Dizu dia Nzamb Didi Uyakin
1. Rusangu ik rijim ridia mu Baibel?
1 “Mazu mey mawonsu ma kabuj madi makin,” mwamu mwafunday nfund-a-kuseng. (Kus. 119:160) Kusutil ku Dizu diend dipepidilau, Yehova ukat kupan yakul yiwamp ku yipul yijim ya mwom. Ndiy ukat kupan rongoj ni ruchingej kud antu akweta yikokujol. Ni ndiy ukat kutulej mutapu tukutwisha kushejin piswimp nend. “Kwilej uyakin udiokila mu Baibel kufaniken mud kudiokal mwi ndond ya mididim bwi ni mu runeng rikash ni kwandam mu kapalikany mutokina, mudia chitokish chijim, ni musangareshina,” mwamu mwalonday mband umwing mwin kusanger. Ov ukat kwikasikesh kulejan uyakin udiokila mu Dizu dia Nzamb chisu chawonsu?
2. Ov mutapu ik ukatay Baibel kuwapish mwom wa antu?
2 Ukash wa Kukarumun ni Kupwit Antu a Mangand Mawonsu: Uyakin wa Baibel ukwet ukash wa kukwat ku michim ni kukarumun mwom. (Heb. 4:12) Changadim upilau anch Rosa wiyandjika mu kusochik ni mu kunawol maar ni kusadil nayimp mon ya kulewish (mud damb). Ndiy walonda anch: “Dichuku dimwing, pinadinga mu mwikadil umwing wa kuburen ruchingej, ambay a uruw Atuman isamba nam piur pa mutapu ukutwishay Baibel kutukwash kupwish yikokujol yetu. Nasambisha kwilej Dizu dia Nzamb, dinamana anch disangareshin. Mwi ngond umwing kusu nikala nich usu wa kwikal ni mwom umwing wishitwila, ni kusambish kushakam mu mwom usu. Katat nikwet rutong mu mwom, kinisotilap kand ukwash wa maar ap mon ya kulewish. Ni kusambish kamu pinipa nasota nakash kwikal murund nend Yehova, nakwata chiyul cha kushakam kwambatan nich yany yend. Ang chadingap mulong wa manangu masadila ma Dizu dia Nzamb, nikwet kashinsh anch ing katat nijipin kal kwam.”—Kus. 119:92.
3. Ov mulong wak tufanyidinap kuchirik kwinyim mulong wa kuyilej antu akwau uruu wa Baibel?
3 Chidiay wakad kufanikan nich mabuku mavud lel, Baibel uyipwitin antu a ‘michid yawonsu, tubil twawonsu, antu awonsu, ni jindim jawonsu.’ (Kuj. 7:9) Rusot ra Nzamb ridi anch “antu awonsu apanda ni kwijik uyakin.” (1 Tim. 2:4) Chawiy lel, tufanyidinap kutongin anch muntu kanang kakezap kwitiyij rusangu ruwamp mulong wa ndond yikwetay mu chisak. Pakwez, yileja antu awonsu uruu wa Want, sadil kapamp kamwing Baibel pa chisu chitwishikina.
4. Ov mutapu ik tukutwisha kusadil Baibel pitupanina uman?
4 Kasikeshinany Mifund: Kudi yisu yivud ya kusadil Baibel mu mudimu wa kulejan. Piupaninany magazet, pakishany kwisambin mufund uyudilau mu minsamb ya kupan nich. Pakatau kupan mikand ya kupan pa ngond, amwing amana anch chidi cha ukwash kutang mufund utondinau nawamp mu minsamb yau ya kusambish nich. Chisu cha kuchirikinamu kusu, lejan mufund umwing ap yivud ya Baibel chisu ni chisu mulong wa kumukwash mwin chikumbu kutambul ronganyin rakin pakemp-pakemp. Chisu utakedila dilejan dia Baibel, shindakeshin minsamb pa mifund yijim. Chisu udia mu mudimu wa kulejan utenchikinau nawamp, send Baibel mu chikas chakwel kumusadil anch yisu yamekan ya kupan uman wa kukashimun.—2 Tim. 2:15.
5. Ov mulong wak tufanyidina kwikasikesh kusadil Baibel mu mudimu wetu wa kulejan?
5 Twikasikeshany kuyikwash antu akwau nich ukash ubachikina wa Dizu dia Nzamb dia uyakin kusutil ku kusadil Baibel pa chisu chawonsu chifanyidina mu mudimu wetu.—1 Tes. 2:13.
[Caption on page 1]
[Study Questions]