yifanyidin kwikal yikombinau nawamp kurutu kwa muten.
◼ Ankwash (in kwak antu) ni in kusutish yijingidij afanyidin kuyitond ni kuyilej yikusalau ni mutapu ufanyidina kurutu kwa muten.
◼ Afanyidin kusal yitenchik chakwel kumutwadil chidi upaninau many udia chilim ap wakad kutwish kwikal ku chivurish yijingidij.
◼ Anch yikumangen yivud yikusadil Chot cha Want chimwing, kufanyidin kwikal kwovijan kuwamp pakach pa yikumangen chakwel kwipuk runtu ramwamu ku chis, mu tubway, ap mwi ndond ya kwimikin motak.