“Tutumbishany Dijin Diend Pamwing”

1. Ov chisu ik tukwikala nich cha kutumbish dijin dia Nzamb pamwing, ni tufanyidin kwirijek mu yom ik katat?

¹ Nfund-a-kuseng wawanga anch: ‘A, tumushimanany Yehova niyamam, tutumbishany dijin diend pamwing!’ (Kus. 34:⁠3) Chikumangan chetu cha Distrik “Endany Nend Nzamb” chezina kurutu oku chikutwinkish chisu cha kutumbish dijin dia Nzamb pamwing nau akadivar ni ampanyetu adiokila mu yikumangen yivud. Ov wirijekin kal mulong wa ndond ya kushakam, mulong wa weny, ni mulong wa kwit konje ku mudimu? Chidi cha manangu tutonginany nawamp pa yom yiney kurutu kwa chisu​—⁠Jinsw. 21:⁠5.

2. Mulong wak chidi cha usey kushik kurutu kwi ndond ya chikumangan?

² Kushik kwi Ndond ya Chikumangen: Kudi yom yivud ya kutongin pituyila ku chikumangan cha distrik. Kusambel kuya kwi ndond ya chikumangan kukutukwash kwipuk kulab kwakad kuchingejin mu kwirijek ni kuman ndond ja kushakam pa chisu chakwel kubombakan ni muchim wawonsu mu kuwang muminy wa kusambish ni malembil. (Kus. 69:30) Aminit akemp kurutu kwa chikunku kusambish, ntakel ukushakam ku chimet chisu chikusambisha kudjim mizik ya Want. Etu awonsu tufanyidin kushakam pa jindond jetu pa chisu chinech chakwel program asambish mu mutapu uwanyidina.​—⁠1 Kor. 14:​33, 40.

3. Ov mutapu ik tukutwisha kumekesh kalimish kud antu akwau pitukimbina ndond ja kushakam?

³ Dizu dia Nzamb dituyudil chakwel ‘tusala yom yetu yawonsu mu rukat.’ (1 Kor. 16:14) Chisu chipaturilau yis pamanch pa 8:00 , kuyilimish akwetu kukutukangesh kukink mau, kushinyijan, kubachikijan ap kuridin jindond ja kushakam jitusotila kurutu akwetu ashakamap. Chifanyidin kukwatin ndond ja kushakam ching kusu mulong wa antu wezina nau mu motak umwing ap ushicha nau chikumbu chimwing.​—⁠1 Kor. 13:5; Fil. 2:⁠4.

4. Yitenchik ik yidiaku mulong wa chisu cha kwipimish, ni mulong wak chidi cha usey?

⁴ Sendany amboku yakudia chakwel kwipuk kusha ndond ya chikumangan mulong wa kuya ni kukimb yakudia pa chisu cha kwipimish. Chinech chikuyikwash awonsu kusanger urund ukasikeshina ni kwikalaku chisu chikusambisha chikunku cha urel. Anch chiswiridikin, ukutwishany kusadil katermus ka yakudia kukatek mwishin mwa nkwas. Matermus majim ma dijuku, yom ya kam, ni maar maswejina yifanyidinap kuyiya nich kwi ndond ya chikumangan.

5. Yik yatenchikinau mulong wa amapal ni ayilim?

⁵ Mulong wa kuyikwash amapal ap ayilim, akuyishil ndond ya kushakam. Chinech chikuyikwash kushakam muchifanyidina ni kuyichidij ku yom, mud ruvul ap muten, anch chiswapel. Chijikish chitadila pa mulong winou chifanyidin kuchilejan kwinsambishin kwa chikunku cha kusambish.

6. Mutapu ik tukutwisha kurijek michim yetu mulong wa malejan tukutesha?

⁶ Musambu wa Muspiritu Utuchingedin: Mwant Yehoshafat “warijeka muchim [wend] mulong wa kumukimb Nzamb wakin.” (2 Jins. 19:​3, NW) Ov mutapu ik tukutwisha kurijek muchim wetu kurutu kwa chikumangan? Mitu ya milong yidia pa paj wa nsudiel wa Réveillez-vous! wa Ndol-Mem 22 ni wa Kalol 8 yimekeshin kurutu mutapu musambu wa mu spiritu ukwikala. Ov tukutwishap kutongin pa mitu ya milong yiney, yikasikeshidina pa musambu wa mu spiritu ututenchikidinay Yehova kurutu oku? Kurijek muchim wetu kwitin kand kumwit Yehova atukwash chakwel kwov kurumburik kwa malejan matukutesha ni kumasadil.​—⁠Kus. 25:​4, 5. 

7. Maswir ik tukweta, ni mulong wak?

⁷ Etu awonsu tukwet maswir ma kwilej yom yivud yidiokila mu Dizu dia Nzamb, ni kwijik anch ku malejan minam kwawiy tukupandina. (1 Pi. 2:⁠2) Pa chinech, el twikalany pakach pa in kukumangan ku Chikumangan chetu cha Distrik “Endany Nend Nzamb” ni ‘kutumbish dijin dia Yehova pamwing.’​—⁠Kus. 34:⁠3.

[Caption on page 1]

[Study Questions]

[Caption on page 3]

[Picture on page 3]

Mitapu ya Kutumbish

Dijin dia Nzamb

◼ Irijeka kurutu

◼ Mekesh rukat kud antu akwau

◼ Rijek muchim wey