‘Dizu dia Nzamb . . . Dikwet Ukash’

¹ Mupostol Paul wafunda anch: “Dizu dialonday Nzamb dikwet mwom, dikwet kand ukash.” (Heb. 4:12) Ov yom ik yasotay kulond pa chinech? Dizu dia Nzamb, ap uruu, udia mu Baibel ukutwish kwikal ni usu ujim pad antu. Manangu madia mu Baibel makwet ukash wa kukarumun mwom wa muntu mulong wikala uwamp. Ukash ni ruchingej yipanina Baibel yikat kuyipwitin antu kud Mwin Kupan-Mwom, Yehova Nzamb. Uruu udiamu ukutwish kusambish kuyitakel antu a michim yitentamina mwi njil yitwadila ku mwom wa chikupu. Pakwez, chakwel kuman yom yiney, tufanyidin kusadil Baibel pa chisu tukata kulet uman kud antu akwau.

² Tang Mufund Chisu Chin Chawonsu: Chimeken anch in kulejan avud alika kal chaku cha kusadil Baibel ku chis ni chis. Ov mwamu chidia kud ey? Mulong antu avud ameken mud kakwetap chisu mulong wa misamb yilemp nakash, pamwing ap wikadil kal ni chaku cha kuchirikin yom yimwing ap kusu kupan mikand ap kusu kuchirikin pa mutu mufund wija. Tuyikasikeshin in kulejan awonsu kusal usu wa kashinsh wa kutang piswimp verse umwing mu Baibel pa chisu chilejenau rusangu ruwamp, chawiy lel muntu ukutwish kuman anch uruu wetu udi chakin kamu udiokila mu Dizu dia Nzamb.

³ Ap anch antu akemp kusu awiy akweta chaku cha kutang Baibel, achimulimishin ni katat kud antu avud. Ap antu akweta midimu yivud akez kwitekin chisu ni chisu minit umwing ap aminit akemp chakwel kutesh uruu utanginau kamu mu Dizu dia Nzamb mwin. Patanginau mufund kanang nich chirungil ni kuurumburil mu wiswimp, ukash wa dizu dia Yehova ukutwish kwikal ni usu umwing uwamp kud mwin kutesh. Pakwez mutapu ik ukutwisha kutek chilal kudiokal ku mazu mey ma kusambish ni kushiken ku kutang verse mu Baibel?

⁴ Pakish Chinech mu Mudimu wa Kupan Magazet: Kalam wa munyingumuku umwing ukat kusadilang mutapu umwing uwamp mifund pa chisu chikatay kusal mudimu wa kupan magazet. Ndiy ukat kusendang ka Baibel kakemp mu dibeng diend. Kupwa kupan magazet ni misamb yikemp piur pa mutu wa mulong, ukat kufungul Baibel wend pakad kwidjidjek ni kutang verse usendina yitongijok ya mutu wa mulong. Tukutwish kuchisal nich kwipul kusu anch, “Ov utongin nchik piur pa kushilamu kwinoku kukasikeshina?” ni kupwa lel kusambish kutang mufund utondinau nawamp.

⁵ Chisala chikal rutong rey ra kutang verse umwing ap maad mu Baibel ni muntu mwawonsu ukuteshina. Usu wau ubachikina ukutwish kupaturul njil kud antu avud kusej piswimp ni Nzamb.​—⁠Yohan 6:⁠44.