Tukudishany Ukaliweny Wetu Mu Mudimu Wa Kulejan​—Mu Kuswimp Kukwatijan nau Antu

MULONG WAK CHIDI CHA USEY: Azizidilau many ni amikoku akwau ayitazukin antu a mitapu yawonsu kunang “mem ma mwom.” (Kuj 22:17) Mem minam ma chifanakesh mamekeshin yom yawonsu yipaninay Yehova kudi antu amuziyidina mulong wa kuyikol ku usuk wa chitil ni rufu. Mulong wa kuyikwash antu akweta yishankur ni yitiyij ya relijon kushalijan, tufanyidin kulejan “rusangu ruwamp rushichinga chikupu” mu mutapu wa kumukwash muntu ni muntu panrend.—Kuj 14:6.

MUTAPU WA KUSADIN:

• Tond mutu wa mulong ni verse ukupukuna michim ya antu adia mu teritwar wey. Ukutwish kutond yitongijok mulong wa mambamb ap kusadin chom umena anch chidi cha ukwash. Mitu ya milong ik ni maverse ik makatau antu kwitiy? Ov, kudi jinsangu jisu jisambidinau antu nakash? Yom ik yikutwisha kumusangaresh ikundj ap mband?

• Yilangwisha antu ni lond yom kanang yilondiningau mu teritwar wen.—2Ko 6:3, 4

• Ijik mikand ni mavideo madia mu Mushet Wetu wa Yom ya Kufundish Nich mulong wa kumulej muntu usangaredina

• Tambul jinsangu pa internet mu mazu malondinau antu adia mu teritwar wey

• Swimp mutu wa mulong chakwel uwanyish maswir ma mwin chikumbu. (1Ko 9:19-23) Chilakej, yom ik ukutwisha kulond anch wajingunin anch mwin chikumbu wafishang mwanamakwend?

TAL VIDEO, NI KUPWA AKUL KU YIPUL YILONDWILAKU EY:

• Mutu wa mulong ik wasambishangay nich mwin kulejan mambamb ni mwin chikumbu?

• Yom ik yamushikena mwin chikumbu?

• Verse ik wadia muwamp kutang pa chisu chinech ni mulong wak?

• Mutapu ik ukata kuswimpang mutapu wey wa kulejan chakwel uyisangaresha antu a mu teritwar wey?