Kujikitish Kukat Kukasikeshanang
1 “Ov lel nadingap changadim mwin manangu?” Mwamu mwabarikay changadim mukemp pa chisu cha kulal. Chipul chinech chamukashimwisha makwend nakash. Kwikalap nchik kuman kwend mutapu wikasikeshay changadim wend mukemp kupakish kusal dichuku dinidia, ndiy wadiburila kulond ap dizu dimwing dia kumujikitish. Kushikok kudil kwa changadim winou mukemp kudi chivurikish kud etu awonsu—ansand ni amapal—anch tuswiridin kutujikitish. Ov tukat kuyikasikesh antu adia piswimp netu ni kuyijikitish mulong wa yiwamp yisadilau?—Jinsw. 25:11.
2 Tukwet mayingishin mavud ma kuyijikitish ambay netu Akristu. Amakurump, ankwash’a mudimu, ni ayibol asadil mudimu ukash chakwel kuwanyish yisend yau. (1 Tim. 4:10; 5:17) Anvaj amwovila Nzamb wom akat kusal usu wau wawonsu chakwel kuyilidin anau mu jinjil ja Yehova. (Ef. 6:4) Akristu ansand akat kusal usu nakash mulong wa kurish nich “mwiku wa mangand.” (1 Kor. 2:12; Ef. 2:1-3) Akwau akat kumusadil Yehova nich kushinshaman wikalap nchik upal ap kuvul kwa mivu yau, yikokujol ya ukash wa mujimbu, ap yoziu yikwau. (2 Kor. 12:7) Antu inay awonsu afanyidin kuyijikitish. Ov twij usu wau ufanyidina kuyijikitishin?
3 Kwa Muntu Ipend ni kwa Pakampwil: Tukat chakin kamu kusanger kujikitish kwa chikumangen chawonsu tukata kutesh ku chimet. Pakwez, kujikitish kukat kukasikeshanang nakash anch kuyil kud etu muntu ni muntu ipend. Chilikej, mu mwimbu wa 16 wa mukand wend kudiau in Rom, Paul wayijikitisha pakampwil Febe, Prisil nend Akila, Trifen ni Trifoz, ni Perisid, pakach pa antu akwau. (Rom 16:1-4, 12) Mazu mend mayikasikesha nakash mud ik antu inay in ritiy! Kushiman kwinoku kukat kuyinkish akadivar nau anambaz kashinsh anch akwet usey ni kukat kukwash chakwel kutusal twibomba pamwing nakash. Ov wapanin kujikitish kudi muntu ipend kwa pakampwil machuku minam?—Ef. 4:29.
4 Kudiokila ku Muchim: Chakwel kwikal chakin kamu kukasikeshina, kujikitish kufanyidin kwikal kwakin. Antu akutwish kujingunin anch yitulondila yidiokil ku muchim ap anch yidi kwau “ridim ra rilemb.” (Jinsw. 28:23) Pitukata kwiyijidish ayinetu kujingunin mwikadil uwamp ukwetau antu akwau, muchim wetu ukat kutubachik kuyijikitish. Twikalany in michim yazurikina mu kupan kujikitish kwakin, ni kwijik anch “dizu dia mu chisu chau didi diwamp.”—Jinsw. 15:23.