Yipul ya in Kutang

“Chitongijok” ik Chikutekay Yehova mu Michim ya Antakel a Maguvernema Piswimp ap?

Piur pa mar makash, Kujingunik 17:16, 17 ulondin anch: “Miseng dikum wamanang ni nnam wa mu masuku, akumukis ndumb, amusheshin yom yawonsu, ni amusha kanzikis, chad akuda misuny yend ni kumwosh shitit nich kasu. Mulong Nzamb wachiteka mu michim yau chakwel awanyish chitongijok chend, mwaning, chakwel awanyish chitongijok chau chimwing kusutin kupan want wau kud nnam wa mu masuku.” Pakur mikand yetu yalondang anch “chitongijok” chikutekay Yehova mu michim ya antakel a maguvernema chid cha kumushesh relijon wa makasu.

Pakwez, chid cha usey kuswimp mutapu wa kutesh. “Chitongijok” chikutekay Yehova mu michim ya antakel a maguvernema chid cha “kupan want wau kud nnam wa mu masuku.” Mulong wa kutesh mutapu ukuwanyina yom yiney, tushinshikinany yipul ey:

Anany isambidinau mu uprofet winou? “Ndumb” utazukinau kand anch: “Babilon Mujim” umekeshin ditenchik da marelijon mawonsu ma makasu mada pa mangand. “Nnam wa mu masuku wa ulombu usunz” chid chijingidij cha ditenchik da chisambu dasambisha mu muvu wa 1919 datazukangau anch Société des Nations, nlel aditazukin anch Organisation des Nations unies. (Kuj. 17:3-5) “Miseng dikum” yimekeshin usu wa maguvernema mawonsu mamukwashina nnam wa mu masuku.

Kwovijan ik kuda pakach pa ndumb ni nnam wa mu masuku wa ulombu usunz? Ndumb wading “ushich” pa nnam wa mu masuku, wading ukat kumuyukish, kumubachik kusal yom ni kumuyikel.

Yom ik yikumushikena ndumb? Nnam wa mu masuku ni miseng dikum yimukwashina “akumukis ndumb.” Akumumekeshin ujim wau kusutin kushesh dipit dend ni kumekesh chisum chend patok. Akuwanish dirumburish da Yehova piur pa ndumb winou, charumburik anch akumushesh rawonsu. (Kuj. 17:1; 18:8) Ni dined dawiy dikwikala disuden da ditenchik da marelijon ma makasu. Pakwez, kurutu kwa yom yiney kusadik, Yehova ukubachik maguvernema kusal yom yakadingap kal kusadik mu winyikel wawonsu wa an a antu.

Yehova ukubachik maguvernema kusal yom ik? Ukutek “chitongijok chend,” mu michim ya miseng dikum, charumburik anch ukuyibachik “kumwinkish nnam wa mu masuku [wa ulombu usunz] ukash ni ulabu wau”—Organisation des Nations unies. (Kuj. 17:13) Tongijokin kurumburik kwa chom chinech. Ov, maguvernema makukwat aminau mupak wa kupan ukash ni ulabu kud nnam wa masuku? Bwat! Uprofet umekeshin anch Nzamb amwinend ndiy ukumabachika kusal mwamu. (Jnsw. 21:1; ilakej ni Isay 44:28.) Kuswimp kwinoku kukusadikap pakemp pakemp. Pakwez kukusadik kapamp kamwing ni kukwikal kukash. Kupwa nnam wa mu masuku winou ukwinkishau ukash ni ulabu, ukuwanish dirumburish da Yehova pantaliken ni ditenchik da marelijon ma makasu ma pa mangand mawonsu kusutin kumashesh rawonsu.

Yom ik tufanyidina kuchingej? Kukwatijan ni yom yisadikina katat, tukwetap kand kwetu kuswir kwa kutulej anch maguvernema makat kumukwash Organisation des Nations unies. Chawiy yom tufanyidina kuchingej yawiy ey: Kapamp kamwing kamu, Yehova ukubachik maguvernema kupan ukash ni ulabu wau kud Organisation des Nations unies. Piyikusadika yom yiney, tukwijik anch mar makash makimbin kusambish. Mu ka chisu kinak kashadinaku, “tushalany achila ku mes ni tulamany manang metu” mulong piswimp ap tukuman kuswimp kukusadika mu mutapu wa chikashimwish!​—1 Tes. 5:6.