Mazu maswapela kutesh mapandaken kuwap
1 Ov mulong wak chisu chivud in kulejan achidia ansand akat kupwitang yitongijok ya antu akatau kushimunin nau uruu wa Want? Chidi mulong mazu makatau kusadil mading maswapela kutesh. In kulejan amwing akutwish kutong anch chakwel kupan uman mutapu umwing ukweta mabuj chifanyidin kamu kwijik kulond nawamp. Pakwez, uman umekeshin anch mazu ma kusambish nich maswapela ni movikena nawamp mading mawamp.
2 Yesu walejana Want wa Nzamb mu mutapu umwing uswapela, nich mazu mamwing madia zwang ni wayifundisha in kwilej end kusal chilik chimwing. (Mat. 4:17; 10:5-7; Luka 10:1, 9) Ndiy wadinga ni kusadil mazu ma kusambish nich maswapela, yipul, ni yishimu mulong wa kupwit yitongijok ya antu adinga ni kumutesh ni kuyishik ku michim. (Yoh. 4:7-14) Tuwapidil kumwilikej ni kusadil mazu ma kusambish nich mambamb maswapela kutesh.
3 “Rusangu ruwamp ra want” udi uruu tufanyidina kulejan. (Mat. 24:14) Anch wasadil Want mud mutu wa mulong wey wa kusambish nich chikukukwash kudandamen kwikal ni mazu ma kusambish nich mambamb maswapela. Londin yom yiyitadina antu wisambina nau. Chisu chivud amband akatining nakash yom yitadila dijuku diau pa ndond ya milong ya chipolitik. Yom ya kusambish kud tatuku yidi mudimu wend ni kuwap kwa dijuku diend. Ansand akat kutonginang nakash machuku mau ma kurutu; amapal, akat kutonginang kwikal ni ukash uwamp wa mujimbu ni diking diawu. Pichuku pichuku antu akat kubanginang nakash milong yisutila ndond yishichau kupandakanamu milong ya ngand jikwau ja kulemp. Kupwa kwa kwisambin milong yiyitadila antu avud, pwitin yitongijok ku yiyukish yikeza kwikalau nich antu akata kuziyil mu winyikel wa Want wa Nzamb. Mazu makemp maswapela, matondinau nawamp ni kuwejidinau verse makutwish kwikal marumburikina nawamp chakwel kuvuvurish kusanger kwa antu wisambina nau.
4 Ukutwish Kusambish Mambamb Nich Kulond Anch:
◼ “Chakin anch witiyin anch antu akat kurish nich misong yivud yikasikena kwok. Ov wij anch Nzamb washilamu kal anch ukez kunongish mitapu yawonsu ya mayej, ni rufu?” Chingel chakul, ni kupwa tang Kujingunik 21:3, 4.
5 Nich mazu ma kusambish nich misamb maswapela kutesh, ukutwish kushiken manangu ni michim ya antu avud mu mwab wey, ni kuyikwash kwilej piur pa Yehova ni kwikal ni ruchingej ra kwikal nich mwom wa chikupu.—Yoh. 17:3.