Muchim wa Kwipan Uletining Yiyukish
1. Mutapu ik wamekeshau David ni Nehemi muchim wa kwipan?
1 Goliat pasambishay kuyisal amasalay in Isarel, kwikil muntu ap umwing pakach pau watwisha kurish nend. Pakwez kwading ching nsand umwing kafung, wakad kwiyijidish kwi njit, wipana. (1 Sam. 17:32) Pa chisu chachirikau in Yuda adinga mu uyong mu Yerusalem ni akanganya kutungiril mbumbu, kwading ching nfansey umwing wa mwant wa in Peris wipana ni kulik ndond yend ya katumb mu rupang ra mwant ni kuya ku Yerusalem chakwel kutenchik mudimu. (Neh. 2:5) Yehova wayiyukisha antu inay aad, David ni Nehemi, mulong wa muchim wa kwipan wamekeshau.—1 Sam. 17:45, 50; Neh. 6:15, 16.
2. Ov, mulong wak in Kristu afanyidin kumekesh muchim wa kwipan?
2 Ilel unou, muchim wa kwipan uburedin mu mangand. Mu “machuku ma kwisudiel” minam, antu akwet mwom ukwatikena nakash, ni avud adi “in kwikat ayinau.” (2 Tim. 3:1, 2) Chiswapel kudi muntu kukwatikan nich yisakin yend ni kukangany kutan chisu cha kwipan anch kudi kuswir kwa kuyikwash antu akwau. Pakwez, etu in Kristu, tusotin kumwimburij Yesu, wakwata chiyul cha kuyikwash antu akwau. (Yoh. 5:5-9; 13:12-15; 1 Pi. 2:21) Mutapu ik tukutwisha kumekesh muchim wa kwipan, ni yiyukish ik tukeza kutambul?
3. Mutapu ik muchim wa kwipan ukwashininga ku yikumangan ya chikumangen?
3 Mulong wa Akadivar Netu: Tukutwish kuyikwash antu akwau nich “kupan kwa spiritu” pitukata kwipan mu kurumburil anch yikunku ya chikumangan yitin kwakul kwa in kutesh. (Rome 1:11) Kupan yirumburil kukat kumutumbishang Yehova, kukat kwandjikang nakash uyakin mu manangu ni mu michim yetu, ni kukat kuwejin ku musangar wa yikumangan. (Kus. 26:12) Tukutwish kand kwipan mulong wa kusutish chikunku ku Shikol ya Mudimu wa Uteokras anch kwikil muntu wa kuchisal. Kusal mwamu kukez kutukwash kukudish ukaliweny wetu wa kufundish.
4. Ov, mitapu ik yimwing yikwau tukutwisha kumekesh muchim wa kwipan?
4 Akadivar akutwish kumekesh muchim wa kwipan kusutil ku kusot kwikal ni yisend mu chikumangen. (Is. 32:2; 1 Tim. 3:1) Akadivar awonsu akutwish kukwash chakwel yikumangan ni yitentam yisadika nawamp kusutil ku kwipan mu mudimu usadinau mu madepartema kushalijan. Pitukata kwipan kusal pamwing ni kalam mwin kwendangan mu mudimu wa kulejan ap kumwinkish yakudia, yiney yiletining “kwongojijan ku ritiy.” (Rome 1:12) Pitukata kupan milambu mulong wa kuyikwash an anshon, adia-afu, muyej ni chilim, maku ukweta an akemp, ni antu akwau mu chikumangen, tukat kuman musangar ni kwitiyik kwa Yehova.— Jinsw. 19:17; Mid. 20:35.
5. Yom ik yitadila Chot cha Want yitina antu akweta muchim wa kwipan?
5 Mutapu ukwau tukutwisha kupan chisu chetu ni usu wetu udi wa kupan ukwash ku mudimu wa kukomb ni kulam Chot cha Want. Chikwau kand, mulong antu avud akat kwitiyij uyakin, kudi kuswir kupandakena kwa Yot yisu ya Want ni kwa antu akweta muchim wa kwipan chakwel kuyitung. Ambay a uruw amwing, ipana ayinau chakwel kukwash Komite wa Rutung wa Teritwar wa pol pau ap anch ambay inay a uruw kadingap ni ukaliweny mu mudimu wa kutung. Kupwa, ambay inay a uruw ayifumba ni katat akat kupan ukwash mu kutung. Mband walonda anch: “Kusal mudimu pamwing ni antu akwau kwaleta urund wa piswimp nakash. Kwisudiel kwa dichuku, mujimbu wetu wadinga ni kuziy pakwez twadinga akasikeshinau mu spiritu.”
6. Mulong wak mudimu wa kulejan udi mudimu wa kwipan wa usey nakash tukutwisha kusal?
6 Kusutil ku Kulejan: Mudimu wa kwipan wa usey nakash tukutwisha kusal ilel unou udi mudimu wa kulejan Want. Payikwashinau antu kutesh ni kusadil chiyul cha Bibil, akat kutambul rutong mu mwom ni usu wa kulik yaku yiyimp. Akat kwilej piur pa ruchingej risangareshina ra Bibil mulong wa machuku ma kurutu. Kusutil ku kulejan Bibil, tukat kusal mudimu wa kwipan wa musangar uletina yiyukish ya chikupu. (Yohan 17:3; 1 Tim. 4:16) Pamwing ap mwikadil wetu ukutwish kutukwash kusal nakash mudimu wa kulejan kusutil ku kwikal chibol nkwash ap chibol wa rawonsu, kuya kusadil ndond yidia kuswir kujim, ap kwilej rudim ra wingendj.
7. Ov, mulong wak ilel unou kwipan kudi kwa usey?
7 Mwant David wabwaka anch chisu cha kusambish kwa Mesia winyikel wend, antu a Nzamb ‘akez kwipan.’ (Kus. 110:3)
Paswakejinay Yehova kwangul kwa nsudiel kwa mu spiritu, kudi midimu yivud ya kusal yitina muchim wa kwipan. (Is. 60:22) Ov, walonda anch: “Yam unou, ntuma”? (Is. 6:8) Chakin kamu, anch twamekesh muchim wa kwipan, tumusangareshin Yehova ni tukat kwangul yiyukish yivud.